බහරේන් පිපිරීම සිදුවූයේ අමෙරිකාව මෙහෙයවූ 'පේට්‍රියට්' මිසයිලයකින් බව හෙළි වෙයි..

Mar 22, 2026 at 03:26 PM

|

Lanka Leader

ඉරානයට එරෙහි යුද්ධය ආරම්භ වී දසවන දින අමෙරිකාවේ මිත්‍ර රටක් වන බහරේනයේ සිදුවූ පිපිරීමකට, අමෙරිකාව විසින් මෙහෙයවනු ලබන 'පේට්‍රියට්' (Patriot) ගුවන් ආරක්ෂණ පද්ධතියකින් නිකුත් කළ මිසයිලයක් සම්බන්ධ බවට විශ්ලේෂණයකින් හෙළි ව ඇතැයි අල්ජසීරා පුවත් සේවය වාර්තා කරයි.

රොයිටර් පුවත් සේවය විසින් කරන ලද පර්යේෂකයන්ගේ විශ්ලේෂණයකට අනුව මෙම තොරතුරු අනාවරණය වී ඇතැයි ද එම පුවත් සේවය වාර්තා කර තිබේ.

ඉකුත් මාර්තු 09 වන දින අලුයම බහරේනයේ සිට්‍රා දූපතේ මහසා (Mahazza) ප්‍රදේශයේ සිදුවූ මෙම පිපිරීමෙන් ළමුන් ඇතුළු පුද්ගලයින් 32 දෙනෙකු තුවාල ලැබූ අතර ඉන් කිහිප දෙනෙකුගේ තත්ත්වය බරපතල විය.

පිපිරීම සිදුවූ ස්ථානය අගනුවර වන මනාමා (Manama) සිට නුදුරින් තෙල් පිරිපහදුවක් පිහිටි ප්‍රදේශයක් වන අතර, ප්‍රහාරයෙන් නිවාස රැසකට ද දැඩි හානි සිදු ව තිබුණි.

මීට පෙර බහරේනය සහ වොෂින්ටනය මෙම සිද්ධිය සම්බන්ධයෙන් චෝදනා කළේ ඉරාන ඩ්‍රෝන ප්‍රහාරයක් එල්ල වූ බවටයි.

කෙසේ වෙතත්, රොයිටර් පුවත් සේවය නැගූ ප්‍රශ්නවලට පිළිතුරු දෙමින් බහරේන රජය පළමු වරට පිළිගෙන ඇත්තේ එම පිපිරීමට පේට්‍රියට් මිසයිලයක් සම්බන්ධ වී ඇති බවයි.

එහිදී රජයේ ප්‍රකාශකයෙකු සඳහන් කළේ අදාළ මිසයිලය මගින් ඉරාන ඩ්‍රෝන යානයක් ගුවනේදී සාර්ථකව විනාශ කළ බවත්, එමගින් ජීවිත රැසක් බේරා ගැනීමට හැකි වූ බවත්ය.

සිදුවූ හානි සහ තුවාල ලැබීම්, පේට්‍රියට් මිසයිලය හෝ ඉරාන ඩ්‍රෝන යානය සෘජුවම පොළොවට පතිත වීම නිසා සිදුවූවක් නොවන බව ද එම ප්‍රකාශකයා වැඩිදුරටත් කියා සිටියේය.