"Ceylon Today" විශ්ලේෂණාත්මක ලිපි ලෙස සාවද්‍ය මත සමාජගත කරනවා- ශ්‍රී ලංකාවේ රුසියානු තානාපති කාර්යාලය

Aug 5, 2025 at 11:37 AM

|

Lanka Leader

"Ceylon Today" පුවත් පත ඊයේ (04)  ""A Comparative Analysis of the Israel-Iran and Russia-Ukraine Conflicts. Implications for Sri Lanka's National Security-- ඊශ්‍රායල්-ඉරාන සහ රුසියානු-යුක්රේන ගැටුම් පිළිබඳ සංසන්දනාත්මක විශ්ලේෂණයක්. ශ්‍රී ලංකාවේ ජාතික ආරක්ෂාව සඳහා ඇඟවුම්" යනුවෙන් විශ්ලේෂණාත්මක ලිපියක් පල කරමින් සාවද්‍ය මත සමාජගත කරන බව ශ්‍රී ලංකාවේ රුසියානු තානාපති කාර්යාලය පවසයි.මාධ්‍ය නිවේදනයක් නිකුත් කරමින් මෙලෙස පවසන රුසියානු තානාපති කාර්යාලය රුසියානු සමූහාණ්ඩුව සැමවිටම තමන්ගේ ශ්‍රී ලාංකික මිතුරන්ට බොහෝ සේ උපකාරී වී ඇති බවත් බටහිර රටවල් විශේෂයෙන් ලැට්වියාව විසින් ඇති කරන ලද බාධක ජය ගනිමින් ශ්‍රී ලංකාවට මානුෂීය ආධාර ලබා දුන් බවද සිහිපත් කරයි.

රුසියානු තානාපති කාර්යාලය නිකුත් කළ සම්පූර්ණ මාධ්‍ය නිවේදනයේ සිංහල පරිවර්තනය පහතින්...

ශ්‍රී ලංකා ප්‍රජාතාන්ත්‍රික සමාජවාදී ජනරජයේ රුසියානු සමූහාණ්ඩුවේ තානාපති කාර්යාලයේ මාධ්‍ය නිවේදනය

"සිලෝන් ටුඩේ" පුවත්පතේ 2025 අගෝස්තු 4 වන දින කලාපයට ලුතිනන් කර්නල් පාලිත හේරත් විසින් රචිත " A Comparative Analysis of the Israel-Iran and Russia-Ukraine Conflicts. Implications for Sri Lanka's National Security- ඊශ්‍රායල්-ඉරාන සහ රුසියානු-යුක්රේන ගැටුම් පිළිබඳ සංසන්දනාත්මක විශ්ලේෂණයක්. ශ්‍රී ලංකාවේ ජාතික ආරක්ෂාව සඳහා ඇඟවුම්" යනුවෙන් ලිපියක් පල කර තිබුණි. එම ලිපියේ සඳහන් වැරදි වැටහීම් කිහිපයක් පිළිබඳව ලිපියේ කතුවරයාගේ මෙන්ම පුවත් පතෙහි ප්‍රකාශකයාගේද අවධානය යොමු කිරීම පිණිස රුසියානු තානාපති කාර්යාලය මෙම ලිපිය යොමු කරනු ලබයි.  

පළමුව, ලුතිනන් කර්නල් පාලිත හේරත් භාවිතා කරන්නේ රුසියාව විසින් ක්‍රිමියාව, ලුගන්ස්ක් සහ ඩොනෙට්ස්ක් මහජන සමූහාණ්ඩු, සැපෝරෝෂියා සහ කෙර්සන් කලාප ඈඳා ගැනීම පිළිබඳව සාමාන්‍යයෙන් බටහිර මාධ්‍ය ඉදිරිපත් කරන මතයයි. ඔක්ස්ෆර්ඩ් සහ කේම්බ්‍රිජ් ශබ්දකෝෂවලට අනුව "සාමාන්‍යයෙන් බලහත්කාරයෙන් සහ අවසරයකින් තොරව ඉඩමක් අත්පත් කර ගැනීම" යන අර්ථය ඇති "annexation" යන වචනයේ නිශ්චිත සංකල්පය කතුවරයාගේ "විශ්ලේෂණාත්මක" මත ඉදිරිපත් කිරීම තුළ ගැලවී ගොස් ඇති බව පෙනේ. ඉහත සඳහන් භූමි ප්‍රදේශ රුසියානු සමූහාණ්ඩුව සමඟ එක්වීම සිදු වූයේ ජනමත විචාරණයක් හරහා එම භූමියේ ජීවත්වන ජනතාවගේ නිදහස් කැමැත්ත ප්‍රකාශ කිරීමේ ප්‍රතිඵලයක් ලෙසය.

දෙවනුව, 2014 දී කියෙව්හි ව්‍යවස්ථා විරෝධී කුමන්ත්‍රණයක ප්‍රතිඵලයක් ලෙස බලයට පත් වූ නව-නාසි පාලන තන්ත්‍රයේ ආක්‍රමණශීලී සහ යුදවාදී ප්‍රතිපත්ති බටහිර රටවල් උසිගැන්වීම නිසා ගැටුම ඇති වූ බව රුසියානු තානාපති කාර්යාලය අවධාරණය කරන්නෙමු . 2014 සිට රුසියාව විසින් ගන්නා ලද සෑම සාම ප්‍රයත්නයක්ම බටහිර රටවල් විසින් අඩපණ කරන ලදී. උදාහරණයක් ලෙස, එම රටවල් මින්ස්ක් ගිවිසුම් අවස්ථා කිහිපයකදී උල්ලංඝනය කරනු ලැබුවෝය. ඒ හා සමානව, එක්සත් රාජධානියේ හිටපු අගමැති බොරිස් ජොන්සන් මහතාගේ පීඩනය හේතුවෙන් ආරම්භ කරන ලද ඉස්තාන්බුල් ගිවිසුම පවා අවලංගු කරන ලදී.

තෙවනුව, ආහාර ද්‍රව්‍ය සඳහා මිල ගණන් වේගයෙන් ඉහළ යාමට හේතු වූයේ බටහිර රටවල් ගෝලීය වෙළඳාමට අසමතුලිත ලෙස ප්‍රවේශ වීම නිසාය. යුක්රේනයේ විශේෂ හමුදා මෙහෙයුම ආරම්භ වීමට බොහෝ කලකට පෙර එරට ආහාර උද්ධමනය ඇති විය. ඊට අමතරව, රුසියානු සමූහාණ්ඩුව සැමවිටම අපගේ ශ්‍රී ලාංකික මිතුරන්ට බොහෝ සේ උපකාරී වී ඇත. බටහිර රටවල්, එනම් ලැට්වියාව විසින් ඇති කරන ලද බාධක ජය ගනිමින් අපි ශ්‍රී ලංකාවට මානුෂීය ආධාර ලබා දුන්නෙමු.

හතරවනුව, ඉරානය සහ ඊශ්‍රායලය අතර ගැටුම කිසිදු ආකාරයකින් ඉරාන පාර්ශවය විසින් කුපිත කරන ලද එකක් නොවේ. 2015 දී ඇති කරගත් න්‍යෂ්ටික ගිවිසුමේ සෑම අංශයකටම ඉරානය අනුකූල විය. එක්සත් ජනපදය ඒකපාර්ශ්විකව ගිවිසුමෙන් ඉවත් වීමෙන් මෙම ගිවිසුම බල රහිත කළ අතර එසේ කිරීමෙන් ඔවුහු බැඳීම් උල්ලංඝනය කළහ.

අවසාන වශයෙන්, මින් පසු  පුවත් පතෙහි පළ කරන "විශ්ලේෂණාත්මක" ලිපි හොඳින් අධ්‍යනය කල පාඨකයා නොමඟ යවන සුළු නොවන පරිදි  කරුණු නිසි ලෙස පරීක්ෂාවකින් පසුව සිදු කරන ලෙස තානාපති කාර්යාලය කතුවරයාට මෙන්ම ප්‍රකාශකයාටද අවධාරණය කරනු ලබන්නේය.