පාර්ලිමේන්තු වරප්‍රසාද පිටුපස හැංගෙන්නේ නැතුව ඕන නම් එළියෙදි කියන්න.. – නීතිඥ සංගමයේ සභාපති ගැන කළ ප්‍රකාශයට මන්ත්‍රී අසිත නිරෝෂණට අභියෝගයක්

Jul 25, 2026 at 05:33 AM

|

Lanka Leader

ශ්‍රී ලංකා නීතිඥ සංගමයේ (BASL) සභාපති නීතිඥ රජීව් අමරසූරියට එරෙහිව ආණ්ඩු පක්ෂ පාර්ලිමේන්තු මන්ත්‍රී අසිත නිරෝෂණ එගොඩවිතාන විසින් ඊයේ (24) පාර්ලිමේන්තුවේදී සිදුකරන ලද ප්‍රකාශයන් සම්පූර්ණයෙන්ම අසත්‍ය, පදනම් විරහිත සහ ද්වේෂසහගත බව ශ්‍රී ලංකා නීතිඥ සංගමය නිවේදනය කරයි.

පාර්ලිමේන්තු වරප්‍රසාද අවභාවිත කරමින් මහජනතාව නොමග යැවීම සඳහා මෙවැනි ප්‍රකාශ සිදු කිරීම පිළිබඳව නීතිඥ සංගමය සිය දැඩි කනස්සල්ල පළ කර සිටින බවයි එම නිවේදනයේ සඳහන්.

ඒ අනුව, එම සංගමය පවසන්නේ, මන්ත්‍රීවරයාට පාර්ලිමේන්තු වරප්‍රසාද ආවරණයෙන් මිදී, එකී ප්‍රකාශය පාර්ලිමේන්තුවෙන් පිටතදී නැවත සිදු කරන ලෙසයි.

එසේ කළහොත් ඊට එරෙහිව සුදුසු නීතිමය පියවර ගන්නා බව ද සංගමය අවධාරණය කරයි.

නීතිඥ සංගමයට එරෙහිව එල්ල වන මෙවැනි ලාභදායී දේශපාලන ප්‍රහාර සාර්ථක නොවන බවත්, මෙරට නීතිඥ ප්‍රජාව එකමුතුව සිටින අතර නීති ක්ෂේත්‍රයේ ස්වාධීනත්වයට සහ ගෞරවයට එල්ල වන ඕනෑම අභියෝගයකට මුහුණ දීමට සූදානම් බවත් එම නිවේදනයේ සඳහන්.

අභියාචනාධිකරණ සහ ශ්‍රේෂ්ඨාධිකරණ විනිසුරුවරුන්ගේ විශ්‍රාම යෑමේ වයස ඉහළ නැංවීමේ යෝජනාව සම්බන්ධයෙන් ද අදහස් දක්වන නීතිඥ සංගමය, ශ්‍රේෂ්ඨාධිකරණවලට බලපාන ආණ්ඩුක්‍රම ව්‍යවස්ථා සංශෝධන කිසිවිටෙකත් තාවකාලික අවශ්‍යතාවන්ට අනුව හෝ තදබල ආයතනික අවශ්‍යතාවයක්, පාරදෘශ්‍ය මහජන සාධාරණීකරණයක් සහ පුළුල් පාර්ශ්වකරුවන්ගේ මනා සාකච්ඡාවකින් තොරව හදිසියේ සිදු නොකළ යුතු බව තදින්ම විශ්වාස කරන බව සඳහන්.

ආණ්ඩුක්‍රම ව්‍යවස්ථාපිත පාලනය පිළිබඳ මහජන විශ්වාසය රැඳී පවතින්නේ අදාළ සංශෝධනයේ අන්තර්ගතය මෙන්ම ඒ සඳහා අනුගමනය කරන ක්‍රියාවලිය මත බව ද නිවේදනයේ පෙන්වා දෙයි.

ඕනෑම ආණ්ඩුවක් බලයේ සිටියද ප්‍රජාතන්ත්‍රවාදයට, අධිකරණයේ ස්වාධීනත්වයට සහ විරෝධතා දැක්වීමේ අයිතිය ඇතුළු ජනතාවගේ මානව හිමිකම්වලට එල්ල වන ඕනෑම තර්ජනයකට එරෙහිව නීතිඥ සංගමය බියෙන් හෝ සැකෙන් තොරව පෙනී සිට ඇති බවත්, නීතිඥ සංගමය කිසිවිටෙකත් දේශපාලනය නොකරන බවත් එහි නියෝජ්‍ය සභාපති ජනාධිපති නීතිඥ රියන්සි අර්සකුලරත්න සහ ලේකම් නලින් ද සිල්වාගේ අත්සනින් නිකුත් කළ නිවේදනයේ වැඩිදුරටත් සඳහන්.