ශ්‍රී ලංකාව කියන්නේ ඉන්දියාවේ දොරකඩ තියෙන බරක් නෙවෙයි; ඉන්දීය සාගරය මධ්‍යයේ පිහිටි වටිනා වත්කමක්.. - ඉන්දියාවේ ශ්‍රී ලංකා මහ කොමසාරිස්වරියගෙන් ප්‍රබල ප්‍රකාශයක්

Jul 21, 2026 at 07:38 AM

|

Lanka Leader

නව දිල්ලියේදී පැවැත්වුණු ‘Calm Waters, Rising Tide: Stability as the Foundation for Indian Ocean Growth’ තේමාව යටතේ වූ ඉහළ පෙළේ රාජ්‍ය තාන්ත්‍රික සාකච්ඡාවකදී, ඉන්දියාවේ ශ්‍රී ලංකා මහකොමසාරිස් මහිෂිණි කොලොන්න මහත්මිය දෙරටේ ආරක්ෂක සහ ආර්ථික සබඳතා පිළිබඳව වැදගත් කරුණු කිහිපයක් පෙන්වා දී තිබේ.

ඓතිහාසිකව ඉන්දියාව සහ ශ්‍රී ලංකාව යා කරන කිලෝමීටර් 32ක් දිගැති පෝක් සමුද්‍ර සන්ධිය, වර්තමානය වන විට ගෝලීය බලවතුන්ගේ අවධානයට ලක්වෙමින් මිලිටරිකරණය වීමේ අවදානමකට මුහුණ දී ඇති බව ඇය සඳහන් කළාය.

"ශ්‍රී ලංකාව කියන්නේ ඉන්දියාවේ දොරකඩ තියෙන බරක් නෙවෙයි; ඉන්දීය සාගරය මධ්‍යයේ පිහිටි වටිනා වත්කමක්," යනුවෙන් ඇය එහිදී අවධාරණය කළාය.

ශ්‍රී ලංකා භාණ්ඩ හා සේවාවන්ට ඉන්දීය වෙළෙඳපොළට ඇතුළු වීමේදී පවතින බාධාවන් ලිහිල් කරන ලෙස ඉල්ලා සිටි මහකොමසාරිස්වරිය, ලාංකික ව්‍යාපාර ඉන්දියාවට පැමිණෙන්නේ තරග කිරීමට පමණක් නොව ඉන්දියාවේ ආර්ථික දියුණුවට දායක වීමට බව ප්‍රකාශ කළාය.

ඊට හොඳම උදාහරණය ලෙස ශ්‍රී ලංකාවේ ‘බ්‍රැන්ඩික්ස්’ (Brandix) සමාගම ඉන්දියාවේ විශාඛාපට්නම්හි පවත්වාගෙන යන විශේෂ ආර්ථික කලාපය මගින් ඉන්දියානුවන් 20,000කට ආසන්න පිරිසකට රැකියා අවස්ථා ලබා දී තිබීම ඇය පෙන්වා දුන්නාය.

මුහුදු මාර්ග ඔස්සේ සිදුවන නාවික ගමනාගමනය මෙන්ම, මුහුද යට පිහිටි ඩිජිටල් සන්නිවේදන කේබල් ජාලයේ ආරක්ෂාව පිළිබඳව ද ඇය විශේෂ අවධානයක් යොමු කළාය.

ලෝකයේ ඩිජිටල් දත්ත සන්නිවේදනයෙන් 99%කට වඩා සිදුවන්නේ මෙම යටිතල පහසුකම් ඔස්සේ බැවින්, බටහිර ආසියානු යූධ ගැටුම් හේතුවෙන් රතු මුහුද වැනි ප්‍රදේශවල පවතින කේබල්වලට හානි සිදුවීම ගෝලීය අන්තර්ජාල ජාලයට දැඩි තර්ජනයක් බව ඇය පෙන්වා දුන්නාය.

ශ්‍රී ලංකාව ආර්ථික වශයෙන් ශක්තිමත් වීම සහ කලාපීය ස්ථාවරත්වය පවත්වාගෙන යාම ශ්‍රී ලංකාවට මෙන්ම ඉන්දියාවේ ආරක්ෂාවට හා ආර්ථිකයට ද එකසේ වාසිදායක වන බව මෙම සාකච්ඡාවේදී වැඩිදුරටත් අවධාරණය විය.