වියට්නාම් කොමියුනිස්ට් පක්ෂය පිහිටුවීමේ 95 වන සංවත්සරය ශ්‍රී ලංකාවේ වියට්නාම් තානාපති කාර්යාලය සමරයි

Feb 4, 2025 at 06:47 PM

|

Lanka Leader

 2025 පෙබරවාරි 3 වන දින, ශ්‍රී ලංකාවේ වියට්නාම් තානාපති කාර්යාලය වියට්නාම් කොමියුනිස්ට් පක්ෂය පිහිටුවීමේ 95 වන සංවත්සරය සැමරීම සඳහා අනුස්මරණ උත්සවයක් සංවිධානය කළේය. ශ්‍රී ලංකා කොමියුනිස්ට් පක්ෂය , ජනතා විමුක්ති පෙරමුණ, ජාතික නිදහස් පෙරමුණ,  මහජන එක්සත් පෙරමුණ, මහජන පක්ෂය නියෝජනය කරමින් එම පක්ෂවල නියමුවන්ද ශ්‍රී ලංකාවේ කියුබාවේ තානාපති සහ ශ්‍රී ලංකාවේ චීන තානාපති කාර්යාලයේ නියෝජ්‍ය ප්‍රධානියා ඇතුළු වියට්නාම් කොමියුනිස්ට් පක්ෂය සමඟ සමඟ සබඳතා පවත්වන ශ්‍රී ලාංකික දේශපාලන පක්ෂවල නියෝජිතයින් මෙම උත්සවයට සහභාගී විය. වියට්නාමය  සහ වියට්නාම් කොමියුන්ස්ට් පක්ෂය සමඟ ඉහත කී ශ්‍රී ලංකාවේ දේශපාලන පක්ෂ සහ වෙනත් සංවිධානවල සහයෝගීතාවය සහ මිත්‍රත්වය පෙන්නුම් කරන අවස්ථාවක් බවට උත්සවය පත්වී තිබුණි.

මෙම අවස්ථාවට, වියට්නාම් තානාපති ගරු  චිං තී තම්  මහත්මිය වියට්නාම් කොමියුනිස්ට් පක්ෂයේ වසර 95 ක ගමන් මග විස්තර කරමින්, එහි කැපී පෙනෙන සන්ධිස්ථාන සහ ජයග්‍රහණ ඉස්මතු කරමින් සිය දේශනය පැවැත්වීය.

වියට්නාමයේ ජාතික විප්ලවයේ මුල් අවධියේ පටන් සිටින එකම නායිකාව සහ සංවිධාකාව ලෙස මෙන්ම වර්තමානයේ එහි ආර්ථික සංවර්ධන ක්‍රියාවලියේ නියමුවරියක ලෙස වියට්නාම් කොමියුන්සිට් පක්ෂයේ වැදගත් කාර්යභාරය මෙන්ම වර්තමානයේ එහි ආර්ථික සංවර්ධනය පිළිබඳ දත්ත සහ තොරතුරු ඉදිරිපත් කරමින්, ඇයගේ දේශනය තුළ ඔරොත්තු දීමේ හැකියාව සහ ප්‍රගතිය පිළිබඳ පැහැදිළි චිත්‍රයක් පින්තාරු  කළාය.

ශ්‍රී ලංකාව ඇතුළු ලොව පුරා සහෝදර පක්ෂ වියට්නාමය සඳහා ලබා දුන් අමිල සහයෝගය සහ සහාය තානාපතිවරිය සිහිපත්  කළාය.

විදේශ කටයුතු සහ විදේශ රැකියා නියෝජ්‍ය අමාත්‍ය ගරු අරුන් හේමචන්ද්‍ර මහතා සිය අදහස් දැක්වීමේදී, වියට්නාම් කොමියුනිස්ට් පක්ෂයේ නායකත්වය යටතේ වසර ගණනාවක් පුරා වියට්නාමය අත්කර ගෙන ඇති ස්ථිරසාර සංවර්ධනය අගය කළේය. කලාපීය දේශපාලනය අනුව, වියට්නාමය වාමාංශික පාලනයේ ආදර්ශමත් ආකෘතියක් ලෙස කටයුතු කරන බව ඔහු සඳහන් කළේය. වියට්නාම් කොමියුනිස්ට් පක්ෂයේ ස්ථාවර පාලනය වියට්නාමයේ නැවත එක්වීම මෙන්ම එහි ආර්ථික වර්ධනය සහ දරිද්‍රතාවයට එරෙහිව සටන් කිරීම සඳහා තීරණාත්මක වී ඇති බව ඔහු අවධාරණය කළේය. රාජ්‍ය තාන්ත්‍රික භූ දර්ශනය හැඩගැස්වීමේදී, විශේෂයෙන් එහි විප්ලවය අනුගමනය කරමින්, වාමාංශික ජාතීන්ට සහයෝගයෙන් කටයුතු කිරීමට අවස්ථා නිර්මාණය කිරීමේදී වියට්නාමය කරනු ලබන සැලකිය යුතු කාර්යභාරය නියෝජ්‍ය අමාත්‍යවරයාගේ ඇගයීමට ලක්විය. 

අනුස්මරණ උත්සවයේදී අදහස් දක්වමින්, ශ්‍රී ලංකාවේ කොමියුනිස්ට් පක්ෂයේ මහලේකම් ආචාර්ය ජී. වීරසිංහ මහතා, වියට්නාම් කොමියුනිස්ට් පක්ෂයට සිය පක්ෂයේ මෙන්ම සමස්ථ අධිරාජ්‍යවිරෝධී ජනයාගේ උණුසුම් සුබ පැතුම් එක් කළේය. වියට්නාම් කොමියුනිස්ට් පක්ෂයේ ආරම්භයේ සිට සංවර්ධන ගමනේ සන්ධිස්ථාන ඔහු ඉස්මතු කළ අතර, වියට්නාම විප්ලවය තුළ ඇති ක්‍රියාකාරී හා උපායමාර්ගික භූමිකාව,  එහි වීරෝදාර අරගලය සහ අද එහි අඛණ්ඩ කටයුතුද ඇගයීමට ලක් කළේය. ජනාධිපති හෝ චි මිං මහතාට ද ඔහු උපහාර දැක්වීය. ශ්‍රේෂ්ඨ දේශප්‍රේමියෙකු සහ ජාත්‍යන්තරවාදියෙකු ලෙස හෝ චි මින් තුල වන අනන්‍යතාවය ඔහුගේ  විශේෂ ඇගයීමට ලක්විය. ලෝකයේ වේගයෙන්ම වර්ධනය වන ආර්ථික කලාපය වන ASEAN හි කොටසක් ලෙස, වියට්නාමය තම අසල්වැසි රටවල් සමඟ ශක්තිමත් ආර්ථික සබඳතා ඇති සාමාජිකයෙකු වන අතර, ඔවුන්ගේම අරගලය සඳහා ආශ්වාදයක් සහ ශක්තියක් ලබා දෙන මූලාශ්‍රයක් ලෙස සේවය කරන බව වෛද්‍ය වීරසිංහ වැඩිදුරටත් සඳහන් කළේය.

සහභාගී වූ පාර්ශවයන්ගෙන් ලැබුණු සුබ පැතුම් මගින් උත්සවය වඩාත් වර්ණවත් වූ අතර, එක් එක් පක්ෂ වියට්නාම් කොමියුනිස්ට් පක්ෂයේ උරුමය පිළිබඳව සිය ගෞරවය ප්‍රකාශ කළේය. මෙම උත්සවය 2026 මුල් භාගයේදී පැවැත්වීමට නියමිත වියට්නාම් කොමියුනිස්ට් පක්ෂයේ 14 වන ජාතික සම්මේලනය සම්බන්ධයෙන් ද  කරුණු ඉස්මතු කළේය.

මෙම සැමරුම, වියට්නාම් කොමියුනිස්ට් පක්ෂයේ සහ ශ්‍රී ලංකාවේ  සහෝදර දේශපාලන පක්ෂ අතර මිත්‍රත්වයේ සහ සහයෝගීතාවයේ බැඳීම් ශක්තිමත් කිරීමට සහ වියට්නාමය සහ ශ්‍රී ලංකාව ඔවුන්ගේ අනාගත සංවර්ධන උත්සාහයන්හිදී අඛණ්ඩව බැඳ තබන සහයෝගීතා ආත්මය සහ අන්‍යෝන්‍ය අභිලාෂයන් ශක්තිමත් කිරීමට, බෙදාගත් වටිනාකම් සහ ජයග්‍රහණ සැමරීමට වේදිකාවක් සපයන ලද අවස්ථාවක්ද විය.