ශ්‍රී ලංකාවේ ඩොලර් බිලියන 120ක කෝබෝල්ට් නිධියට ඉන්දියාව අත දමයි..

Apr 17, 2026 at 05:25 AM

|

Lanka Leader

ඉන්දියන් සාගරය කේන්ද්‍ර කරගනිමින් ශ්‍රී ලංකාවට හිමිවීමට තිබූ ඩොලර් බිලියන 120කට වඩා අධික වටිනාකමකින් යුත් සාගර සම්පත් අයිතිය සම්බන්ධයෙන් මේ වන විට අර්බුදයක් නිර්මාණය වී තිබේ. හම්බන්තොට වෙරළ තීරයේ සිට දකුණු දෙසින් පිහිටි මොහොද සීමාවට අයත් 'ඇෆනාසේ නිකිටින්' (Afanasy Nikitin) නම් මුහුදු පතුලේ පිහිටි කන්ද ආශ්‍රිතව පවතින අති විශාල සම්පත් අයිතිය ශ්‍රී ලංකාවට අහිමි වීමේ අවදානමක් මේ හේතුවෙන් මතුව ඇත.

එක්සත් ජාතීන්ගේ සාගර නීතිය පිළිබඳ සම්මුතියට අනුව, කිසිවෙකුටත් හිමිකම් නොමැති කලාපයක සාගර සම්පත් අයිතිය විද්‍යාත්මක පදනමක් මත ලබා ගැනීම සඳහා ශ්‍රී ලංකාව විසින් 2009 මැයි 08 වන දින නිව්යෝර්ක් නුවරදී විශේෂ කෙටුම්පතක් ඉදිරිපත් කරන ලදී.

එමගින් නාවික සැතපුම් 800ක් පමණ දුරින් පිහිටි බෙංගාල බොක්ක ආශ්‍රිත සාගර කලාපයේ සම්පත් අයිතිය ශ්‍රී ලංකාව ඉල්ලා තිබුණි.

මෙම ප්‍රදේශයේ සාගර පත්ලේ මීටර් 3000ක් පමණ ගැඹුරින් පිහිටි ඇෆනාසේ නිකිටින් කන්ද මත කෝබෝල්ට් නැමති වටිනා රසායනික මූලද්‍රව්‍යය අඩංගු බව සොයාගෙන ඇත.

නවීන ලෝකයේ බැටරි නිෂ්පාදනයට, ජංගම දුරකථන, ලැප්ටොප් පරිගණක සහ විද්‍යුත් වාහන නිෂ්පාදනයට අත්‍යවශ්‍ය මූලද්‍රව්‍යයක් වන මෙහි වටිනාකම ඩොලර් බිලියන 120ක් ලෙස ඇස්තමේන්තු කර තිබේ. උසස් තාක්ෂණය භාවිත කළහොත් මෙහි වටිනාකම ඩොලර් ට්‍රිලියනයක් දක්වා ඉහළ යා හැකි බවද පැවසේ.

මෙම ඉල්ලීම සම්බන්ධයෙන් 2018 වසරේදී පත් කළ විශේෂ කමිටුව වසර හයක් තිස්සේ විමර්ශනය කළ අතර, 2022 වසර අවසානයේදී ඒ සඳහා ශ්‍රී ලංකාවට අනුමැතිය ලැබීමට නියමිතව තිබුණි.

කෙසේ වෙතත්, 2022 වසරේදී ශ්‍රී ලංකාව ආර්ථික අර්බුදයක සිටි සමයේ ඩොලර් බිලියන 4ක ණයක් ලබා දෙමින් සහය වූ ඉන්දියාව, එම වසරේම නොවැම්බර් මාසයේදී ශ්‍රී ලංකාවේ මෙම සාගර අයිතියට එරෙහිව එක්සත් ජාතීන්ගේ සංවිධානය වෙත සිය විරෝධය ඉදිරිපත් කර තිබේ.