ත්‍රිකුණාමලය බුදු පිළිම ගැලවීම සහ මහා සංඝරත්නයට හිංසා කිරීම: ආණ්ඩුව සියදිවි නසා ගැනීමේ උත්සාහයක් - දේශහිතෛෂී ජාතික ව්‍යාපාරය

Feb 13, 2026 at 10:42 AM

|

Lanka Leader

දේශහිතෛෂී ජාතික ව්‍යාපාරය විසින් ප්‍රකාශයට පත්කිරීමට නියමිත "දෙමළ ඩයස්පෝරාවට යටත්වන වර්තමාන ආණ්ඩුව යටතේ බෙදුම්වාදී මාර්ග සිතියම" නම්වූ ප්‍රකාශනයක් ලංකා ලීඩර් වෙත එවා ඇත. එම ප්‍රකාශනයෙන් උපුටා දැක්වීමක් උක්ත ශීර්ෂය යටතේ මෙසේ දැක්විය හැක.

"ඊට අමතරව උතුරු හා නැගෙනහිර ප්‍රදේශවල වෙරළ සංරක්ෂණ පනත උල්ලංඝනය කරමින් සිය ගණනක් කෝවිල් ඉදිකර ඇති තත්ත්වයක් යටතේ ත්‍රිකුණාමලය ඓතිහාසික සම්බෝධී විහාරයේ බුදු පිළිමයක් තැන්පත් කිරීමට එරෙහිව පොලිසිය සහ වෙරළ සංරක්ෂණ නිලධාරීන් විසින් ගනුලැබූ ක්‍රියාමාර්ග සහ ඊට අනුබල හා උපදෙස් දුන්බව කියන ප්‍රදේශයේ ආණ්ඩු පක්ෂ මන්ත්‍රීවරයාගේ ක්‍රියාකලාපය මගින් ආණ්ඩුව විසින් මහා සංඝරත්නය ප්‍රමුඛ රටේ බහුතර සිංහල බෞද්ධ ජනතාවට දීර්ඝ කාලීනව පවතින සිත් වේදනාවක් උරුමකර දී ඇත. ඊට හේතුව එම ආදර්ශය මගින් අනාගතයේ දී උතුරු හා නැගෙනහිර ප්‍රදේශවල බෞද්ධ සිද්ධස්ථාන වලට සිදුවිය හැකි දේ පිළිබඳව අවබෝධයක් ලැබීමය.

එහිදී සාමය කඩවීමක් පිළිබඳව කිසිඳු පැමිණිල්ලක් නොමැතිව එම විහාරස්ථානයට කඩාවැදුනු පොලිස් නිලධාරීන් භික්ෂූන් වහන්සේලාට පහර දෙමින් බුදුපිළිම වහන්සේ පැහැරගෙන යාම වැනි මුග්ධ ක්‍රියාවක් කිරීම දේශපාලන අනුග්‍රහයකින් තොරව නිලධාරීන් ධෛර්යය මත සිදුවූ ක්‍රියාවක් නොවන ශ්‍රී ලංකාවේ කුඩා ළමයෙකුට වුවද තේරුම්ගත හැක. පොලිස් නිලධාරීීන්ගේ එම නීති විරෝධී සහ විනය විරෝධී හැසිරීම පිළිබඳව දේශහිතෛෂී ජාතික ව්‍යාපාරය විසින් පොලිස් කොමිසමට පැමිණිල්ලක් කළ ද ලිපිය ලැබුනු බව දැන්වීම හැර ඊට අදාළව කිසිඳු පරීක්ෂණයක් සිදුකිරීමට කොමිසම විසින් කටයුතු කර නැත.

එම ක්‍රියාවලියට පසුව අභියාචනාධිකරණයේ විභාග වූ නඩුවක් මගින් සාකච්ඡාකර සමතයකට පත්කිරීමට එකඟවී ඇති තත්ත්වයක් යටතේ පවා අධිකරණය නොමග යැවීමට උත්සාහ කරමින් පොලිසිය සහ වෙරළ සංරක්ෂණ නිලධාරීන් රඟදැක්වූ භූමිකාව දේශපාලනික උවමනාවකට අනුව සිදුවූ බව ඉතා පැහැදිලිය.

ඉන්පසුව අධිකරණ නියෝගය මත අත්අඩංගුවට ගනු ලැබූ බලංගොඩ කස්සප හිමි ප්‍රමුඛ භික්ෂූන් වහන්සේලා සතර නමක් ඇතුළු නම දෙනෙකු දිගින් දිගටම රිමාන්ඩ් බන්ධනාගාර ගත කිරීම සහ බන්ධනාගාරය තුළ දී වදහිංසා පැමිණවීමට ක්‍රියාකිරීම මගින් ආණ්ඩුව ස්වේච්ඡාවෙන් විත්තිකරුවා බවට පත්වී ඇත.

ආණ්ඩුව මගින් උතුරේ ජාතිවාදී බෙදුම්වාදී බලවේග සතුටු කිරීම හෙවත් දේශපාලන වෛශ්‍යාවකගේ භූමිකාව රඟ දැක්වීමට උත්සාහ කළ ද ඒ තුළ ආණ්ඩුව බහුතර සිංහල බෞද්ධ ජනතාවගේ අප්‍රසාදයට ලක්වීම වැළැක්විය නොහැක. බෙදුම්වාදී න්‍යායපත්‍රයේ අවසන් සැතපුම පසුකිරීමට සමගාමීව ආණ්ඩුව බිඳවට්ටවා ජාත්‍යන්තර මැදිහත්වීම මත අන්තර් කාලීන පාලනයක් බිහිකිරීමේ අනතුරට අදාලව ගත්විට මේ සියලු නිශේධාත්මක ගොඩනැගීම් තුළින් ආණ්ඩුවට අවාසි සහගත සහ බෙදුම්වාදීන්ට වාසි සහගත වර්ධනය වන බව තර්කානුකූලව ඔප්පුකළ හැකිය.

ඒ අනුව අවසාන වශයෙන් ආණ්ඩුව විසින් රඟදක්වන්නේ තමාටද විනාශය කැඳවමින් රට අනතුරට පත්කිරීමේ භූමිකාවක් හෙවත් සියදිවි නසාගන්නා බෝම්බකරුවකුගේ භූමිකාව බව තේරුම් ගන්නා විට බොහෝ පමාවී තිබෙන බවට සැකයක් නැත."