රුසියාවෙන් අඩු මිලට ඉන්ධන ලබාදීම ආණ්ඩුව ප්‍රතික්ෂේප කරන හේතුව වහා ජනතාවට හෙළිකරනු! - වෛද්‍ය වසන්ත බණ්ඩාර

Apr 22, 2026 at 09:35 AM

|

Lanka Leader

ලංකාවට අඩු මිලට ඛනිජ තෙල් සැපයීම සඳහා රුසියාවේ අමාත්‍යවරුන් දෙදෙනෙකු මෙරටට පැමිණ සාකච්ඡා කිරීම සිදුවූ බවත්, ආණ්ඩුව මේ වන විට ඒ සම්බන්ධයෙන් නිසි පියවර ගෙන නොමැති බව පැහැදිලි වන බවත් දේශ හිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර මහතා පවසයි.

ආණ්ඩුව මෙය කල් දමමින් මග හරිමින් ක්‍රියාත්මක නොකර සිටීමේ උත්සාහයක නිරතවී සිටින බවත් පවසන ඒ මහතා මෙයට හේතු ලෙස මහජන සංවාදය තුළ හේතු තුනක් දැකගත හැකි බවත් සඳහන් කරයි.

ඉන් එකක් වන්නේ රුසියාවෙන් අඩු මිලට තෙල් ලැබුනොත් රජයන් දෙකක් අතර ගනුදෙනුවක් ලෙස කොමිස් ගැසීමට, හොරකම් කිරීමට බැරිවීම බවත්, එනිසා හොරකම්වලට සම්බන්ධ පිරිස් මෙයට අකමැති බවත් වසන්ත බණ්ඩාර මහතා හෙළි කරයි.

ජාතික සංවිධාන එකමුතුව විසින් පැවැත්වූ ප්‍රවෘති සාකච්ඡාවක දී ඒ මහතා පවසන්නේ රුසියාවෙන් ඩීසල් ගතහොත් ඩොලර් 150ත් 160ත් අතර මිලකට බරලයක් ගත හැකි බවත්, එසේ තිබියදී ඉන්දියාවෙන් ඩීසල් බැරලයකට ඩොලර් 286ක් ගෙවා මිලදී ගෙන ඇති බවට  මේවන විට හෙළිදරව් වී ඇති බවත් ය. 

මෙම ක්‍රියාවලිය ඉදිරියට යනවිට ගල් අඟුරු වංචාවටත්, බැඳුම්කර වංචාවටත් වඩා එහා ගිය වංචාවක් බවට මෙය පත්වන බවත් ඒ මහතා සඳහන් කරයි.

මෙම දූෂිතයන් කිහිප දෙනෙකුගේ උවමනාව මත ජනතාවට විශාල බරක් දැරීමට සිදුවන බවත් පැහැදිලි කරන ඒ මහතා, එම දූෂිතයන් ගැන ඉදිරියේදී හෙළිදරව් කිරීම සිදුකළ යුතුව ඇති බවත් සඳහන් කරයි.

රුසියාවෙන් ලාබෙට තෙල් ලබාදෙන විට එපා කියන දෙවෙනි කාරණය වන්නේ භාණ්ඩාගාරයේ සහ මහ බැංකුවේ සිටින යම් යම් නිලධාරීන් ජාත්‍යන්තර ණය දෙන ආයතවල ඒජන්තයින් ලෙස කටයුතු කරමින් මෙයට එරෙහි වීම බවත් වසන්ත බණ්ඩාර මහතා පෙන්වා දෙයි.

රුසියාව මීට පෙර 2016 දී ශ්‍රී ලංකාව සහ රුසියාව අතර අන්තර් ආණ්ඩු සහයෝගීතා කොමිසමක් පිහිටුවා ඉතා සහන පොලියට දීර්ඝකාලීනව භාවිත කළ හැකි ලෙස යූරෝ මිලියන 500ක ණයක් මෙරටට ලබාදුන් බවත්,  එහෙත් ඉන් එක යූරෝවක්වත් මෙම භාණ්ඩාගාර නිලධාරීන් වියදම් නොකළ බවත් වසන්ත බණ්ඩාර මහතා මෙහිදී හෙළිකළේය.

මෙවරත් යම් ආර්ථික ඝාතක නිලධාරීන් පිරිසක් මෙයට අකුල් හෙලන බවට මතයක් ඇති බවත් ඒ මහතා සඳහන් කරයි.

තුන්වන කාරණය වන්නේ ආණ්ඩුවේ නායකයන් ඉන්දියාවටත් අමෙරිකාවටත් ඇති බිය නිසා මෙයට එකඟ නොවන බව යැයි පෙනෙන්නට ඇති බවත්, මහා ජනවරමක් ලබා දී පත්කරගත් ජනාධිපතිවරයා ගරු කරන්නේ ජනතා පරමාධිපත්‍යට ද නැතිනම් ඉන්දියාවේ සහ අමෙරිකාවේ යටත් කිරීම් වලට දැයි ප්‍රශ්නයක් ඇති බවත් ඒ මහතා සඳහන් කරයි. 

මෙය ආණ්ඩුවටත් සියදිවි නසාගැනීමේ ක්‍රියාවලියක් බවට පත්වන බවත් පෙන්වා දෙන ඒ මහතා ඛනිජ තෙල් අර්බුදය නිසා ජීවන මිල වැඩිවී ආර්ථිකය කඩා වැටී ආණ්ඩුවට විශාල වන්දියක් ගෙවීමට සිදුවන බවත් සඳහන් කරයි.

රුසියානු අමාත්‍යවරුන් දෙදෙනෙකු පැමිණ අඩු මිලට ඉන්ධන ලබාදීම ආණ්ඩුව විසින් ප්‍රතික්ෂේප කරන හේතුව වහා ජනතාවට හෙළිකළ යුතු බව ඒ මහතා මෙහිදී වැඩිදුරටත් සඳහන් කළේය.