ගොවීන්ට කිසිම සහනයක් නොදුන් මුට්ටකාසි අයවැයක්..- ජාතික ගොවිජන එකමුතුවේ සභාපති අනුරාධ තෙන්නකෝන්

Nov 10, 2025 at 07:22 PM

|

Lanka Leader

ජනාධිපතිරයා විසින් ඉදිරිපත් කරන ලද අයවැය මගින් වෙනත් බොහෝ ක්ෂේත්‍රවලට සහන ලබාදීමට උත්සාහ කළත් නිෂ්පාදන අර්ථිකයට ඍජුවම දායකත්වය ලබාදෙන, ගොවීන්ට සහන ලබානොදුන් මුට්ටකාසි පන්නයේ අයවැයක් බව ජාතික ගොවිජන එකමුතුවේ සභාපති අනුරාධ තෙන්නකෝන් මහතා පැවසීය.

ජනාධිපති අනුර කුමාර දිසානායක මහතා විසින් ඉදිරිපත් කළ 2026 වර්ෂයේ අයවැය ලේඛනය සම්බන්ධයෙන් සිය අදහස් දක්වමින් හෙතෙම මේ බව සඳහන් කළේය.

මෙවර අයවැයේදී වතු වැවිලි ක්ෂේත්‍රය පිළිබදව වැඩි අවධානයක් යොමු කර තිබුණ ද කෘෂිකාර්මික ක්ෂේත්‍රයේ කෘෂි රසායනික මිල, කෘෂි මෙවලම් සහ යෙදවුම්වල බදු අඩුකර ගොවීන්ට පොහොර සහනාධාරය ලබාදීම සම්බන්ධයෙන් කිසිදු අවධානයක් යොමු කර නොමැති බව අනුරාධ තෙන්නකෝන් මහතා පැවසීය.

පසුගිය වසරේ ඉදිරිපත් කළ අයවැය ලේඛනය මගින් මහා වාරිමාර්ග හා සුළු වාරිමාර්ග ප්‍රතිසංස්කරණය සහ ග්‍රාමීය මාර්ග සංවර්ධනයට මුදල් වෙන් කළ ද පසුගිය මහ සහ යල කන්නවල දිගින් දිගටම පැවති අධික වර්ෂාව හේතුවෙන් ඒවායේ වැඩ අවසන් කිරීමට නොහැකි වූ බවත් ඉන් ඉතිරි වූ මුදල්වලින් සියයට හතළිස්පහක් පමණ ප්‍රමාණයක් මේ වසර අවසන් වන විට නැවත මහා භාණ්ඩාගාරය වෙත ලැබීමට නියමිත බවත් එම මුදල් සහ නව අය – වැයට එකතු කොට වාරිමාර්ග සහ ග්‍රාමීය මාර්ග සංවර්ධනය කිරීමට යෝජනා කර තිබෙන බවත් හෙතෙම සඳහන් කළේය.

ආණ්ඩුව විසින් බඩඉරිඟු, ලොකු ලූනු සහ අර්තාපල් ආනයනයට අවසර දීම නිසා සිය අස්වනු විකුණාගත නොහැකිව කබලෙන් ළිපට වැටී සිටින අල – ලූනු සහ බඩඉරිඟු නිෂ්පාදනය කරන ගොවීන්ගේ ප්‍රශ්න ටික එසේම තිබියදී මෙවර අයවැයෙන් ගොවීන්ට කිසදු සහනයක් ලබා දී නොමැති බවත් අනුරාධ තෙන්නකෝන් මහතා පවසයි.

වෙනත් වසරවල ඉදිරිපත් කළ අයවැය යෝජනාවලට වඩා මෙවර අයවැයෙන් වෙනත් බොහෝ ක්ෂේත්‍රවලට සහන ලබාදීමේ සාධනීය ලක්ෂණ පෙන්නුම් කළද ගොවීන්ට සහන ලබාදීමට උත්සාහයක් නොගැනීම පිළිබඳව තම කනගාටුව පළ කරන බව ඒ මහතා වැඩිදුරටත් පැවසීය.

- දිවයින