රුසියාවේ 80 වැනි යුද ජයග්‍රහණ සැමරුම සහ ලංකාව..

May 9, 2025 at 09:03 AM

|

Lanka Leader

👉 1945දී හිට්ලර්ගේ ආක්‍රමණික නාසි හමුදාව පරාජය කොට සෝවියට් හමුදා ලැබූ දැවැත්න ජයග්‍රහණයේ 80 වෙනි සැමරුම හෙට එනම් මැයි 9 දිනට යෙදී තිබෙනවා. 

👉 මෙවර ඉතා උත්කර්ෂවත් අන්දමින් පැවැත්වීමට නියමිත මේ නිදහස් සමරුව සඳහා චීන ජනාධිපති ෂී ජින් පින් ඇතුළු රාජ්‍ය නායකයින් 28 දෙනෙකු මොස්කව් නුවරට පැමිණීමත් සුවිශේෂී කාරණයක්.

👉 එමෙන්ම ඒ නිමිත්තෙන් රතු චතුරස්‍රයේ පැවැත්වෙන පෙළපාළියට රටවල් 13ක හමුදා භටයින් සහභාගී වීමට නියමිතයි. 

👉 එදා දෙවැනි ලෝක යුද සමයේ හිට්ලර්ගේ ආක්‍රමණය එල්ල වන විට සෝවියට් සමාජවාදී සමූහාණ්ඩුව පිහිටුවා ගත වී තිබුණේ වසර තිහකටත් අඩු කෙටි කාලයක්. 

👉 ඒ කෙටි කාලය තුළ බොහෝ දුෂ්කරතා මැද රුසියාව අත්කරගත් විද්‍යාත්මක හා තාක්ෂණික දියුණුව ඔස්සේ තමයි ඔවුන්ට හිට්ලර් කියන බිහිසුණු ආක්‍රමණිකයාට මුහුණ දීමට සිදුවුණේ. 

👉 මේ යුද්ධයේදී රුසියානු හමුදා භටයන් මිලියන 8.7කට තමන්ගේ ජීවිත අහිමි වුණා. එසේම ඒ හමුදා භටයින්ද ඇතුළුව රුසියානු ජනතාව මිලියන 27කට දෙවැනි ලෝක යුද්ධයේදී ජීවිත අහිමි වුණා. 

👉 එය එකල සෝවියට් ජනගහනයෙන් සීයට 13%ක් තරම් විශාල ප්‍රතිශතයක්. 

👉 ඔවුන් එදා ඒ කැපවීම කළේ තමන්ගේ මව්බිම වෙනුවෙන් පමණක් නොවෙයි. හිට්ලර්ගේ නාසිවාදී වියරුවෙන් සමස්ත ලෝකයම මුදා ගැනීමට එදා දේශප්‍රේමී සෝවියට් වැසියන් ලබාදුන් දායකත්වය අතිමහත්. 

👉 විශේෂ කාරණය තමයි රුසියාවේ යුද සැමරුමෙන් දින දහයකට පසු ශ්‍රී ලංකාවේ යුද ජයග්‍රහණයේ දිනය උදාවීම. 

👉 රුසියානුවෝ වසර 80කට පසුවත් තමන්ගේ ජයග්‍රහණය ඉහළින් සැමරුවත් ලංකාවේ ඇතැම් පිරිස්වලට වසර 16ක් යන විට තමන්ගේ අතීතය අමතක වෙමින් තිබීම කනගාටුවට කරුණක්. 

👉 අමතක වීමෙන් නොනැවතී යුද්ධයට පරාජිතයන් මිස ජයග්‍රාහකයන් නැතැයි සිතන, ජයග්‍රහණය සැමරීමෙන් පරාජිතයාගේ සිත රිදෙන බව සිතන, විෂම කවි කල්පනා වැඩියෙන් ඇසෙන යුගයක් අද අපට පසුකිරීමට සිදුවී තිබෙනවා. 

👉 යුද ජයග්‍රහණය නම් වචනයට පවා තමන් විරුද්ධ බව අද ඇතැම් ඇමතිවරු ප්‍රසිද්ධියේ පවසනවා.

👉 අප සැමරිය යුත්තේ යුද්ධයක් නොව, බිහිසුණු ත්‍රස්ත සංවිධානයක් පරාජය කොට, රටේ සිංහල දෙමළ මුස්ලිම් සියලු ජනතාවට උදාවූ සාමය සහ ඒ වෙනුවෙන් දිවි හිමියෙන් කැපවූ මිනිසුන්ගේ අමිල පරිත්‍යාගය කියන සරල කාරණය පවා අද ඇතමුන්ට අමතක වෙමින් තිබෙනවා. 

👉 ඉතින් තව දින කීපයකින් මේ මැයි 19 ලංකාවේ කුමක් සිදුවේදැයි අපි විමසිල්ලෙන් බලා සිටිමු. කවුරු නැතත් තනි තනියෙන් හෝ ඒ දිනය සිහිපත් කිරීමට කළ හැකි සෑම දෙයක්ම කරමු.