කියුබානු විප්ලවයේ ශත සංවත්සරයට “ෆිදෙල්: උරුමය සහ අනාගතය” ජාත්‍යන්තර සමුළුව උත්කර්ෂවත්ව පවත්වයි.

Aug 13, 2026 at 10:36 PM

|

Lanka Leader

අගෝස්තු මස 13 වනදාට යෙදෙන කියුබානු විප්ලවයේ නායක ෆිදෙල් කස්ත්‍රෝ රුස්ගේ 100 වැනි ජන්ම සංවත්සරයට සමගාමීව, ඔහුගේ චින්තනය, දේශපාලන දර්ශනය සහ උරුමය පිළිබඳ අවධානය යොමු කරන පළමු ජාත්‍යන්තර සමුළුව වන “ෆිදෙල්: උරුමය සහ අනාගතය” පසුගිය 10 වනදා කියුබාවේදී ආරම්භ විය.

ලොව මහාද්වීප පහ නියෝජනය කරමින් පැමිණි විද්වතුන්, ශාස්ත්‍රඥයන්, බුද්ධිමතුන්, කලාකරුවන්, සමාජ හා දේශපාලන ක්‍රියාකාරීන් සහ තරුණ නියෝජිතයන්ගේ සහභාගීත්වයෙන් පැවැත්වෙන මෙම සමුළුවේ සමාරම්භක අවස්ථාව අමතමින්, කියුබානු ජනරජයේ ජනාධිපති සහ කියුබානු කොමියුනිස්ට් පක්ෂයේ මධ්‍යම කාරක සභාවේ පළමු ලේකම් මිගෙල් මාරියෝ ඩියාස්-කැනෙල් බර්මුදෙස් සිය ප්‍රධාන දේශනය ඉදිරිපත් කළේය.

කියුබාවට එරෙහි එක්සත් ජනපද සම්බාධක සහ පීඩනය අඛණ්ඩව පවතින පසුබිමක මෙම අවස්ථාවට සහභාගී වීම ධෛර්ය සම්පන්න තීරණයක් බව සඳහන් කළ ජනාධිපති ඩියාස්-කැනෙල්, ලොව පුරා සිට පැමිණි නියෝජිතයන් උණුසුම් ලෙස පිළිගත්තේය. “තම මිතුරන් කිසිදා අමතක නොකරන දිවයිනක් වන කියුබානු ජනතාව සහ එහි කොමියුනිස්ට් පක්ෂය වෙනුවෙන්, ඔබ වෙත පිරිනැමිය හැකි අවංකම සහෝදරත්වයේ වැළඳගැනීම පිළිගන්න,” යනුවෙන් ඔහු පැවසීය.

“ඔබගේ ධෛර්යවත් පැමිණීමෙන්, මෙහි ෆිදෙල්ගේ කියුබාවේ, ඔහුගේ සියවස් සැමරුම වෙනුවෙන් ඔබ ඉදිකළ ස්මාරකයට වඩා හොඳ හෝ ශක්තිමත් ස්මාරකයක් තවත් නැත,” යනුවෙන්ද ඔහු අවධාරණය කළේය.

ෆිදෙල්ගේ උරුමය සහ කියුබානු විප්ලවයේ ජයග්‍රහණ

ජනාධිපති ඩියාස්-කැනෙල් සිය දේශනයේදී ෆිදෙල් කස්ත්‍රෝගේ දේශපාලන හා සමාජ උරුමය පිළිබඳ පුළුල් විශ්ලේෂණයක් ඉදිරිපත් කළේය. 1959 කියුබානු විප්ලවයට පෙර රට මුහුණ දුන් දරුණු සමාජ හා ආර්ථික තත්ත්වයන් සිහිපත් කළ ඔහු, පසුගිය දශක කිහිපය තුළ විප්ලවය විසින් සෞඛ්‍ය, අධ්‍යාපනය, විද්‍යාව සහ සමාජ සංවර්ධනය යන ක්ෂේත්‍රවල අත්කරගත් ජයග්‍රහණ අවධාරණය කළේය.  කෙසේ වෙතත්, වර්තමානයේ කියුබාව දැඩි ආර්ථික පීඩනයකට සහ සම්පත් හිඟයකට මුහුණ දී සිටින බවද ඔහු සඳහන් කළේය.

“ෆිදෙල් අපට උරුම කර දුන්නේ සිතීමේ සහ ක්‍රියා කිරීමේ ක්‍රමයකි. ඔහු අපට වට්ටෝරු ලබා දුන්නේ නැත; ඔහු අපට ක්‍රමවේදයක් ලබා දුන්නේය,” යනුවෙන් ඩියාස්-කැනෙල් පැවසීය.

එක්සත් ජනපද සම්බාධක දැඩි ලෙස හෙළා දකී

කියුබාවට එරෙහි එක්සත් ජනපද සම්බාධක තවදුරටත් දැඩි කිරීම දැඩි ලෙස හෙළා දුටු කියුබානු ජනාධිපතිවරයා, එම ප්‍රතිපත්තිය කියුබානු ජනතාව මත දැඩි මානුෂීය හා ආර්ථික බලපෑමක් ඇති කරන බව අවධාරණය කළේය. සෞඛ්‍ය, බලශක්ති සහ අනෙකුත් අත්‍යවශ්‍ය ක්ෂේත්‍රවල ඇති වී තිබෙන දුෂ්කරතා පිළිබඳව සඳහන් කළ ඔහු, විදුලිබල හිඟය, ඖෂධ හා අනෙකුත් අත්‍යවශ්‍ය භාණ්ඩ හිඟය ඇතුළු ගැටලු පිළිබඳව අවධානය යොමු කළේය. එහෙත් මෙම අභියෝග හමුවේ කියුබානු ජනතාව යටත් නොවී, ෆිදෙල් කස්ත්‍රෝ විසින් උරුම කර දුන් ප්‍රතිරෝධයේ සහ නිර්මාණශීලීත්වයේ මාවත ඔස්සේ ඉදිරියට යමින් සිටින බව ඔහු පැවසීය.

“අපි ෆිදෙල් අපට ඉගැන්වූ දෙයින් ප්‍රතිචාර දැක්වූවෙමු: ප්‍රතිරෝධය නිෂ්ක්‍රිය දෙයක් නොවේ; එය නිර්මාණශීලී ය,” යනුවෙන් ජනාධිපතිවරයා ප්‍රකාශ කළේය.

කියුබාව විසින් තමන්ගේම එන්නත් සංවර්ධනය කිරීම, කෘෂිකර්මාන්තය ශක්තිමත් කිරීම සහ ජාත්‍යන්තර සහයෝගීතාව හා ජාත්‍යන්තරවාදී ප්‍රතිපත්තිය අඛණ්ඩව පවත්වාගෙන යාම එම නිර්මාණශීලී ප්‍රතිරෝධයේ උදාහරණ ලෙස ඔහු පෙන්වා දුන්නේය.

“ෆිදෙල්ගේ උරුමය සියලු අරගලකරුවන්ට අයත්”

සමුළුවට සහභාගී වන ජාත්‍යන්තර නියෝජිතයන් අමතමින් ජනාධිපති ඩියාස්-කැනෙල්, කියුබාවේ සැබෑ තත්ත්වය පිළිබඳ සත්‍යය ලොවට ගෙන යන ලෙස ඉල්ලා සිටියේය. “ෆිදෙල් යනු කියුබානුවන්ට පමණක් සීමා වූ උරුමයක් නොවේ. වඩා යහපත් ලෝකයක් වෙනුවෙන් අරගල කරන සියලු දෙනාට ෆිදෙල් අයත් වේ,” යනුවෙන් ඔහු පැවසීය. ලොව පුරා ප්‍රගතිශීලී බලවේග එක්සත් කිරීම, ෆිදෙල්ගේ චින්තනය හා උරුමය ගැඹුරින් අධ්‍යයනය කිරීම සහ එම අත්දැකීම්වලින් ආභාසය ලබා 21 වැනි සියවසට ගැළපෙන සමාජවාදී සමාජයක් ගොඩනැගීමට දායක වීමේ වැදගත්කමද ඔහු අවධාරණය කළේය.

සිය දේශනය අවසන් කරමින් ජනාධිපති ඩියාස්-කැනෙල්, කියුබානු විප්ලවයේ සම්ප්‍රදායික සටන් පාඨය වන “ෆිදෙල් සදාකාලිකව ජීවත් වේවා! සමාජවාදය නැතිනම් මරණය! මාතෘභූමිය නැතිනම් මරණය! අපි ජයග්‍රහණය කරන්නෙමු!” යනුවෙන් ප්‍රකාශ කළේය.

කියුබානු ජනාධිපතිවරයා කළ සම්පූර්ණ දේශනය පහතින්...

කියුබානු විප්ලවයේ පළමු ජාත්‍යන්තර සමුළුව “ෆිදෙල්: උරුමය සහ අනාගතය”