නව විදුලිබල පනත ගැන ලංකා විදුලි බල මණ්ඩලයේ ඉංජිනේරු සංගමයෙන් නිවේදනයක්

Dec 10, 2023 at 12:56 PM

|

Lanka Leader

විදුලි බලමණ්ඩලය හා විදුලි බල කේෂ්ත්‍රය ප්‍රතිව්‍යුහගතකරණය කිරීම පිළිබඳ නව පනත (නව විදුලිබල පනත) පිළිබඳව සිය සංගමයේ අදහස් දක්වමින් ලංකා විදුලි බල මණ්ඩලයේ ඉංජිනේරු සංගමයේ සම ලේකම් විසින් මාධ්‍ය නිවේදනයක් නිකුත් කර ඇත. 

එම නිවේදනය පහළින්...

“විදුලි බලමණ්ඩලය හා විදුලි බල කේෂ්ත්‍රය ප්‍රතිව්‍යුහගතකරණය කිරීම පිළිබඳ නව පනත (නව විදුලිබල පනත) 2023 නොවැම්බර් 20 වන දින කැබිනට් මණ්ඩලයේ අනුමත විය. 

මේ පනත් කෙටුම්පත සකස් කිරීම සඳහා සඳහා නිසි අයුරින් අදාළ පාර්ශවයන් (විදුලි කේෂ්ත්‍රයේ ප්‍රවීණයන්, බලශක්ති විශේෂඥයින්, විදුලි බල මණ්ඩලය, මහජන උපයෝගිතා කොමිෂන් සභාව, විදුලි සේවකයින්) සමඟ සාකච්ජා, මත විමසුම් හෝ වැඩමුළු පැවැත්වීමකින් තොරව හා මෙම ප්‍රතිව්‍යුහගතකරණ පනත සකස් කිරීමේ ක්‍රියාවලියට දායක කර ගැනීමෙන් තොරව, රටේ ආර්ථිකයට ඉතාමත් සෘජුව බලපාන මෙවැනි පනතක් කඩිමුඩියේ සම්මත කර ගැනීමට කටයුතු කර ඇත. මෙම පනත කැබිනට් මණ්ඩලයේ අනුමත වීමට ප්‍රථමයෙන් සාකච්ඡාවට බඳුන් කිරීම සඳහා පාර්ශව ගණනාවක් උත්සාහ කළ නමුත් එම සියල්ලම ව්‍යයාර්ථ වන ලද්දේ, යම්කිසි පාර්ශ්වයකගේ උවමනාව මත බව ඉතා පැහැදිලිය. මෙම පනත කැබිනට් මණ්ඩලයේ අනුමත වීමෙන් පසු නිරීක්ෂණ හා යෝජනා සඳහා ලබාදෙන බවට විෂය භාර අමාත්‍යවරයා ශ්‍රී ලංකා ඉංජිනේරු ආයතනය, බලශක්ති ක්ෂේත්‍රයේ විශේෂඥයන් ඇතුළු පිරිස් වෙත නොවැම්බර් 7 වන දින අමාත්‍යවරයාගේ ප්‍රධානත්වයෙන් පැවැති රැස්වීමක දී ප්‍රකාශ කර තිබුණද, එය මෙතෙක් ඉටු නොවුනු පොරොන්දුවකි. 

මේ අතර, මේ පිළිබදව දේශපාලඥයින් ඇතුළු පාර්ශව ගණනාවක් මඟින් පසුගිය දිනවල දැඩි කතාබහක් ඇති කළ, මෙම පනත පිළිබඳව මෙතරම් රහස්‍යභාවයකින් කටයුතු කරන්නේ  කුමන හේතුවකටද යන්න ඉතා බරපතල කරුණකි. 

මේ අතරතුර නව විදුලිබල පනත කඩිමුඩියේම ගැසට් කිරීමට අමාත්‍යංශය විසින් උත්සාහයක් ගෙන ඇත. එනම් රජයේ මුද්‍රණාලයේ වෙබ් අඩවියේ මෙම ගැසට් පත්‍රය 2023 දෙසැම්බර් 5වන දින පළවූවා සේ සටහන් කර ඇති නමුත්, 2023 දෙසැම්බර් 7 වන දින රාත්‍රී 11 පමණ වන විටත් එම පනත බාගත කරගැනීමට නොහැකිව පැවති අතර, 7වන දින රජයේ මුද්‍රණාලයෙන් මෙහි මුද්‍රිත පිටපතක්ද ලබා ගත නොහැකි විය. ඒ පිළිබඳ විමසීමේදී මුද්‍රණාලාධිපතිනිය කරුණු දක්වා ඇත්තේ ඒ වන විටත් එම පනත ඔවුන් වෙත ලැබී නොමැති බව‍යි.  

එහෙයින් මෙම නව විදුලි බල පනත දෙසැම්බර් 05 දින ගැසට් නිවේදනය පළ කළ ආකාරයට කටයුතු කරන්නේ කුමන අරමුණක් උදෙසාද ? 

තවත් වැදගත්ම කරුණක් වන්නේ, පාර්ලිමේන්තුවේ නිවාඩුව දෙසැම්බර් 14 දින ආරම්භ වීමත්, ඒත් සමඟ ම අධිකරණ නිවාඩුව දෙසැම්බර් 16 සිට ආරම්භ වීමත්ය. මෙහිදී, දෙසැම්බර් 16 වන දින ආරම්භ වන අධිකරණ නිවාඩුවත් සමඟම මෙම පනත ශ්‍රේෂ්ඨාධිකරණයේ නඩු පැවරෙන ආකාරයට කාල සටහන සූක්ෂමව සකසා ඇති අතර එමගින් මෙම පනතට විරෝධීව පැවරෙන නඩු සංඛ්‍යාව අවම කර ගැනීමේ  උත්සාහයක් දරා ඇති බව ඉතා පැහැදිලිය.  

ගරු පාර්ලිමේන්තුවේ ආංශික අධීක්ෂණ කාරක සභාවටද ඉදිරිපත් නොකිරීමට උත්සාහකර, පාර්ලිමේන්තුවේ ස්ථාවර නියෝග වලටද පටහැනිව මෙසේ කටයුතු කිරීම ඉතා ගැටලු කාරී තත්වයකි. ඩොලර් බිලියන ගණනක් ගනුදෙනු සිදුවන විදුලි බල ක්ෂේත්‍රය සමග මෙලෙස සෙල්ලම් කරන්නේ කුමන අරමුණක් සඳහාද? 

මෙපරිද්දෙන් හදිසි පනතක් වශයෙන් හෝ මෙම පනත පාර්ලිමේන්තුවට ඉදිරිපත් වුවහොත් එය පුදුමයට කරුණක් නොවේ.

දැනට (2023 දෙසැම්බර් 08 දින උදෑසන) මෙම නව පනතේ ඉංග්‍රීසි සහ සිංහල පිටපත් අන්තර්ජාලයේ පලකර ඇති අතර, එම ඉංග්‍රීසි පිටපතේ ද මුද්‍රණ දෝෂ පවතින අතර, එහි සිංහල පිටපතේ මුද්‍රණ දෝෂ (ඉංග්‍රීසි අකුරු හා ඉලක්කම් සහිත) ඉතා විශාල ප්‍රමාණයක් දක්නට ලැබේ. එමෙන්ම දෙමළ භාෂා පිටපත මෙතෙක් නිකුත්කර නොමැත.

මෙම පනත මගින් විෂය භාර අමාත්‍යවරයාට ඉතා අසීමිත බලතල ප්‍රමාණයක් ලබා දෙමින් විදුලි බල කේෂ්ත්‍රයේ නියාමන ආයතනය සතු බලතල කප්පාදු කරමින්, පාරිභෝගික ආරක්ෂණය පිළිබඳ එක් වචනයක්වත් අඩංගු නොකර දැනට පවතින 2009 අංක 20 දරණ විදුලි බල පනත හා 1969 අංක17 දරණ විදුලිබල මණ්ඩල පනත යන පනත් දෙකම වහාම අහෝසි කිරීමට කටයුතු යොදා  ඇත. 

මෙම පනතේ අඩංගු එකී කරුණු පිළිබඳව හා යෝජිත කාලරාමුව පිළිබඳව ඉතා කඩිනමින් විද්වත් සංවාදයක් ආරම්භ විය යුතු බව විදුලිබල ක්ෂේත්‍රයේ ප්‍රවීණයන්ගේ හා විශේෂඥයන්ගේ මතය වන අතර, මෙම පනත මෙපරිද්දෙන්ම පාර්ලිමේන්තුවේ සම්මත වුවහොත් එය රටේ ආර්ථිකයේ කොඳුනාරටිය බඳු විදුලිබල ක්ෂේත්‍රයේ කනගාටුදායක අවසානය සනිටුහන් කිරීම වනු ඇත”.