විද්වතුන් යැයි කියාගන්නා යම් පිරිස් පිටත සිට ආණ්ඩුව ජිනීවා උගුලට තල්ලු කරනවා..

Oct 13, 2025 at 12:21 PM

|

Lanka Leader

ජගත් මානව හිමිකම් සමුළුව හරහා බෙදුම්වාදී බලවේග විසින් දියත් කරනු ලබන උපායමාර්ගික සැලසුම එනම් රණවිරු දඩයම් ක්‍රියාවලිය සහ රට බෙදා වෙන්කිරීමට අදාළ මාර්ග සිතියමට මතුපිටින් විරෝධය පළ කරන ඇතැම් පිරිස් එම මහා සැලසුමේ යම් යම් කොටස් සාධාරණීකරණය කරමින් පුවත්පත් වලට නිවේදන නිකුත් කිරීමේ ක්‍රියාවලියක් දියත් කෙරෙන බව ලංකා ලීඩර් විසින් නිරීක්ෂණය කර ඇත. ඊට අදාළ ප්‍රබල උදාහරණයක් සපයන්නේ මහාචාර්ය නීතිඥ ප්‍රතිභා මහානාම මහතාය. ඔහු විසින් අද දිනයේ ද 'ද අයිලන්ඩ්' පුවත්පතට ප්‍රකාශයක් කරමින් ඊනියා ස්වාධීන අභිචෝදක කාර්යාලය පිහිටුවීම සාධාරණීයකරණය කර ඇත. ලංකා ලීඩර් ඒ පිළිබඳව ජාතික සංවිධානවල මතය විමසන ලදී.

මේ වෛද්‍ය වසන්ත බණ්ඩාර මහතාගේ අදහස් ඔහුගේ වචනයෙන්,

"ලංකා ලීඩර් නිරීක්ෂණය පිළිබඳව 80%ක් එකඟවන බව පළමුව කිවයුතුයි. එනම් දැනුම්වත්ව ආණ්ඩුව ජිනීවා මර උගුලට තල්ලු කිරීම සඳහා විද්වත් ප්‍රවේශයකින් ඊනියා උපදෙස් ලබාදීම සිදුවන බවට 80%ක සම්භාවිතාවක් ඇත. නොදැනුවත්කම නිසා හෝ ඊනියා ස්වාධීන විද්වතෙකු බව පෙන්වීම සඳහා එවැනි බරපතළ පාවාදීමක් සිදුකිරීමේ සම්භාවිතාවය 20%ක් ලෙස සැලකිය හැකියි.

එතුමාගේ ප්‍රකාශවලට හේතුව කුමක් වුවත් එම ප්‍රකාශ මගින් ආණ්ඩුව ඊනියා මානව හිමිකම් උගුලට තල්ලු කෙරෙන බව ඉතා පැහැදිලියි. මීට පෙර යහපාලන සමයේ දී ශ්‍රී ලංකා රජය ජිනීවා යෝජනාවලට සම අනුග්‍රහය දැක්වීම මගින් අදාළ යෝජනා සාකච්ඡා කර එකඟතාවයකට පැමිණීම වඩා සුදුසු බවට එතුමා විසින් මතයක් පළකරනු ලැබුවා. ඊට පසු මෙවර 60 වැනි සැසියට අදාළව රෝම ප්‍රඥප්තිය අත්සන් කළොත් රණවිරුවන් 58 දෙනෙකුට දඬුවම් කෙරෙන බව සඳහන් කළා. ආණ්ඩුව කිසිසේත්ම රෝම ප්‍රඥප්තියට අත්සන් නොකරන තත්ත්වයක් යටතේ දුර තිබෙන අනතුරක් පෙන්වා සත්‍ය සෙවීමේ කොමිසම සහ අභිචෝදක කාර්යාලය පිහිටුවීමේ අනතුර පිළිබඳව අවධානය වෙනතකට යොමුකරන බව පෙනෙනවා.

දැන් එතුමා අභිචෝදක කාර්යාලය පිහිටුවීමත් වක්‍රව නිවැරදි බවට සාධාරණීයකරණය කරනවා. ඒ මගින් භයානක මහා පාවාදීම ඊනියා සංශෝධනවලට යටත්ව සිදුකළ හැකි බව අඟවනවා"