ඇමරිකානු ගුවන් නියමුවෙකු බේරා ගැනීමට ඉරානයේ දියත් කළ මෙහෙයුම් අතරතුර දරුණු ගැටුම්..

Apr 4, 2026 at 08:54 AM

|

Lanka Leader

ඉරානයට ඉහළින් පියාසර කළ අමෙරිකානු ප්‍රහාරක ජෙට් යානයක් වෙඩිතබා බිම හෙළා ඇති බවට විදෙස් මාධ්‍ය වාර්තා කර තිබූ අතර, වෙඩි තබා බිම හෙළූ බව කියන ඇමරිකානු ගුවන් නියමුවෙකු බේරා ගැනීම සඳහා දියත් කළ මෙහෙයුමක් අතරතුර, ඉරාන භූමිය තුළ අතිශය දරුණු ගොඩබිම් ගැටුම් ඇවිළී ඇති බව ද විදෙස් මාධ්‍ය වාර්තා කර තිබේ.

ඉරාන විප්ලවීය ආරක්ෂක බලකාය (IRGC) සහ ඇමරිකානු විශේෂ බේරාගැනීමේ කණ්ඩායම් අතර මෙම සෘජු ගැටුම් සිදුවන බව අල් ජසීරා (Al Jazeera) පුවත් සේවයේ වාර්තාකරුවන් උපුටා දක්වමින් හෙළිදරව් කර තිබේ. 

මෙම මෙහෙයුමේදී ඇමරිකානු හමුදාවන්ට දැඩි ජීවිත හානි සිදුව ඇති බව ද එම වාර්තාවල සඳහන් වේ.

අතුරුදන් වූ නියමුවා සොයා ඉරානය විසින් දැවැන්ත මෙහෙයුමක් සහ තෑගි මුදලක් (Bounty) ප්‍රකාශයට පත් කර ඇති පසුබිමක, ඇමරිකානු සහ ඊශ්‍රායල හමුදා එක්ව මෙම බේරාගැනීමේ මෙහෙයුම ආරම්භ කර ඇති බවත් සඳහන්ය. 

කොගිලුයේ සහ බෝයර්-අහමඩ් (Kohgiluyeh and Boyer-Ahmad) වැනි කඳුකර ප්‍රදේශවල මෙම ගැටුම් සිදුවන බවට තොරතුරු වාර්තා වන අතර, මෙය අතිශය අවදානම් සහගත "මරාගෙන මැරෙන මෙහෙයුමක්" (Suicide mission) ලෙස ඇතැම් විචාරකයින් හඳුන්වා දී තිබේ. 

ධවල මන්දිරය මෙම පුවත සම්බන්ධයෙන් මෙතෙක් නිල ප්‍රකාශයක් නිකුත් කර නොමැති වුවද, පවතින තත්ත්වය අතිශය බරපතල බව ආරක්ෂක විශ්ලේෂකයෝ පවසති. 

මෙම මෙහෙයුම අසාර්ථක වුවහොත් එය ඇමරිකානු හමුදා ඉතිහාසයේ දැවැන්ත පසුබෑමක් වනු ඇති බවත්, දෙරට අතර පවතින යුද්ධය තවදුරටත් දරුණු වීමට මෙය සෘජුවම බලපානු ඇති බවත්  විචාරකයෝ පවසති.