ට්‍රම්ප්ගේ "ඉරානය සමඟ සටන් විරාමය දින නියමයක් නොමැතිව දීර්ඝ කිරීම" යන්නෙන් අදහස් කරන්නේ කුමක්ද?

Apr 22, 2026 at 10:24 AM

|

Lanka Leader

ඩොනල්ඩ් ට්‍රම්ප් ඊයේ(21) සිය සමාජ මාධ්‍යයේ සටහනක් තබමින් නිවේදනය කළේ ඉරානය සමඟ පැවැති සාකච්ඡාවල ප්‍රතිඵල දැන ගන්නා තෙක් ඉරාන-අමෙරිකා සාකච්ඡා සඳහා මැදිහත් වී සිටින පාකිස්තානයේ ඉල්ලීම පරිදි ඉරානය සමඟ එළඹී තිබෙන සටන් විරාමය දින නියමයක් නොමැතිව දීර්ඝ කරන බවයි.

ඉරානයේ තස්නිම් පුවත් සේවය පවසා සිටියේ ඔවුන් වෙත ලැබෙන විවිධ තොරතුරු මූලාශ්‍රවලින් ලැබෙන තොරතුරුවලින් පෙනී යන්නේ ඉරානය සටන් විරාමය දීර්ඝ කිරීමක් ඉල්ලා නොමැති බවත්, ට්‍රම්ප් සටන් විරාමය දින නියමයක් නොමැතිව දීර්ඝ කරන බවට කළ නිවේදනයට අර්ථ කිහිපයක් තිබිය හැකි බවත්ය. ඒ අනුව එසේ තිබිය හැකි අර්ථ සම්බන්ධයෙන් විග්‍රහයක යෙදෙන ඉරාන තස්නිම් පුවත් සේවය පහත දැක්වෙන පරිදි ගොනු කර තිබේ.

1- ට්‍රම්ප් යුද්ධය පරාජය වී ඇත. යුද්ධය අතරතුර ට්‍රම්ප් ඔහු සතු සියලු  හැකියාවන් අවස්ථානූකූලව අත්හදා බලා ක්‍රියාත්මක කර තිබුණි. ඒ අනුව යුද්ධයෙන් තමාට කිසිවක් ලබා ගත නොහැකි බව ට්‍රම්ප් අවබෝධකර ගෙන සිටින අතර එබැවින් යුද්ධයෙන් ඉවත් වීම තමාට කළ හැකි හොඳම දෙය ලෙස ඔහු සලකයි. යම් හෙයකින් ඔහු අන්ධ ලෙස ගන්නා අඥාන තීරණයකින් යුද්ධය දිගටම කරගෙන ගියත්, ඔහුට කිසිවක් අත්කර ගත නොහැක.

2- යුද්ධයෙන් එක්සත් ජනපදයට කිසිදු ජයග්‍රහණයක් ලැබී නොතිබුණද, ට්‍රම්ප්ට හැකි සෑම ආකාරයකින්ම ලෝක ජනයා රැවටීම ඇතුළුව සෑම දෙයක්ම කළ හැකිය. එම රැවටීම්  අතර සටන් විරාමය දීර්ඝ කිරීම ද වේ. ට්‍රම්ප්ට සටන් විරාමය දීර්ඝ කරන බව ප්‍රකාශ කළ හැකි නමුත්, පසුව එක්සත් ජනපදයේ එම ත්‍රස්තවාදී පරිපාලනය හෝ එහි කලාපීය උමතු සුනඛයා වන ඊශ්‍රායලයට ත්‍රස්තවාදී ක්‍රියා සිදු කළ හැකිය.

තස්නිම් පුවත් සේවය වෙත ලැබුනු තොරතුරු විශ්ලේෂණයෙන් තහවුරු වන්නේ ඉරාන නිලධාරීන් එවැනි හැකියාවක් සමීපව නිරීක්ෂණය කරන බවත්  එවැනි අවස්ථාවක් අවතක්සේරු නොකරන බවත්ය.

3- එක්සත් ජනපදය යුද්ධයෙන් ඉවත් වන අතර ලෙබනනයේ සටන් විරාමය උල්ලංඝනය කිරීම දඩමීමා කරගෙන ඊශ්‍රායලය මෙම යුද්ධයේ කොටස්කරුවෙකු වන බවයි!

කෙසේ වෙතත්, ඉරානය ඇමරිකාවට මීට පෙර අනතුරු අඟවා තිබුණේ එක්සත් ජනපදයට ඒකපාර්ශ්විකව යුද්ධයෙන් පැන ගොස් ඊශ්‍රායලය සටනේ තබා ගත නොහැකි බවයි.

4- අඛණ්ඩ නාවික අවහිරයක් යනු සතුරුකම් දිගටම පැවතීමයි. ඉරානය අවම වශයෙන් නාවික අවහිරය පවතින තාක් කල් හෝමූස් සමුද්‍ර සන්ධිය විවෘත නොකරන අතර අවශ්‍ය නම් බලහත්කාරයෙන් අවහිරය බිඳ දමනු ඇත.

5 එක්සත් ජනපදය ඉරානය මත යුද්ධයේ සෙවනැල්ල තබා ගැනීමට සහ ඉරානයේ ආර්ථිකය සහ දේශපාලනය අත්හිටුවීමට උත්සාහ කරනු ලබයි. දින 12 ක යුද්ධයෙන් පසු ඉරානයේ තිබූ තත්වයට වත්මන් තත්වය සමාන බව එක්සත් ජනපදය විශ්වාස කරයි. කෙසේ වෙතත්, ඉරානයේ වත්මන් කාල පරිච්ඡේදය සහ දින 12ක යුද්ධයෙන් පසු තත්වය අතර මූලික වෙනසක් ඇත. ඒ ඉරානය හෝමූස් සමුද්‍ර සන්ධිය පාලනය කිරීමයි. ඇමරිකාවට යුද්ධයේ සෙවනැල්ල පවත්වා ගැනීමට අවශ්‍ය නම්, හෝමූස් සමුද්‍ර සන්ධිය සම්පූර්ණයෙන්ම වසා දමා ඇති බව අමෙරිකාව දැනගත යුතුය.