ආණ්ඩුවට බැරි බෙදුම්වාදය පරාජය කිරීමේ වගකීම බාරගන්න අපි සූදානම්.. - 'රණවිරු ජනපවුර' ආණ්ඩුවට කියයි..

Jun 13, 2026 at 03:22 PM

|

Lanka Leader

පසුගිය වසර 30ක යුද්ධයේදී සන්නද්ධ හමුදාවන් සිය වගකීම 100%ක්ම ඉටු කරමින් රට දෙකකට බෙදීමේ තර්ජනයෙන් මුදාගත් බවත්, එලෙස දිනාගත් යුද ජයග්‍රහණය ඉදිරියට පවත්වාගෙන යාම සඳහා බෙදුම්වාදී මතවාද පරාජය කිරීමේ වගකීම බාර ගැනීමට විශ්‍රාමික රණවිරුවන් කිසිසේත් පසුබට නොවන බවත් "රණවිරු ජනපවුර" සංවිධානය අවධාරණය කරයි. 

"රණවිරු ජනපවුර" සංවිධානයේ කැඳවුම්කරු බන්දු අතුකෝරල මහතා ඇතුළු මෙහෙයුම් කමිටු සාමාජිකයින් විසින් කැඳවා තිබූ විශේෂ මාධ්‍ය සාකච්ඡාවකදී ඔවුහු මේ බව ප්‍රකාශ කළහ.

මෙහිදී අදහස් දැක්වූ කැඳවුම්කරු බන්දු අතුකෝරල මහතා සඳහන් කළේ, ත්‍රස්තවාදය වැළැක්වීමේ පනතට (PTA) එරෙහිව විශාල විරෝධයක් දැක්වූ දේශපාලන ව්‍යාපාරයක් නියෝජනය කරන වත්මන් රජය, අද එම පනතම උපයෝගී කරගනිමින් මේජර් ජෙනරල් සුරේෂ් සලේ මහතා අපරාධ පරීක්ෂණ දෙපාර්තමේන්තුව (CID) මඟින් අත්අඩංගුවට ගෙන රඳවා තබා ගැනීම සිය දේශපාලන ප්‍රතිපත්තිය පසෙක තැබීමක් බවයි. 

තිස් අවුරුදු යුද්ධයේදී සුවිශේෂී කාර්යභාරයක් ඉටු කළ නිලධාරියකු වන සලේ මහතා සහ ඔහුගේ පවුලේ සාමාජිකයින් අනවශ්‍ය පීඩනයකට ලක් කර ඇති බවට චෝදනා කරන අතර, මේ සම්බන්ධයෙන් වෛද්‍ය මණ්ඩල වාර්තාවක් කැඳවීමට අධිකරණය ගෙන ඇති තීරණය තමන් අගය කරන බවද හෙතෙම පැවසීය.

2019 වසරේ සිදුවූ පාස්කු ඉරිදා බෝම්බ ප්‍රහාරය ඉතා නින්දිත, තිරිසන් ක්‍රියාවක් බවත්, මඩකලපුව, කටුවපිටිය, කොටහේන ඇතුළු ප්‍රදේශවල ඉන් බැටකෑ කතෝලික, මුස්ලිම් සහ සිංහල සමස්ත ජනතාවටම සාධාරණය ඉටු විය යුතු බවත් රණවිරු සංවිධානය මෙහිදී අවධාරණය කළේය. 

ඒ සඳහා සම්බන්ධ වූ ඕනෑම තරාතිරමක පුද්ගලයකුට එරෙහිව නීතිය නිසියාකාරව ක්‍රියාත්මක විය යුතු වුවද, CID අධ්‍යක්ෂ ධූරයේ කටයුතු කරන ශානි අබේසේකර මහතා වැනි නිලධාරීන්ගේ දේශපාලන ක්‍රියාකාරීත්වය හේතුවෙන් වත්මන් පරීක්ෂණවල ස්වාධීනත්වය පිළිබඳව සමාජය තුළ සාධාරණ සැකයක් මතු වන බව ද අතුකෝරල මහතා පෙන්වා දුන්නේය.

සවිස්තරාත්මක වීඩියෝව නරඹන්න..