සෝමවංශ අමරසිංහ මහතාගේ 10 වන ගුණානුස්මරණය වෙනුවෙන් විශේෂ වැඩසටහනක් හෙට සවස 3.30ට ඇන්.ඇම්. පෙරේරා කේන්ද්‍රයේදී...

Jun 22, 2026 at 05:39 AM

|

Lanka Leader

ජනතා විමුක්ති පෙරමුණේ (ජවිපෙ) හිටපු නායකයෙකු මෙන්ම ශ්‍රී ලංකා දේශපාලන ඉතිහාසයේ සුවිශේෂී සලකුණක් තැබූ සෝමවංශ අමරසිංහ මහතා අභාවප්‍රාප්ත වී වසර 10ක් සපිරීම නිමිත්තෙන් විශේෂ ගුණසමරු සහ පින්කම් වැඩසටහනක් දෙවන පරපුර දේශපාලන පක්ෂය විසින් සංවිධානය කර තිබේ.

මෙම විශේෂ සැමරුම් සහ දේශන වැඩසටහන ජූනි 23 වන දා සවස 3.30 ට ඇන්.ඇම්. පෙරේරා කේන්ද්‍රයේදී පැවැත්වීමට කටයුතු යොදා ඇති බව සංවිධායක මණ්ඩලය නිවේදනය කරයි. 

මෙවර ගුණසමරුව පැවැත්වෙන්නේ “බෙදුම්වාදයට එරෙහි ජවිපයේ භූමිකාව – එදා සහ අද” යන තේමාව යටතේය.

1988–89 භීෂණ වකවානුවෙන් පසුව දැඩි මර්දනයකට සහ විනාශයකට ලක්ව තිබූ ජනතා විමුක්ති පෙරමුණ, නැවත මෙරට ප්‍රධාන පෙළේ දේශපාලන බලවේගයක් ලෙස ගොඩනැගීමෙහිලා සෝමවංශ අමරසිංහ මහතා ඉටුකළ මෙහෙවර දේශපාලන ඉතිහාසයේ කැපී පෙනෙන පරිච්ඡේදයකි. ඔහුගේ අභියෝගාත්මක නායකත්වය සහ කැපවීම හේතුවෙන් 1994 වසරේදී ජවිපෙට නැවතත් මෙරට ප්‍රජාතන්ත්‍රවාදී දේශපාලන ප්‍රවාහයට අවතීර්ණ වීමට අවස්ථාව උදා විය.

එමෙන්ම රටේ ඒකීයභාවය සහ භෞමික අඛණ්ඩතාව ආරක්ෂා කිරීම වෙනුවෙන්, බෙදුම්වාදී එල්.ටී.ටී.ඊ. ත්‍රස්තවාදයට එරෙහිව දැවැන්ත ජනමතයක් හා ජාතික බලවේග ඒකරාශී කිරීමටද ඒ මහතා පෙරමුණ ගෙන ක්‍රියා කළේය.

මෙම ගුණසමරු වැඩසටහනේදී සෝමවංශ අමරසිංහ මහතාගේ දේශපාලන ජීවිතය, ජාතික ප්‍රශ්න සම්බන්ධයෙන් ඔහු දැරූ ස්ථාවරයන්, බෙදුම්වාදයට එරෙහි අරගලයේදී ජවිපෙ ඉටුකළ භූමිකාව සහ වර්තමාන දේශපාලන අභියෝග හමුවේ එම අත්දැකීම්වල වැදගත්කම පිළිබඳව දේශන සහ සාකච්ඡා කිහිපයක් පැවැත්වීමට නියමිතය.

මීට සමගාමීව ඒ මහතාට පින් පැමිණවීම සඳහා ආගමික වතාවත් ද සංවිධානය කර ඇත. මෙම අවස්ථාව සඳහා දේශපාලන ක්‍රියාකාරීන්, බුද්ධිමතුන්, සිවිල් සංවිධාන නියෝජිතයන් ඇතුළු විශාල පිරිසක් සහභාගී වීමට නියමිත බව සංවිධායක මණ්ඩලය වැඩිදුරටත් සඳහන් කරයි.