නැගෙනහිරට යැවූ ලක්ෂ 8ක පාසල් පෙළපොත් බෝතල් පත්තරකාරයකුට විකුණලා..

Aug 14, 2026 at 06:03 PM

|

Lanka Leader

නැගෙනහිර පළාතේ පාසල්වල පළමු වසරේ දමිළ මාධ්‍ය සිසුන් සඳහා වෙන් කළ, රුපියල් ලක්ෂ 8ක් පමණ වටිනා පෙළපොත් සහ ක්‍රියාකාරකම් පොත් තොගයක් බෙදා හැරීමේ මධ්‍යස්ථාන වෙත ලබා නොදී බෝතල් පත්තරකරුවකුට විකුණා දැමූ ලොරි රියදුරෙකු අත්අඩංගුවට ගත් බව තලංගම පොලිසිය පවසයි.

අත්අඩංගුවට ගත් සැකකරුගෙන් සිදු කළ ප්‍රශ්න කිරීම්වලදී අනාවරණය වී ඇත්තේ 19,892ක් වූ මෙම පොත් තොගය කිලෝග්‍රෑම් 1600ක බරට විකුණා රුපියල් 47,000ක මුදලක් ලබාගෙන ඇති බවයි.

අධ්‍යාපන ප්‍රකාශන දෙපාර්තමේන්තුව මගින් නැගෙනහිර පළාතේ මධ්‍යස්ථාන 12ක් වෙත බෙදා හැරීම සඳහා මෙම පොත් තොගය 2026 මැයි 24 වන දින බාර දී ඇත්තේ බියගම, සියඹලාපේ ප්‍රදේශයේ ආයතනයක් සඳහායි.

නමුත් අදාළ පොත් තොගය නියමිත පරිදි නැගෙනහිර පළාතේ මධ්‍යස්ථාන වෙත ලැබී නොමැති බවට අධ්‍යාපන දෙපාර්තමේන්තුවේ ප්‍රකාශන අංශයේ නැගෙනහිර පළාත් බාර නිලධාරී ජගත් වන්නිහාරච්චි විසින් ඉකුත් 07 වන දින අධ්‍යාපන ප්‍රකාශන දෙපාර්තමේන්තුවට දැනුම් දී තිබේ.

ඒ අනුව අධ්‍යාපන ප්‍රකාශන දෙපාර්තමේන්තුවේ කොමසාරිස් (නිෂ්පාදන හා බෙදාහැරීම්) එන්. ඩබ්ලිව්. ඩී. හිරෝෂි ගුණවර්ධන විසින් ඉකුත් 12 වන දින තලංගම පොලිසිය වෙත කරන ලද පැමිණිල්ලකට අනුව විමර්ශන ආරම්භ කර තිබේ.

පොලිසිය විසින් සිදුකළ විමර්ශනවලට අනුව සැකකාර රියදුරු දොම්පේ, කුඩාමාපිටිගම පිහිටි සිය නිවසේදී අත්අඩංගුවට ගෙන සිදු කළ ප්‍රශ්න කිරීම්වලදී අනාවරණය වී ඇත්තේ, මැයි 24 වන දින බාරගත් පොත් තොගය දොම්පේ පිහිටි තමන්ගේ නිවස වෙත රැගෙන ගොස් ගබඩා කර තබාගෙන ඇති බවයි.

අනතුරුව දින කිහිපයකට පසු පරණ පත්තර සහ ප්ලාස්ටික් එකතු කිරීමට පැමිණි ලොරි රථයකට කිලෝ බරට විකුණා රුපියල් 47,000ක මුදලක් සැකකරු විසින් ලබාගත් බව පොලිසිය හමුවේ පාපොච්චාරණය කර තිබේ.

එහිදී, අදාළ පොත් මිලදී ගත් පුද්ගලයා විසින් ඒවා පෑලියගොඩ පිහිටි පරණ පත්තර සහ කඩදාසි අඹරන ආයතනයකට විකුණා ඇති අතර, විමර්ශන කණ්ඩායම් අදාළ ආයතනය වෙත ගොස් පරීක්ෂා කිරීමේදී අනාවරණය වී ඇත්තේ එම පොත් තොගය අඹරා දින කිහිපයකට පසු ඉන්දියාවට පවා අපනයනය කර ඇති බවයි.

සිද්ධිය සම්බන්ධයෙන් මේ වන විට පුද්ගලයන් හයදෙනෙකුගෙන් පමණ ප්‍රකාශ සටහන් කරගෙන ඇති අතර, අත්අඩංගුවට ගත් 31 හැවිරිදි සැකකරු කඩුවෙල මහේස්ත්‍රාත් අධිකරණය වෙත ඉදිරිපත් කිරීමට නියමිතයි.