ඉන්දියාව රුසියාවෙන් කරන බොරතෙල් ආනයනය තියුනු ලෙස පහත දමයි

Mar 3, 2025 at 11:26 AM

|

Lanka Leader

2023 ජනවාරි මාසයෙන් පසුව පසුගිය පෙබරවාරි මාසයේදී රුසියාවෙන් ඉන්දියාව ආනයනය කරන බොරතෙල් ප්‍රමානය  අවම මට්ටමට පහත වැටී ඇති බව වාර්තා පවසයි. මෙම තත්වය ඇතිවී තිබෙන්නේ, එක්සත් ජනපද පරිපාලනය රුසියානු බලශක්ති සමාගම් කිහිපයකට සහ තෙල් ටැංකි ගණනාවකට එරෙහිව සම්බාධක පැනවීමෙන් සති කිහිපයකට පසුව වීමද විශේෂත්වයකි.

රුසියානු-යුක්රේන යුද්ධය ආරම්භ වීමෙන් පසු රුසියාවේ දෙවන විශාලතම තෙල් ගැනුම්කරු බවට ඉන්දියාව පත් විය. එම ආනයන්යන් පසුගිය ජනවාරි මාසයට වඩා 14.9% ක අගයකින් අඩු වූ අතර, එය පෙබරවාරි මාසයේදී දිනකට බැරල් මිලියන 1.4 ක් පමණ වන සාමාන්‍යය අගයක් ගත් බව Kpler හි දත්ත උපුටා දක්වමින්  පසුගිය 28 දා Bloomberg ආයතනය වාර්තාවක් ඉදිරිපත් කරමින් පවසා සිටියේය.

Kpler දත්ත වලට අනුව රුසියාවෙන් බොරතෙල් ආනයනය නැවැත්වීම හේතුවෙන් ඇතිවන හිඟය ප්‍රධාන වශයෙන් ඉරාකය සහ සෞදි අරාබිය විසින් පියවා ඇති බවද Bloomberg පවසයි. උදාහරණයක් ලෙස, ඉන්දියාවේ දෙවන විශාලතම සැපයුම්කරු වන ඉරාකයෙන් නැව්ගත කිරීම් පෙබරවාරි මාසයේදී 8.3% කින් ඉහළ ගොස් තිබුණි. ඉන්දියානු පිරිපහදුකරුවන් ද නයිජීරියාව, ඇන්ගෝලාව, මෙක්සිකෝව සහ කොලොම්බියාවෙන් වැඩිපුර මිලදී ගැනීම් කර තිබුණි. ඉන්දියාව රුසියාවෙන් බොරතෙල් මිලදී ගැනීම් ඉදිරි මාස දෙක තුළ තවදුරටත් පහත දමනු ඇතැයි අපේක්ෂා කරන බව Bloomberg වාර්තාව පුරෝකතනය කළේය.

ජනවාරි මාසයේදී ඇමරිකා එක්සත් ජනපදය සහ එක්සත් රාජධානිය විසින් පනවන ලද නවතම සම්බාධක, ගෑස්ප්‍රොම් නෙෆ්ට් සහ සර්ගුට්නෙෆ්ටෙගාස් ඇතුළු රුසියානු තෙල් නිෂ්පාදකයින් මෙන්ම රුසියානු බොරතෙල් ප්‍රවාහනය කරන නාවික යාත්‍රා 183 ක් ඉලක්ක කර ගත්හ. මෙම පියවරයන් ලොව තුන්වන විශාලතම තෙල් ආනයනකරු වන ඉන්දියාවට සහ ලොව විශාලතම ආනයනකරු වන චීනයට බලපා ඇත.

පෙබරවාරි මාසයේ නවදිල්ලියේ දී මාධ්‍ය වෙත අදහස් දක්වමින්, සම්බාධක නොතකා, රුසියාව ඉන්දියාව ඇතුළු ගෝලීය වෙළඳපොළට තෙල් සැපයීම දිගටම කරගෙන යනු ඇති බව රුසියානු පළමු නියෝජ්‍ය බලශක්ති අමාත්‍ය පාවෙල් සොරොකින් අවධාරණය කළේය. "අපි ප්‍රායෝගිකයි. අපි අපේ සබඳතා අගය කරනවා, වෙළඳපොළට සැපයුම් දිගටම කරගෙන යනවා. ආර්ථික දෘෂ්ටි කෝණයකින් අපේ සම්පත් තරඟකාරීයි." සොරොකින් පැවසීය.

රුසියාව ඉන්දියාවට ද්‍රව ස්වභාවික ගෑස් (LNG) නැව්ගත කිරීම් වැඩි කරන බව ද ඔහු යෝජනා කළේය. නවදිල්ලිය දැනට කටාර් සහ ඇමරිකා එක්සත් ජනපදය යන දෙඅංශයෙන්ම සුපිරි ශීත කළ ඉන්ධන ආනයනය කරන අතර එමඟින් ඉන්දියානු ඉල්ලුමෙන් 50% ක් පමණ සපුරාලයි.

යුක්රේන ගැටුමේදී ඉන්දියාව රාජ්‍ය තාන්ත්‍රික කඹයක් දිගේ ගමන් කර ඇති අතර, එක්සත් ජනපදය සහ යුරෝපය සමඟ සමීප සම්බන්ධතා පවත්වා ගෙන යන අතරම රුසියාව සමඟ උපායමාර්ගික හවුල්කාරිත්වය පුළුල් කළේය. ඒ අනුව රුසියාව ඉන්දියාවේ විශාලතම තෙල් සැපයුම්කරු ලෙස මතුවී ඇත.

ඉන්දියාවේ රුසියානු තානාපති ඩෙනිස් අලිපොව් පසුගිය 27 වනදා නිව්ස් 18 සමඟ සම්මුඛ සාකච්ඡාවකට එක්වෙමින් තෙල් හා ගෑස් සඳහා වඩාත්ම ලාභදායී ප්‍රභවයන් සොයා ගැනීම සඳහා නවදිල්ලියේ ප්‍රවේශය අගය කළ අතර රුසියාව විශ්වාසදායක සහ දැරිය හැකි බලශක්ති සැපයුම්කරුවෙකු වී ඇති බවද සඳහන් කළේය.