නොරොච්චෝල බිඳ වැටිය හැකියි.. කිසිම යන්ත්‍රයකින් 300MW හදන්න බැරිවෙලා.. - විදුලි ඉංජිනේරුවෝ හෙළිකරති

Feb 26, 2026 at 09:33 AM

|

Lanka Leader

නොරච්චෝලේ ලක්විජය බලාගාරය සඳහා මෑතකදී ආනයනය කරන ලද ගල්අඟුරු ප්‍රමිතියෙන් තොර වීම හේතුවෙන් බලාගාරයේ උපරිම ජනන ධාරිතාව ලබා ගැනීමට බරපතල බාධා එල්ල වී ඇති බවත්, දැනට ගෙන්වා ඇති ගල්අඟුරුවල පවතින ගුණාත්මක භාවයේ අඩුවීම හේතුවෙන් බලාගාරය සතු උපරිම ධාරිතාවය කරා ළඟා වීමට නොහැකි තත්ත්වයක් නිරීක්ෂණය වී ඇති බවත් විදුලි ඉංජිනේරුවන් අනාවරණය කරයි.

විශේෂයෙන්ම, මෙගාවොට් 300 ක ධාරිතාවයකින් යුත් ජනන යන්ත්‍ර මගින් එම සම්පූර්ණ විදුලි ප්‍රමාණය උත්පාදනය කිරීමට නොහැකි වී ඇති අතර මෙහිදී පළමු ජනන යන්ත්‍රයට සාපේක්ෂව තුන්වන ජනන යන්ත්‍රයේ ධාරිතාවය ලබා ගැනීමේදී කැපී පෙනෙන අඩුවක් දක්නට ලැබෙන බව විදුලි ඉංජිනේරු සංගමයේ විධායක සභික දුලාන් සපුතන්ත‍්‍රී මහතා පවසයි.

ඉතිහාසයේ කිසිම අවස්ථාවන එක් යන්ත‍්‍රයකින් මෙගාවොට් 300ක් නිෂ්පාදනය කිරීමට නොහැකි ගල් අගුරු මෙරටට ගෙන්වා නැති බවත් ඔහු පැවසීය.

මෙම තත්ත්වය හුදෙක් විදුලි නිෂ්පාදනය අඩුවීමට පමණක් සීමා නොවී, බලාගාරයේ පද්ධති සහ උපකරණවලට ද දැඩි බලපෑම් එල්ල කළ හැකි බව ඔහුගේ අදහසයි. 

බාල ගල්අඟුරු භාවිතය නිසා බලාගාරයේ පද්ධතිවල හදිසි බිඳවැටීම් (Breakdowns) සිදුවීමේ අවදානමක් පවතින බවත්, එම බලපෑම ඕනෑම අවස්ථාවක සිදු විය හැකි බවත් හෙතෙම අවධාරණය කරති.

නොරච්චෝලේ බලාගාරයෙන් අපේක්ෂිත මෙගාවොට් ප්‍රමාණය ලබා ගැනීමට නොහැකි වන විට, එම හිඟය පියවා ගැනීම සඳහා වෙනත් බලාගාරවලින් විදුලිය ලබා ගැනීමට සිදුවේ. 

ඒ සඳහා වැය වන අතිරේක පිරිවැය එවකට පවතින විදුලි ඉල්ලුම සහ මිල ගණන් (peak plant cost) අනුව තීරණය වන බැවින්, එය විශාල මූල්‍ය බරක් බව ඉංජිනේරුවෝ පෙන්වා දෙති.