ඉන්දියාවේ ‘කැරපොතු’ අරගලය ලංකාවේ එක වගේම වෙයි.. අරගලයට ඉන්දියාවෙන්ම ගලන ආහාර ගඟක්..

Jul 24, 2026 at 04:08 PM

|

Lanka Leader

ඉන්දියාවේ අධ්‍යාපන ක්ෂේත්‍රයේ සිදුවන දූෂණ සහ තරඟකාරී විභාගවල ප්‍රශ්න පත්‍ර දිගින් දිගටම පිටවීමට එරෙහිව නව දිල්ලියේ ආරම්භ වූ 'කැරපොතු' අරගලය (Cockroach Protest) මේ වන විට අග්‍රාමාත්‍ය නරේන්ද්‍ර මෝදිගේ රජයට එල්ල වූ ප්‍රබලතම සහ නිර්මාණාත්මකම තරුණ අභියෝගය බවට පත්ව තිබේ. 

විශේෂයෙන්ම වෛද්‍ය විද්‍යාල ප්‍රවේශ විභාග සහ රජයේ රැකියා සඳහා පැවැත්වෙන ඉහළ මට්ටමේ තරඟකාරී විභාගවල ප්‍රශ්න පත්‍ර දිගින් දිගටම පිටවීම හේතුවෙන් අනාගතය අඳුරු වූ තරුණයින් කිහිපදෙනෙකුම සියදිවි හානිකර ගැනීමේ තත්ත්වයන් හමුවේ මෙම විරෝධතාව හටගෙන ඇත. 

මෙම අසාධාරණයට වගකීම භාරගනිමින් ඉන්දීය අධ්‍යාපන අමාත්‍ය ධර්මේන්ද්‍ර ප්‍රධාන් මහතා වහාම ධුරයෙන් ඉල්ලා අස්විය යුතු බවට විරෝධතාකරුවෝ බලකර සිටිති.

නව දිල්ලියේ ජන්තර් මන්තර් විරෝධතා භූමිය වෙත සෘජුවම පැමිණීමට නොහැකි, නමුත් අරගලයට සහය දක්වන සමස්ත ඉන්දියාවේම ජනතාව මේ වන විට අමුතුම ආකාරයේ සහයෝගයක් ලබා දෙමින් සිටිති. 

ඒ අනුව, ජංගම ආහාර බෙදාහැරීමේ යෙදුම් (Food Delivery Apps) ඔස්සේ විරෝධතා භූමියේ සිටින ඕනෑම අයෙකු සඳහා බර්ගර්, පීසා, කෙටි ආහාර සහ පානීය ජල බෝතල් ඇණවුම් කිරීමට රට පුරා සිටින ජනතාව පෙළඹී සිටිති. එහි ප්‍රතිඵලයක් ලෙස සෑම මිනිත්තු කිහිපයකට වරක්ම ආහාර බෙදාහරින්නන් යතුරුපැදිවලින් පැමිණ විරෝධතාකරුවන්ට ආහාර පාන සපයන අතර, ඇතැම් අවස්ථාවල පැමිණ සිටින පිරිසටත් වඩා වැඩි ආහාර ප්‍රමාණයක් ලැබෙන බව ස්වේච්ඡා සේවකයෝ පවසති.

පසුගිය සඳුදා පොලිසිය විසින් කඳුළු ගෑස් සහ බැටන් ප්‍රහාර එල්ල කරමින් විරෝධතාකරුවන් විසුරුවා හැරීමට උත්සාහ කළද, විරෝධතාකරුවෝ සිය ස්ථාවරය වෙනස් නොකර අරගලයේ නිරත වෙති.