ඩොලරය වැඩිවීම හා බද්ද නිසා වාහන මිල විශාල ලෙස ඉහළයාමේ අවදානමක්..

May 15, 2026 at 03:47 PM

|

Lanka Leader

වාහන මත පනවා ඇති නව බදු සංශෝධන සහ ඇමරිකානු ඩොලරයට සාපේක්ෂව රුපියල ශීඝ්‍රයෙන් අවප්‍රමාණය වීම හේතුවෙන් ඉදිරියේදී මෙරට වාහන මිල විශාල ලෙස ඉහළ යනු ඇති බව වාහන ආනයනකරුවන් අනතුරු අඟවයි.

පවතින තත්ත්වය මත වාහනයක් ආනයනය කිරීමේ පිරිවැය 110% කින් පමණ ඉහළ ගොස් ඇති බව වාහන ආනයනකරුවන්ගේ සංගමයේ ඉන්දික සම්පත් මෙරෙන්චිගේ මහතා සඳහන් කරයි.

මූලාශ්‍ර වලට අනුව, මෑතකදී රුපියලට සාපේක්ෂව ඩොලරයේ අගය රුපියල් 300 සිට 330 දක්වා පමණ ඉහළ යාම සහ නව බදු ගණනය කිරීම්වල වෙනස්කම් මෙම මිල ඉහළ යාමට ප්‍රධාන හේතු වී තිබේ.

මේ හේතුවෙන් ඉදිරි සති කිහිපය තුළ වෙළඳපොළට එන වාහනවල මිල ගණන් පහත පරිදි ඉහළ යා හැකි බව ඔහු පෙන්වා දෙයි.

• Honda Vezel: මිල රුපියල් ලක්ෂ 12කින් පමණ ඉහළ යනු ඇත.
• Toyota Raize: රුපියල් ලක්ෂ 7ත් 10ත් අතර ප්‍රමාණයකින් මිල ඉහළ යාමට නියමිතය.
• Toyota Yaris: මිල රුපියල් ලක්ෂ 4ත් 5ත් අතර අගයකින් වැඩි වනු ඇත.
• Land Cruiser Jeep: බදු මුදල පමණක් ලක්ෂ 18කින් වැඩි වන අතර, මුළු මිල රුපියල් ලක්ෂ 30කින් පමණ ඉහළ යනු ඇතැයි ගණන් බලා තිබේ.
• Toyota Prado 250: රුපියල් ලක්ෂ 600ක්ව පැවති මිල රුපියල් ලක්ෂ 635 - 640 දක්වා ඉහළ යාමට නියමිතය.

මෙම තත්ත්වය හමුවේ අලුතින් වාහනයක් ආනයනය කිරීමට වඩා දැනට වෙළඳපොළේ පවතින වාහනයක් මිලදී ගැනීම පාරිභෝගිකයාට වාසිදායක වන බවයි මෙරෙන්චිගේ මහතා පවසන්නේ.

ලෝක වෙළඳපොළේ බොරතෙල් මිල ඉහළ යාම, ගෝලීය යුදමය වාතාවරණය සහ විදේශ ප්‍රේෂණ ලැබීම සීමා වීම වැනි කරුණු ද මෙම ආර්ථික පීඩනයට බලපා ඇති බව පෙන්වා දෙන ඔහු, ඉදිරි සති දෙක තුන තුළ වාහන මිල තවදුරටත් ඉහළ යා හැකි බව අවධාරණය කරයි.