ළමා ලිංගික අපයෝජන වින්දිතයන්ට ඇමෙරිකානු කතෝලික අගරදගුරු පදවියෙන් ඩොලර් මිලියන 395ක වන්දි ගෙවීමට එකඟතාවක්..

Jun 30, 2026 at 03:33 PM

|

Lanka Leader

ඇමෙරිකා එක්සත් ජනපදයේ සැන් ෆ්‍රැන්සිස්කෝ කතෝලික අගරදගුරු පදවිය (Catholic Archdiocese of San Francisco) ළමා ලිංගික අපයෝජන නඩු 500කට අධික සංඛ්‍යාවක් සමථයකට පත් කිරීම සඳහා ඇමෙරිකානු ඩොලර් මිලියන 395ක වන්දියක් ගෙවීමට මූලික එකඟතාවකට පැමිණ තිබේ.

පසුගිය වසර කිහිපය තුළ පුළුල් වශයෙන් එල්ල වූ ළමා ලිංගික අපයෝජන චෝදනා හේතුවෙන් ඇමෙරිකානු කතෝලික පල්ලිය විසින් ගෙවීමට එකඟ වූ තවත් විශාල වන්දි මුදලක් ලෙස මෙය සැලකේ.

සඳුදා ප්‍රකාශයට පත් කළ මෙම යෝජිත එකඟතාව සැන් ෆ්‍රැන්සිස්කෝ අගරදගුරු පදවියේ Chapter 11 බංකොලොත්භාව ආරක්ෂණ නඩුව සමඟ සම්බන්ධ වේ. 

2019දී සම්මත කළ කැලිෆෝනියා ප්‍රාන්ත සභා පනත් අංක 218 (California Assembly Bill 218) යටතේ ගොනු කළ සියලුම නඩු මෙම එකඟතාව මඟින් අවසන් කිරීමට නියමිතය. එම නීතිය මඟින් කාල සීමාව ඉක්මවා ඇති බැවින් පෙර ගොනු කළ නොහැකිව තිබූ දශක ගණනාවක් පැරණි සිවිල් නඩු නැවත ඉදිරිපත් කිරීම සඳහා තාවකාලික නීතිමය අවස්ථාවක් ලබාදී තිබුණි.

පැමිණිලිකරුවන්ගේ නීතිඥයින්ට අනුව, මෙම සමථයේ කොටසක් ලෙස අගරදගුරු සල්වටෝරේ ජේ. කෝර්ඩිලියෝන් (Salvatore J. Cordileone) විසින් සෑම වින්දිතයෙකුටම පෞද්ගලික සමාව අයැදීමේ ලිපියක් යැවිය යුතුය. එමෙන්ම, ළමා ආරක්ෂාව සහ විනිවිදභාවය ශක්තිමත් කිරීම සඳහා නව ප්‍රතිසංස්කරණ රැසක් ක්‍රියාත්මක කිරීමටද අගරදගුරු පදවිය බැඳී සිටී. ඒ අතර ලිංගික අපයෝජන චෝදනා එල්ල වූ පූජකයන්ගේ නාම ලේඛනයක් පවත්වාගෙන යාම සහ ප්‍රසිද්ධ කිරීම, වින්දිතයන් නිහඬ කරවන රහස්‍යතා ගිවිසුම් තහනම් කිරීම ඇතුළත් වේ.

අගරදගුරු කෝර්ඩිලියෝන් ඇදහිලිවන්තයන් වෙත යොමු කළ ලිපියක සඳහන් කළේ, “කිසිදු මූල්‍යමය වන්දියකට අතීතයේ සිදු වූ අපයෝජනයේ වේදනාකාරී උරුමය මකා දැමිය නොහැක” යන්නයි. එහෙත්, ජීවිත කාලය පුරාම එම වේදනාව දරාගෙන සිටි වින්දිතයන්ට සාධාරණ වන්දියක් ලබාදීම සඳහා මෙම යෝජනාව මඟක් සලසන බවද ඔහු ප්‍රකාශ කළේය.

“බොහෝ ලිංගික අපයෝජන චෝදනා දශක ගණනාවකට පෙර සිදුවූ සිදුවීම්වලට අදාළ වන අතර, චෝදනා එල්ල වූ බොහෝ පුද්ගලයන් මේ වන විට මියගොස් තිබේ හෝ පූජක සේවයෙන් ඉවත්ව ඇත. එහෙත් මෙම හානි සිදුවීමට ඉඩ ලබාදුන් අපගේ අසාර්ථකත්වය සම්බන්ධයෙන් අපි වගකීම භාර ගනිමු. එම අසාර්ථකත්වයන් හේතුවෙන් පීඩාවට පත් වූ සියලු දෙනාගෙන් මම අවංකව සමාව අයදිමි,” යනුවෙන් ඔහු ලියා තිබේ.

2023 අගෝස්තු මාසයේදී ළමා ලිංගික අපයෝජන සම්බන්ධ සිවිල් නඩු 500කට අධික සංඛ්‍යාවකට මුහුණ දීමෙන් අනතුරුව සැන් ෆ්‍රැන්සිස්කෝ අගරදගුරු පදවිය බංකොලොත්භාව ආරක්ෂණය සඳහා ඉල්ලුම් කළේය. වින්දිතයන්ගේ නියෝජිත කමිටුවක් මඟින් වන්දි මුදල් බෙදාහැරීමේ ක්‍රමවේදය සකස් කිරීමට නියමිත අතර, සෑම පැමිණිලිකරුවෙකුටම ස්වාධීන තක්සේරුකරුවෙකු වෙත තම අත්දැකීම ඉදිරිපත් කිරීමේ අවස්ථාව හිමිවනු ඇත.

සැන් ෆ්‍රැන්සිස්කෝ, සැන් මැටියෝ සහ මැරින් ප්‍රාන්තවල කතෝලිකයන් 442,000කට පමණ ආගමික සේවය සපයන මෙම අගරදගුරු පදවිය ප්‍රකාශ කළේ, පල්ලි, පාසල් සහ ඊට අනුබද්ධ ආයතන මෙම වන්දි මුදල සඳහා තම අරමුදල් සහ සීමාවන් නොමැති වත්කම්වලින් දායක විය යුතු බවයි. කෙසේ වෙතත්, පරිත්‍යාගශීලීන් විසින් නිශ්චිත අරමුණු සඳහා ලබාදුන් පරිත්‍යාග හෝ වාර්ෂික ආධාර අරමුදල් මෙම වන්දි ගෙවීම සඳහා භාවිත නොකරන බවද එහි සඳහන් වේ.

සැන් ෆ්‍රැන්සිස්කෝ නඩුව, අතීතයේ සිදු වූ ළමා ලිංගික අපයෝජන සිද්ධීන් සම්බන්ධ නීතිමය කාලසීමාවන් නැවත විවෘත කළ ප්‍රාන්ත නීති හේතුවෙන්, ඇමෙරිකාව පුරා කතෝලික ධර්මපදවිවල සිදුවන විශාල වන්දි ගෙවීම් සහ බංකොලොත්භාව ආරක්ෂණ ඉල්ලීම් මාලාවේ නවතම අවස්ථාව වේ.

මෙම වසරේ මුල් භාගයේදී බෘක්ලින් ධර්මපදවිය (Diocese of Brooklyn) ද 1960 සහ 1970 දශකවලට අයත් බොහෝ සිද්ධීන් ඇතුළුව ළමා ලිංගික අපයෝජන චෝදනා 1,100කට ආසන්න සංඛ්‍යාවක් සමථයකට පත් කිරීමට උත්සාහ කරන බව ප්‍රකාශ කළේය.

එසේම, 2024 ඔක්තෝබර් මාසයේදී ලොස් ඇන්ජලීස් කතෝලික අගරදගුරු පදවිය (Archdiocese of Los Angeles) ළමා ලිංගික අපයෝජන චෝදනා 1,353ක් සමථයකට පත් කිරීම සඳහා ඇමෙරිකානු ඩොලර් මිලියන 880ක් ගෙවීමට එකඟ වූ අතර, එය කතෝලික අගරදගුරු පදවියක් සම්බන්ධයෙන් මෙතෙක් වාර්තා වූ විශාලතම තනි වන්දි එකඟතාව ලෙස සැලකේ.

තවද, 2023දී බැල්ටිමෝර් කතෝලික අගරදගුරු පදවිය (Archdiocese of Baltimore) ද ළමා ලිංගික අපයෝජන නඩු සඳහා පනවා තිබූ නීතිමය කාල සීමාව ඉවත් කළ මේරිලන්ඩ් ප්‍රාන්ත නීතිය සම්මත කිරීමෙන් පසුව Chapter 11 බංකොලොත්භාව ආරක්ෂණය සඳහා ඉල්ලුම් කළේය.