කිලිනොච්චිය මුදාගෙන වසර 12කට පසු රණවිරුවන් පවා දෙන මෙහෙයුම කරළියට - විශ්‍රාමික ලුතිතන් ජෙනරාල් ජගත් ඩයස්

Jan 3, 2024 at 07:09 AM

|

Lanka Leader

‍2009 ජනවාරි 02 දා මානුෂික මෙහෙයුමේ හැරවුම් ලක්ෂය වූ කිලිනොච්චිය ත්‍රස්තවාදීන්ගෙන් මුදාගැනීමට හැකි වූ බවත්, එහි සතුට පසුගිය වසර දක්වාම තිබුන ද එළඹුනු වසරේ දී ඒ සතුට වෙනුවට ඇත්තේ දැඩි කණගාටුවක් බවද විශ්‍රාමික ලුතිතන් ජෙනරාල් ජගත් ඩයස් මහතා පවසයි.

ඔහු මේ බව පැවසුවේ 2009 ජනවාරි 02 දින මානුෂික මෙහෙයුම මගින් කිලිනොච්චිය මුදාගැනීම සමරා ඊයේ(02) දිනයේ බොරැල්ල එන්.එම් පෙරේරා මධ්‍යස්ථානයේ දී පැවති විශේෂ වැඩසටහනකින් පසු පැවති මාධ්‍ය හමුවට එක්වෙමිනි. 

බෙදුම්වාදී ත්‍රස්තයන්ගේ නායකත්වය යුද්ධයෙන් අවසන් කිරීමට හැකි වුවද, ඔවුන්ගේ බෙදුම්වාදී අරමුණු එම යුද්ධයෙන් අවසන් කිරීමට නොහැකි වූ බවද, යුද්ධය අවසාන කොටසේ දී එවකට ජනාධිපතිවරයාව සිටි මහින්ද රාජපක්ෂ මහතාට යුද්ධය නතර කරන්න යැයි ජාත්‍යන්තරයෙන් දැඩි බලපෑම් පැමිණිය ද ඔහු එය නතර නොකරම ජයග්‍රහණයෙන් කෙලවර කිරීමට නායකත්වය සැපයූ බවද ඒ මහතා මෙහිදී පැවසීය.

බොහෝ අය මෙරටට 17 වතාවක් ආක්‍රමණ දියත් වූ බව පැවසුවද, සැබවින්ම මෙරටට ඇතිවූ තවත් නූතන අක්‍රමණ 2ක් එයට එකතු කළ යුතු බවත්, එනම් යහපාලන රජය පත්වීම හා 69 ලක්ෂයක ජනවරමක් ලබාගත් නායකයකු පළවා හැරීමට දියත් වූ 'අරගලය' එබඳු තවත් ආක්‍රමණ දෙකක් ලෙස හඳුනාගත හැකි බවත් ජගත් ඩයස් මහතා මෙහිදී මෙන්වා දෙන ලදී.

අරගලය තුළින් ඇති කළ දේශපාලනික හා සමාජීය ගැටලුවල දිගුවක් ලෙස අද වන විට රට බෙදීමේ මාර්ග සිතියමේ කොටසක් ලෙස 'හිමාලයා ප්‍රකාශනය' කරලියට පැමිණ ඇති බවද ඒ මහතා මෙහිදී පැවසීය.

සවිස්තරාත්මක වීඩියෝව නරඹන්න...