මම එකෙකුටවත් බය නැහැ - සජිත් පාර්ලිමේන්තුවේ දී සැර වෙයි

Nov 21, 2023 at 12:57 PM

|

Lanka Leader

පාර්ලිමේන්තුවේ ඇති වූ උණුසුම් නොසන්සන්සුන් තාවයක් හේතුවෙන් සභාව විනාඩි කිහිපයකට කල් තැබීමට කතානායන මහින්ද යාපා අබේවර්ධන මහතා අද කටයුතු කළේය.

ඒ ස්ථාවර නියෝග යටතේ විපක්ෂ නායක සජිත් ප්‍රේමදාස මහතා විමසන ලද ප්‍රශ්නයක් හේතුවෙන් ඇතිවූ උණුසුම් තත්වයක් මතයි.

මහින්ද රාජපක්ෂ, ගෝඨාභය රාජපක්ෂ, බැසිල් රාජපක්ෂ යන අය ආර්ථිකයට කළ විනාශයට පාඩුව ඔවුන්ගෙන් අයකරගත යුතු බවද විපක්ෂනායකවරයා පාර්ලිමේන්තුවේදී පැවසූ අතර ආර්ථිකය බංකොලොත් කළ ඔවුන් රාජ්‍ය අනුග්‍රහය යටතේ ජීවත් වන්නේ කෙසේ දැයි ප්‍රශ්න කළේය.

ඒ සමගම ආණ්ඩු පක්ෂ මන්ත්‍රීවරුන් කෑකෝ ගැසීමට පටන් ගැනීමත් සමග පාර්ලිමේන්තු මන්ත්‍රි සනත් නිශාන්ත මහතා ඇතුළු පිරිසක් විපක්ෂ නායකවරයා දෙසට ගමන් කිරීම නිසා සභාවේ උණුසුම් තත්ත්වයක් නිර්මාණය විය.

පසුව ඊට ප්‍රතිචාර දක්වමින් සජිත් ප්‍රේමදාස මහතා පැවසුවේ තමා එකෙකුටවත් බය නැති බවත්, තනියම වුණත් මුහුණ දීමට තමා සූදානම් බවත් ය.

එහිදී අදහස් දැක්වූ විපක්ෂ නායකවරයා,

"ගරු කථානායක තුමා එකක් මම කියන්න කැමතියි. මගේ ප්‍රශ්නය අතරතුර ඔබතුමා ඉඩදුන්නා එක එක්කෙනාට පොයින්ට් ඔෆ් ඕඩර්ස් ඉදිරිපත් කරලා මගේ ප්‍රශ්නයට බාධා කරන්න. මම එකක් කියන්න කැමතියි. කරුණාකරලා මයික් එක ඕෆ් කරන්නත් එපා ස්ක්‍රීන් එක ඕෆ් කරන්නත් එපා. මම ඔබතුමාට කියන්න කැමතියි. මේ හැමකෙනාටම කියන්න කැමතියි මේ එකෙකුටවත් මම බය නෑ. ඕනම කෙනෙකුට තනියම වුණත් මූන දෙන්නම්. එකෙකුටවත් බය නෑ. පුළුවන් නම් එනවා. මුන් නරි ටිකක් ඉන්නේ. මුන් හිවල්ලු ටිකක් ඉන්නේ. "