බෝයිං ගුවන් යානා 200ක් චීනය ඇණවුම් කරන බව ට්‍රම්ප් පැවසීමෙන් පසු සමාගමේ කොටස් මිල 4%කින් පහළට..

May 15, 2026 at 10:07 AM

|

Lanka Leader

චීනය බෝයිං සමාගමෙන් ගුවන් යානා 200ක් මිලදී ගැනීමට එකඟ වූ බව අමෙරිකානු ජනාධිපති ඩොනල්ඩ් ට්‍රම්ප් ෆොක්ස් නිවුස් (Fox News) නාලිකාවට පැවසූ අතර, එම සංඛ්‍යාව විශ්ලේෂකයින් අපේක්ෂා කළ ප්‍රමාණයට වඩා බෙහෙවින් අඩු වීම හේතුවෙන් සමාගමේ කොටස් අගය පහත වැටී තිබේ.

මෙම ගනුදෙනුවට අදාළ විස්තර, එනම් ලබාදෙන ගුවන් යානා වර්ගය හෝ ඒවා ලබාදෙන කාලසීමාව පිළිබඳව තොරතුරු අනාවරණය නොවූ නමුත්, එම ප්‍රමාණය රොයිටර් පුවත් සේවය මීට පෙර වාර්තා කර තිබූ යානා 500ක පමණ එකඟතාවයට වඩා බෙහෙවින් අඩු අගයකි.

"ඔහු අද එකඟ වූ එක දෙයක් තමයි, ගුවන් යානා 200ක් ඇණවුම් කරනවා... විශාල යානා 200ක්," යනුවෙන් ජනපති ට්‍රම්ප් ෂී ජින්පිං ජනපතිවරයා ගැන සඳහන් කරමින් ෆොක්ස් නිවුස් නාලිකාවට පවසා සිටියි.

ඊයේ (14) වෙළෙඳපොළ ගනුදෙනු අතරතුර බෝයිං කොටස් අගය සියයට 4.1කින් පහත වැටි තිබේ.

බෝයිං සමාගමට ලැබෙන මහා පරිමාණ ඇණවුම, මෙම සුවිශේෂී සමුළුවෙන් අපේක්ෂා කළ බොහෝ ව්‍යාපාරික ගනුදෙනුවලින් එකක් වූ අතර, පසුගිය ඔක්තෝබර් මාසයේදී දෙරට අතර ඇති කරගත් තාවකාලික වෙළෙඳ එකඟතාව තවදුරටත් ඉදිරියට ගෙන යාමක් ලෙසද සැලකිණි.

වෝල් ස්ට්‍රීට් (Wall Street) කොටස් වෙළෙඳපොළ මෙයට දැක්වූ ප්‍රතිචාරය පිළිබඳව අදහස් දැක්වීම ධවල මන්දිරය විසින් ප්‍රතික්ෂේප කර තිබේ.

සාකච්ඡාවලට සමීප ආරංචි මාර්ග සඳහන් කරන්නේ, බෝයිං 737 මැක්ස් (737 MAX) වර්ගයේ ගුවන් යානා 500ක් සහ තවත් අධික මිලෙන් යුත් පුළුල් බඳක් සහිත ගුවන් යානා කිහිපයක් ලබාගැනීම පිළිබඳව මීට පෙර අවධානය යොමු වී තිබූ බවයි.

මීට සමාන ප්‍රමාණයේ ගනුදෙනුවක් සඳහා චීනය යුරෝපයේ එයාර්බස් සමාගම සමඟ ද සාකච්ඡා පවත්වා ඇති බව වාර්තා වේ.

-රොයිටර්ස්-