කියුබාවට එරෙහි අමෙරිකානු කුමන්ත්‍රණය පරාජය කිරීමට මැදිහත් වන්නැයි අධිරාජ්‍ය විරෝධී ජාතික සංසදය, එක්සත් ජාතීන්ගේ සංවිධානයෙන් ඉල්ලයි..

Oct 29, 2025 at 06:40 PM

|

Lanka Leader

කියුබානු රජයට එරෙහිව අමෙරිකා එක්සත් ජනපදය විසින් පනවා ඇති සම්බාධක ඉවත් කරන ලෙස කියුබානු රජය විසින් එක්සත් ජාතීන් වෙත යෝජනාවක් ඉදිරිපත් කර ඇති අතර, කියුබාව එක්සත් ජාතීන් වෙත ගෙන ආ  එම යෝජනාව පරාජය කිරීමට එක්සත් ජාතීන්ගේ සංවිධානයේ රටවල් වලට අමෙරිකාව අනිසි බලපෑම් කරමින් සිටින බව අධිරාජ්‍ය විරෝධී ජාතික සංසදය පවසයි.

මේ සම්බන්ධයෙන් එම සංසදය එක්සත් ජාතීන්ගේ සංවිධානයේ මහ ලේකම්වරයා වෙත ලිපියක් යොමුකරමින් පවසන්නේ එක්සත් ජාතීන්ගේ සංවිධානය මැදිහත් වී අමෙරිකාව මේ මොහොතේදී කියුබාව ගෙන ආ යෝජනාව පරාජය කිරීමට ගන්නා ප්‍රජාතන්ත්‍ර විරෝධී මානව විරෝධී ක්‍රියාවන් නවතා දැමීමට කටයුතු කරනු ඇතැයි  අපේක්ෂා කරන බවයි.

අධිරාජ්‍ය විරෝධී ජාතික සංසදය, එක්සත් ජාතීන්ගේ සංවිධානය වෙත යොමුකළ  ලිපිය පහළින්..

ගරු මහලේකම් තුමා,

එක්සත් ජාතීන්ගේ සංවිධානය

නිව්යෝක්

ගරු මහලේකම් තුමනි,

මේ වන විට සමාජවාදී කියුබානු රජයට එරෙහිව අමෙරිකා එක්සත් ජනපදය විසින් පනවා ඇති සම්බාධක ඉවත් කරන ලෙස කියුබානු රජය විසින් එක්සත් ජාතීන් වෙත යෝජනාවක් ඉදිරිපත් කර ඇති අතර අද(29) එම යෝජනාවට ඡන්දය ප්‍රකාශ කිරීමට නියමිත ඇත. කියුබාව වසර 60කට අධික කාලයක් අමෙරිකානු සම්බාධක හේතුවෙන් පීඩාවට පත්ව ඇති බව ලොවම දන්නා කාරණයකි. එලෙසම කියුබාව එක්සත් ජාතීන්ගේ සංවිධානය තුළ සිටින ඉතාම සාමකාමී රාජ්‍ය වලින් එකක් බව සමස්ත සාමකාමී ලෝක ජනයා මෙන්ම ඔබ තුමාද පිළිගන්නා කාරණයකි. එසේ හෙයින් කියුබාවට පනවා ඇති සම්බාධක ඉතාම අසාධාරණ සහ අයුක්තිසහගත වන බව අවිවාදිතය. එලෙසම අමෙරිකානු සම්බාධක හේතුවෙන් කියුබානු ජනයා බරතල සෞඛ්‍ය ආර්ථික සමාජීය ගැටළු රැසකට මුහුණ දී සිටින බවද ඔබ වෙත පෙන්වා දීමට කැමැත්තෙමු.

කියුබාව ඔවුන් මුහුණ දී සිටින දුෂ්කරතා ඉතාම සාධාරණව ප්‍රජාතන්ත්‍රවාදීව එක්සත් ජාතීන්ගේ සංවිධානය තුළදී බේරා ගැනීමට උත්සහා ගන්නා බව වසර තිහකට අධික කාලයක් තිස්සේ  කියුබාව ලොවට ප්‍රදර්ශනය කරමින් සිටී. කියුබාව පසුගිය 2024 වර්ෂයේදී අමෙරිකානු සම්බාධක වලට එරෙහිව එක්සත් ජාතීන් වෙත ගෙන ආ යෝජනවට රටවල් 187කම සහාය පලවීමෙන් කියුබාව වෙත ලෝක ජනයා දක්වන ගෞරවය ප්‍රකට කරන බව අපගේ කියවීමයි. 

කෙසේ වුවද මෙවර කියුබාව එක්සත් ජාතීන් වෙත ගෙන ආ යෝජනාව පරාජය කිරීමට එක්සත් ජාතීන්ගේ සංවිධානයේ රටවල් වලට අමෙරිකාව අනිසි බලපෑම් කරමින් සිටින බව මේ වන විට ප්‍රසිද්ධ රහසකි. ඒ අනුව එක්සත් ජාතීන්ගේ සංවිධානයේ ස්වාධීනත්වය සහ ගෞරවය රැක ගැනීම පිණිස ඔබ තුමා මැදිහත් වී අමෙරිකාව මේ මොහොතේදී කියුබාව ගෙන ආ යෝජනවා ප්‍රාජය කිරීමට ගන්නා ප්‍රජාතන්ත්‍ර විරෝධී මානව විරෝධී ක්‍රියාවන් නවත දැමීමට කටයුතු කරනු ඇතැයි අප ගෞරවපූර්වකව අපේක්ෂා කරමු. එලෙසම අමෙරිකාවේ අයුක්ති සහගත මෙම ක්‍රියාව වැලැක්වීමට ඔබ තුමා දක්වන දායකත්වය අමෙරිකානු සම්බාධක හේතුවෙන් දැඩි අපහසුතාවයට පත්ව සිටින කියුබානු දරුවන් ඇතුළු සමස්ත කියුබානු ජනයාගේ ගෞරවණීය ජීවිතයකට හිමිකම්පෑමේ අයිතිය තහවුරු කරන බව ගෞරවයෙන් යුතුව සිහිපත් කරමු.

අධිරාජ්‍ය විරෝධී ජාතික සංසදය අමෙරිකාව සිය ත්‍රස්ථවාදයට අනුබල දෙන රාජ්‍ය ලැයිස්තුවට කියුබාව ඇතුලත් කිරීමද යුක්තිසහගත නොවන ක්‍රියාවක් බව ඔබ තුමා වෙත අවධාරණය කිරීමට මෙය අවස්ථාවක් කර ගනිමු.

ස්තුතියි,

වෛද්ය සුමිත් වන්නිආරච්චි,

කැඳවුකරු,

අධිරාජ්‍ය විරෝධී ජාතික සංසදය.