ඇමරිකාව විසින් ගල්ෆ් රාජ්‍යයන් පාවා දී ඇති බව පැහැදිලියි- වෝල් ස්ට්‍රීට් ජර්නලය

May 7, 2026 at 08:06 AM

|

Lanka Leader

ඩුබායි රාජ්‍යය කේන්ද්‍ර කරගත් විශේෂඥයින් පිරිසක් වෝල් ස්ට්‍රීට් ජර්නලය වෙත පැවසුවේ එක්සත් අරාබි එමීර් රාජ්‍යයේ තිබෙන ඇමරිකානු කඳවුරු තවදුරටත් ආරක්ෂාව සහතික කිරීමේ සාධකයක් නොවන බවයි. තස්නිම් ප්‍රවෘත්ති ඒජන්සියේ ජාත්‍යන්තර කණ්ඩායමට අනුව, වෝල් ස්ට්‍රීට් ජර්නලය පල කළ ලිපියකින් අවධාරණය  කළේ අරාබි රටවල්, විශේෂයෙන් එක්සත් අරාබි එමීර් රාජ්‍යය, දින දෙකකට පෙර එල්ල කළ ප්‍රහාරවලට එක්සත් ජනපද රජයෙන් ප්‍රතිචාරයක් නොදැක්වූ නිසා දැඩි ලෙස කලකිරීමට පත්ව ඇති බවයි.

කෙසේ වුවද තම වාර්තාවේ, වෝල් ස්ට්‍රීට් ජර්නලය ඩුබායි සහ සාජා වෙත එල්ල වූ ප්‍රහාර ඉරානයට බැර කළ අතර එමිරාටි නිලධාරීන් ද එය අනුමත කළ  නමුත් ඉරාන නිලධාරීන් මෙම චෝදනාව ප්‍රතික්ෂේප කරනු ලැබීය.

වෝල් ස්ට්‍රීට් ජර්නල වාර්තාවේ මෙසේද සඳහන් වේ. “මැද පෙරදිග කළාපයේ සිටින ඇමරිකාවේ ප්‍රධාන හවුල්කරුවෙකු වන එක්සත් අරාබි එමීර් රාජ්‍යයට ඉරානය මිසයිල සහ ඩ්‍රෝන් ප්‍රහාර රැළි තුනක් දියත් කිරීමෙන් පසුව ප්‍රතිචාර නොදැක්වීමට එක්සත් ජනපද ජනාධිපතිවරයා තීරණය කරනු ලැබීය. ඔහු විසින්ම මැදිහත් වූ සටන් විරාමයෙන් මාසයකට ආසන්න කාලයකට පසුව එක්සත් ජනපද ජනාධිපතිවරයා මෙලෙස ප්‍රතිචාර දැක්වීය.”

වෝල් ස්ට්‍රීට් ජර්නල වාර්තාවට අනුව, ට්‍රම්ප් යුද්ධයෙන් ඉවත් වීමට අදහස් කරනු ලබයි. ඒ අනුව ඔහු එක්සත් ජනපද කලාපීය සහචරයින්ට එරෙහිව අලුත් කරන ලද ඉරාන ප්‍රහාර නොසලකා හරිමින් සිටියි. ඒ අනුව, ටෙහෙරානයෙන් එල්ල වන පීඩනය තවදුරටත් උත්සන්න වීමෙන් අමෙරිකා එක්සත් ජනපදයෙන් ප්‍රතිලාභ ලබන ගල්ෆ් රාජ්‍යයන් කනස්සල්ලට පත්ව සිටිති.

වෝල් ස්ට්‍රීට් ජර්නලය තවදුරටත් අවධාරණය කළේ යුරෝපීය සහ ආසියානු රටවල් - එක්සත් ජනපද සහචරයින් සහ උපායමාර්ගික ප්‍රතිවාදීන් - තත්ත්වය සමීපව නිරීක්ෂණය කරන බවයි.

වාර්තාව තවදුරටත් මෙසේද පැවසීය: “පසුගිය පෙබරවාරි 28 වන දින යුද්ධය ආරම්භ වූ දා සිට, ඉරාන නිලධාරීන් බලයෙන් පහ කරන ලද ඊජිප්තු ජනාධිපති හොස්නි මුබාරක්ට ආරෝපණය කරන ලද වාක්‍ය ඛණ්ඩයක් නැවත නැවතත් පුනරුච්චාරණය කර ඇත. එනම්, ‘ඇමරිකාව මත සම්පූර්ණයෙන්ම යැපෙන පුද්ගලයින් සැබවින්ම නිරාවරණය වන අතර අනාරක්ෂිත ය-Those Who Wrap Themselves in America Are Naked.’ යන වාක්‍ය ඛන්ඩයයි. පසුගිය 4 වනදා ඉරානය මිසයිල සහ ඩ්‍රෝන් ප්‍රහාර නැවත ආරම්භ කිරීමෙන් පසු එක්සත් අරාබි එමීර් රාජ්‍යයේ සහ අනෙකුත් ගල්ෆ් රාජාණ්ඩුවල දැන් ගොඩනැගී ඇති හැඟීම නම් මුබාරක් නිවැරදි වන්නට ඇති බවයි.”

ට්‍රම්ප් 4 වනදා එල්ල වූ ප්‍රහාර “සුළු” ලෙස විස්තර කළ බව වෝල් ස්ට්‍රීට් ජර්නලය වාර්තා කළේ, ප්‍රහාරය ගුවන් ගමන් වලට බාධා කළ අතර සතියේ ඉතිරි කාලය සඳහා පාසල් වසා දැමීමට එක්සත් අරාබි එමීර් රාජ්‍ය රජයට බල කළ බවයි. එක්සත් ජනපද ආරක්ෂක ලේකම් පීට් හෙග්සෙට් 5 වනදා පැවසුවේ වොෂින්ටනයේ දෘෂ්ටිකෝණයෙන් “සටන් විරාමය නිසැකවම ක්‍රියාත්මකයි” කියාය.

"ඉරානය සටන් විරාමය බිඳ දැමීමට සූදානම් බව පෙනේ, නමුත් එක්සත් ජනපදය එසේ කිරීමට සූදානම් නැත, එබැවින් දැන් එය ඒකපාර්ශ්වික සටන් විරාමයක්" යැයි ඩුබායි පදනම් කරගත් පර්යේෂණ ආයතනයක් වන ඕ'රෝර්ක් සංවිධානයේ මැද පෙරදිග සාමාජිකයෙකු වන මෙහ්ඩි ගෝලම් පැවසීය.

ඉරාන යුද්ධය එක්සත් අරාබි එමීර් රාජ්‍යයේ ඩිජිටල් ආර්ථිකය අළු බවට පත් කරමින් එක්සත් අරාබි එමීර් රාජ්‍යයේ කොටස් වෙළඳපොළ ඩොලර් බිලියන 120 ක අලාභයක් ලබා ඇති අතර වෙනත් ව්‍යාපාර වල දේපල වෙන්දේසි කරන තත්වයට ඇද වැටී ඇතැයි ආර්ථික විශේෂඥයෝ පවසති.

චින්තන කේන්ද්‍රයක් වන ගල්ෆ් ජාත්‍යන්තර සංසදයේ අධ්‍යක්ෂ ඩැනී සාෆර් වෝල් ස්ට්‍රීට් ජර්නලයට මෙසේ පැවසීය: පෙබරවාරි මාසයේ සිට මිසයිල සහ ඩ්‍රෝන යානා 2,838 ක ඉලක්ක වලට ලක් වූ එක්සත් අරාබි එමීර් රාජ්‍යය සහ අනෙකුත් ගල්ෆ් රාජ්‍යයන් ඉරානයට පහර දීමට ගත් තීරණය නිසා නැවත වටයකින් ඉරානයේ ප්‍රහාරයට ලක්ව ඇත.

සාෆර් වැඩිදුරටත් මෙසේද පැවසීය: "ගල්ෆ් රාජ්‍යයන්ගේ දෘෂ්ටිකෝණයෙන් බලන විට ඇමරිකාව ඔවුන්ගේ ආරක්ෂාවට ප්‍රමුඛත්වය නොදෙන අතර ඔවුන් අතහැර දමා ඇති බව ඔවුනට හැඟී යයි. එලෙසම, ඇමරිකාව ප්‍රතිචාර නොදක්වන්නේ නම්, ඇමරිකාව නැවත යුද්ධයකට පිවිසීමට අකමැති බව ඉරානය සිතනු ඇති අතර එය ඇමරිකාවේ බියවැද්දීමේ බලය දුර්වල කරනු ඇති."

වෝල් ස්ට්‍රීට් ජර්නලය තවදුරටත් මෙසේ පැවසීය: “යුරෝපයේ සහ ආසියාවේ එක්සත් ජනපද හිතකාමී රජයන්ගේ කනස්සල්ල නම්, ට්‍රම්ප් එක්සත් අරාබි එමීර් රාජ්‍යය සමඟ කළ ආකාරයටම, එවැනි ප්‍රවේශයකින් ඔහුට ප්‍රතිලාභ ලැබෙන්නේ නම්, රුසියාව, චීනය හෝ උතුරු කොරියාව විසින් ඔවුන්ගේ භූමියට එල්ල කරන ප්‍රහාර නොසලකා හැරිය හැකි බවට තහවුරු වන බවයි.”

වාර්තාව තවදුරටත් මෙසේ පැවසීය: “දිගු කාලීනව, මෙම ප්‍රවේශය ලොව පුරා එක්සත් ජනපද කඳවුරු සත්කාරක රටවලට ආරක්ෂක වත්කමක් ද නැතහොත් වගකීමක් සහ තර්ජනයක් ද යන ප්‍රශ්නය මතු කරයි.”

විශ්‍රාමික ගුවන් මාර්ෂල්වරයෙකු සහ බ්‍රිතාන්‍ය ආරක්ෂක අමාත්‍යාංශයේ හිටපු මෙහෙයුම් ප්‍රධානියෙකු වන එඩ්වඩ් ස්ට්‍රින්ගර් ද වෝල් ස්ට්‍රීට් ජර්නලයට මෙසේ පැවසීය: “ඔබ ඇමරිකානු පක්ෂපාතිත්වය මිලදී ගන්නා බව ඔබ සිතුවේ නම්, දැන් ඔබගේ නිගමනය, ඇමරිකානු කඳවුරක් කරන්නේ ඔබව ඉලක්කයක් බවට පත් කිරීම බවත්, ඇමරිකාව ඔබව තමන්ගේම අවශ්‍යතාවලට ගොදුරු කර ගැනීමට ඉඩ ඇති බවත්ය.”

වෝල් ස්ට්‍රීට් ජර්නලය එහි වාර්තාවේ තවත් කොටසක මෙසේ ලිවීය: “හෝමූස් සමුද්‍ර සන්ධිය අවහිර කිරීම මේ දක්වා,  දිගටම කරගෙන යාමෙන් කාලය තමන්ට පක්ෂව ක්‍රියා කරන බවත්, ට්‍රම්ප් පරිපාලනයට වැඩි වැඩියෙන් පීඩනයක් එල්ල කරන තරමට එය සහන ලබා දෙන බවත් ඉරානය විශ්වාස කරන බව පෙනේ.”