ලූවර් මංකොල්ලයෙන් පසු 'විශේෂ අවධානයක්' තිබියදීත් තවත් ප්‍රංශ කෞතුකාගාරයක් කොල්ලකාලා...

Jul 6, 2026 at 10:56 AM

|

Lanka Leader

පසුගිය වසරේ සිදු වූ ලූවර් කෞතුකාගාරයේ සිදු වූ මංකොල්ලයෙන් පසු කෞතුකාගාරය "විශේෂ අවධානයට" ලක්ව ඇති බව වාර්තා වුවද, ඊසානදිග ප්‍රංශයේ පිහිටි ලාලික් කෞතුකාගාරයෙන් යුරෝ මිලියන 4 ක් පමණ වටිනා ආභරණ සොරුන් විසින් සොරකම් කර ඇතැයි වාර්තාවේ.

ජර්මානු දේශසීමාව අසල බාස්-රින් මණ්ඩලයේ ගම්මානයක් වන වින්ගන්-සර්-මෝඩර් හි කෞතුකාගාරයට ඊයේ(05) අලුයම 5:30 ට පමණ මෙම කඩාවැදීම සිදු විය. වෙස්මුහුණු පැළඳ සිටි පුද්ගලයින් කිහිප දෙනෙකු දොරක් බලහත්කාරයෙන් විවෘත කර ප්‍රදර්ශන කුටි හයක් කඩා ආභරණ කැබලි 20 ක් පමණ රැගෙන පලා ගොස් තිබේ.

හානිය තවමත් තක්සේරු කරමින් පවතින නමුත්, විමර්ශනයට සමීප එක් මූලාශ්‍රයක් පාඩුව යුරෝ "මිලියන හතරකට ආසන්න" විය හැකි බවට පැවසූ බව AFP පුවත් සේවය වාර්තා කළේය. සොරකම් කරන ලද භාණ්ඩ ස්ඵටික වලින් සාදා ඇති අතර වටිනා පාෂාන අඩංගු නොවන බැවින් ඒවා උණු කළ නොහැකි බවද පැවසේ.

වින්ගන්-සර්-මෝඩර් නගරයේ නගරාධිපතිවරයා පවසා සිටියේ සොරුන් කෞතුකාගාරයේ ආභරණ ඉලක්ක කරගෙන ඇති බැවින් ඔවුන් "හොඳින් දැනුවත්ව" සිටින්නට ඇති බවයි. නගරාධිපතිවරයා ප්‍රාදේශීය පුවත්පතක් වන DNA වෙත පැවසුවේ “සියලු අනතුරු ඇඟවීම් නිසි පරිදි ක්‍රියාත්මක වූ”  නමුත් ආරක්ෂක සමාගම වහාම ප්‍රංශ පොලිසියට දැනුම් දීමට අපොහොසත් වූ බවය. ළෙ ඵරිසීන් Le Parisien පුවත් පතට අනුව, එම ස්ථානයට පැමිණි පිරිසිදු කරන්නෙකු පොලිස් නිලධාරින් වෙත මුලින්ම දැනුම් දී තිබේ.

2025 ඔක්තෝම්බර් මාසයේදී පැරිසියේ ලූවර් කෞතුකාගාරයෙන් ප්‍රංශ ඔටුන්නෙහි තිබූ ආභරණ අටක් සොරුන් විසින් මහ දවල් සොරකම් කිරීමෙන් වසරකටත් අඩු කාලයකට පසුව මෙම සොරකකම සිදු වූ අතර, එහි වටිනාකම යුරෝ මිලියන 88 ක් පමණ වේ. ලූවර් මංකොල්ලයෙන් පැය කිහිපයකට පසු, ඊසානදිග ලැන්ග්‍රෙස් නගරයේ ඩෙනිස් ඩිඩරොට් නම් ප්‍රබෝධ යුගයේ නිවසින් වටිනා කාසි 2,000 කට ආසන්න ප්‍රමාණයක් සොරකම් කර ඇති බවද වාර්තා විය. ඊට මාසයකට පෙර, සොරුන් ජාතික ස්වභාවික ඉතිහාස කෞතුකාගාරයට කඩා වැදී යුරෝ මිලියන 1.5 ක් පමණ වටිනා දුර්ලභ දළ රන් කුට්ටි හයක් සොරකම් කළහ.

මෙම සිදුවීම් කෞතුකාගාර ආරක්ෂාව සම්බන්ධයෙන් ජාතික වශයෙන් අපකීර්තියක් ඇති කළේය. ලාලික් කෞතුකාගාරය “සංවේදී ස්ථානයක්” ලෙස සලකනු ලැබූ බවත් ලූවර් මංකොල්ලයෙන් පසු “විශේෂ අවධානයක්” ලබා ඇති නමුත් විමර්ශනයට සමීප මූලාශ්‍රයක් පැවසුවේ ආරක්ෂක පියවර “ප්‍රමාණවත් නොවන” බවයි.

පසුගිය මැයි මාසයේදී නිකුත් කරන ලද ප්‍රංශ පාර්ලිමේන්තු පරීක්ෂණ වාර්තාවකින් රටේ කෞතුකාගාර ආරක්ෂක ආකෘතියේ ගැඹුරු දෝෂ ඇති බව සොයා ගන්නා ලදී. එම දෝෂ අතර යල් පැනගිය යටිතල පහසුකම්, කාර්ය මණ්ඩල හිඟය සහ ප්‍රමාණවත් නොවන නිරීක්ෂණද ඇතුළත් වේ. 2024 දී ප්‍රංශ කෞතුකාගාරවලින් 23% කට පමණක් හදිසි සහ අවදානම් වැළැක්වීමේ සැලැස්මක් තිබූ අතර, ආයතනවලින් 54% ක් පමණක් නිසි වීඩියෝ නිරීක්ෂණද තිබුණි.

ග්‍රෑන්ඩ් එස්ට්හි ප්‍රාදේශීය සභාපති ෆ්‍රෑන්ක් ලෙරෝයි ලාලික් සොරකම "අපගේ උරුමයට පිළිගත නොහැකි ප්‍රහාරයක්" ලෙස හෙළා දුටුවේය. සොරකම් කරන ලද භාන්ඩ වලින් ඔබ්බට, ප්‍රංශ ඉතිහාසය, ශිල්පීයභාවය සහ සංස්කෘතියේ සංකේතාත්මක ස්ථානයට පහර දී ඇති බව පැවසීය.

2011 දී විවෘත කරන ලද ලාලික් කෞතුකාගාරය, ස්වර්ණාභරණ සහ වීදුරු නිෂ්පාදක රෙනේ ලාලික් සහ ඔහුගේ අනුප්‍රාප්තිකයින් සඳහා කැප කර ඇත. මෙම කෞතුකාගාරය ආර්ට් නූවෝ සහ ආර්ට් ඩෙකෝ ආභරණවල සිට නවීන ස්ඵටික කෑලි දක්වා භාන්ඩ 650 කට වඩා ප්‍රදර්ශනය කරනු ලබයි. සොරකමෙන් පසු දින කිහිපයක් කෞතුකාගාරය වසා තබන බව කෞතුකාගාර පාලන අධිකාරිය අවධාරණය කළේ "සන්සුන් සහ ආරක්ෂිත" නැවත විවෘත කිරීම සඳහා සූදානම් වීමේ අවශ්‍යතාවය සඳහන් කරමිනි.