කුවේට් රාජ්‍යයෙන් ගෘහ සේවක බඳවා ගැනීම් රටවල් 10කට පමණක් සීමා කරයි.. ශ්‍රී ලංකාව ද ඒ අතරට

Jun 11, 2026 at 11:41 AM

|

Lanka Leader

කුවේට් රාජ්‍යය විසින් එරටට ගෘහස්ථ මෙහෙකාර සේවක සේවිකාවන් (Domestic workers) බඳවා ගනු ලබන විදේශීය රටවල් සංඛ්‍යාව 10ක් දක්වා සීමා කිරීමට පියවර ගෙන ඇති බව ගල්ෆ් නිව්ස් පුවත් සේවය වාර්තා කරයි.

කුවේට් ස්වදේශ කටයුතු අමාත්‍යාංශය (Ministry of Interior) සහ පොදු මානව බල අධිකාරිය (Public Authority for Manpower) එක්ව ගනු ලැබූ මෙම නව තීරණයට අනුව, මින් ඉදිරියට කුවේට් රාජ්‍යය සඳහා මෙහෙකාර සේවකයන් බඳවා ගැනීමට අවසර හිමිවන්නේ පහත සඳහන් රටවල් 10න් පමණි:

1. ශ්‍රී ලංකාව (Sri Lanka)

2. පිලිපීනය (Philippines)

3. ඉන්දියාව (India)

4. නේපාලය (Nepal)

5. බංග්ලාදේශය (Bangladesh)

6. වියට්නාමය (Vietnam)

7. ඉතියෝපියාව (Ethiopia)

8. සියෙරා ලියෝන් (Sierra Leone)

9. නයිජර් (Niger)

10. ටැන්සානියාව (Tanzania)

කුවේට් බලධාරීන් පෙන්වා දෙන්නේ එරට ගෘහස්ථ ශ්‍රම වෙළඳපොළ වඩාත් විධිමත් කිරීම, ශ්‍රමිකයන් සැපයීමේ ක්‍රියාවලිය විනිවිදභාවයකින් යුතුව පවත්වාගෙන යාම සහ දෙපාර්ශවයේම අයිතිවාසිකම් සුරක්ෂිත කිරීම වෙනුවෙන් මෙම සීමා කිරීම් පැනවූ බවයි.

මීට අමතරව, මෙතෙක් කුවේට් රාජ්‍යය සමඟ මෙහෙකාර ශ්‍රමික ගිවිසුම්වලට එළඹ නොමැති වෙනත් කිසිදු නව රටකින් ශ්‍රමිකයන් බඳවා ගැනීම සඳහා බලපත්‍ර (Recruitment licenses) නිකුත් නොකිරීමට ද එරට රජය තීරණය කර තිබේ.

මෙම නව රෙගුලාසි හේතුවෙන් කුවේට් රාජ්‍යයේ ගෘහස්ථ සේවක හිඟයක් ඇතිවීම වැළැක්වීම සඳහා, දැනටමත් අනුමත කර ඇති මෙම රටවල් 10 සමඟ පවතින ද්විපාර්ශවීය සබඳතා සහ ගිවිසුම් තවදුරටත් ශක්තිමත් කිරීමට කුවේට් විදේශ කටයුතු අමාත්‍යාංශය කටයුතු කරමින් සිටින බව ද ගල්ෆ් මාධ්‍ය වාර්තා වැඩිදුරටත් සඳහන් කරයි.