ටිරාන් අත්අඩංගුවට ගැනීම වළක්වාලමින් අතුරු තහනම් නියෝගයක්

Jan 16, 2025 at 09:25 AM

|

Lanka Leader

හිටපු මහජන ආරක්ෂක අමාත්‍ය ටිරාන් අලස් ඇතුළු සිලෝන් නිවුස් පේපර්ස් පෞද්ගලික සමාගමේ අධ්‍යක්ෂවරුන් අපරාධ පරීක්ෂණ දෙපාර්තමේන්තුව මගින් අත්අඩංගුවට ගැනීම වළක්වාලමින් අභියාචනාධිකරණය අද අතුරු තහනම් නියෝගයක් නිකුත් කර තිබේ.

පුවත්පත් මුද්‍රණය කිරීම සඳහා යොදාගන්නා කඩදාසි සැපයීමේ ගිවිසුමක් උල්ලංඝණය කිරීමේ සිද්ධියක් සම්බන්ධයෙන් හිටපු අමාත්‍යවරයා ඇතුළු පිරිස අත්අඩංගුවට ගැනීමේ සූදානමක් ඇතැයි සඳහන් කරමින් අභියාචනාධිකරණය හමුවේ රීට් පෙත්සමක් ගොනුකර තිබිණි.

එම පෙත්සම අද සළකා බැලූවේ අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ බී. ශශී මහේන්ද්‍රන් යන විනිසුරු මඩුල්ල හමුවේය.

අනතුරුව විනිසුරු මඩුල්ල විසින් මේ මස 21 වනදා දක්වා බලපැවැත්වෙන පරිදි එම අතුරු තහනම් නියෝගය නිකුත් කර තිබේ.

පුවත්පත් මුද්‍රණයට කඩදාසි ලබාගෙන විසිනව කෝටි එක්ලක්ෂ හැත්තෑතුන්දහස් නවසිය අසූහතරක(290,173,984) මුදලකට අගරු චෙක්පත් ලබාදුන් සිලෝන් නිවුස් පේපර් පෞද්ගලික සමාගමේ සේවයේ නියුතු පුද්ගලයන් දෙදෙනෙකු අපරාධ පරීක්ෂණ දෙපාර්තමේන්තුවේ වාණිජ අපරාධ විමර්ශන ඒකකය විසින් පසුගියදා අත්අඩංගුවට ගෙන තිබිණි.

මෙලෙස අත්අඩංගුවට ගෙන ඇත්තේ, හෝමාගම හා පොල්ගස්ඕවිට ප්‍රදේශයේ පදිංචිකරුවන් දෙදෙනෙකි.

කේසර ලංකා නමැති ආයතනයකින් පුවත්පත් මුද්‍රණයට මෙලෙස කඩදාසි ලබාගෙන ඇති බව පොලිසිය පවසයි.

සිලෝන් නිවුස් පේපර් පෞද්ගලික සමාගම යනු හිටපු ඇමැතිවරයකු වන ටිරාන් අලස්ට අයත් මව්බිම ඇතුළු පුවත්පත් කිහිපයක් මුද්‍රණය කරන ආයතනයයි.