කියුබානු පීඩිත ජනයා වෙත කියුබානු විප්ලවයේ ජයග්‍රාහී අරුනළු රැගෙන විත් වසර 66ක්... ශ්‍රී ලංකාවේ බොලිවේරියානු සහයෝගිතාවයේ සුබ පැතුම්

Jan 2, 2025 at 04:54 PM

|

Lanka Leader

කියුබාවේ ආඥාදායක බැටිස්ටාගේ පාලනය අවසන් කර කියුබානු පීඩිත ජනයා වෙත කියුබානු විප්ලවයේ ජයග්‍රාහී අරුනළු රැගෙන විත් වසර 66ක් සපිරෙන මේ මොහොතේදී ඊට සුබ පැතුම් එක් කරන බව ශ්‍රී ලංකා බොලිවේරියානු සහයෝගිතාවය පවසයි. බොලිවේරියානු සහයෝගිතාවයේ සම්බන්ධිකරණ ලේකම් ජීවන්ත ජයතිස්ස මහතාගේ අත්සනින් යුතුව කියුබානු ජනාධිපති මිගුඑල් ඩයස්-කානෙල් මහතා වෙත ලිපියක් යොමුකරමින් ඔවුන් වැඩි දුරටත් පවසන්නේ.  කියුබානු විප්ලවය සමස්ත අධිරාජ්‍ය විරෝධී ලෝක ජනයාගේ උරුමයක් බවත් කියුබානු විප්ලවය ආරක්ෂා කිරීමට පෙරට පැමිණෙන සමස්ත අධිරාජ්‍ය විරෝධී ලෝක ජනයා සමඟ ශ්‍රී ලංකාවේ බොලිවේරියානු සහයෝගිතාවයේ සාමාජිකත්වයද අත්වැල් බැඳ ගන්නා බවයි. 

එම ලිපියේ සිංහල පරිවර්ථනය පහතින් බලන්න.

ගරු ජනාධිපති තුමා,

මිගුඑල් ඩයස්-කානෙල් මැතිතුමා,

කියුබානු සමූහාණ්ඩුව,

හවානා,

කියුබාව.

ගරු ජනාධිපති තුමනි,

66 වන කියුබානු නිදහස් දිනය වෙනුවෙන් ශ්‍රී ලංකාවේ බොලිවේරියානු සහයෝගිතාවයේ සුභ පැතුම්

අදින් වසර 72කට පෙර එනම් 1953 වර්ෂයේ ජූලි 26 වන දින අමෙරිකානු මුව විටේ පිහිටි ලෝකය එතරම් නොදන්නා කියුබාව නම් පුංචි දූපතේ දේශප්‍රේමි තරුණයන්ට නායකත්වය දෙමින් ෆිදෙල් කස්ත්‍රෝ නැමැති අසාහය විප්ලවවාදියා අසාර්ථක සන්නද්ධ අරගලයක නිරත විය.

අසාර්ථකවය තුළ වන සාර්ථක වීමට අවශ්‍ය අත්දැකීම් පෙරදැරි කරගෙන ෆිදෙල් නැවත වතාවක් සන්නද්ධ අරගලයක නිරත වෙමින් 1959 ජනවාරි 1 දා කියුබාවේ ආඥාදායක බැටිස්ටාගේ පාලනය අවසන් කර කියුබානු පීඩිත ජනයා වෙත කියුබානු විප්ලවයේ ජයග්‍රාහී අරුනළු රැගෙන ආවේය.

එතැන් පටන් කියුබානු විප්ලවය ආපසු හැරවීමට අමෙරිකානු අධිරාජ්‍යවාදියා නොගත් උත්සායක් නැති තරම්ය. අමෙරිකානු අධිරාජ්‍යවාදියාගේ කියුබානු විප්ලවය ආපසු හැරවීමට ගත් විවිධ උත්සාහයන් අතර අසාහය කියුබානු නායක ෆිදෙල් කස්ත්‍රෝගේ ජීවිතය බිලි ගැනීමට 637 වතාවක් උත්සහා කළේය. ඒ අනුව ලෝක ඉතිහාසයේ වැඩිම මර උගුල් සංඛ්‍යාවකින් සිය නායකයා බේරාගත් රට බවට කියුබාව පත් වී ඇතැයි පැවසීම අවිවාදිතය.

කෙසේ වුවද වත්මන් කියුබානුවෝ මේ වන විට පෙර කෙදිනක හෝ නොවු විරූ අධිරාජ්‍යවාදී පීඩනයකට ලක්ව සිටින්නාහ. දින ගණනක් සමස්ථ කියුබාව පුරාම විදුලිය නොමැති තත්වයකට පත් කිරීමට අමෙරිකානු සම්බාධක සමත් වී තිබුණි.

එහෙත් පසුගියදා කියුබාවේ අගනුවර වන හවානා නුවරට එක් රැස්වූ මිලියන ගණනක කියුබානුවෝ කියුබානු විප්ලවය අධිරාජ්‍යවාදීන්ගේ කෙනෙහිලිකම් වලින් ආපසු හැරවිය නොහැකි බව ලෝක ජනයා හමුවේ තහවුරු කළෝය.

වසර 66ක් වයසැති සමාජවාදී කියුබාව සමස්ත කියුබානු වැසියන් එක සිතින් පිළිගෙන ඇති බව පෙන්වන එම සාක්ෂිය අපගේද ධෛර්ය වඩවන බව අවධාරණය කරමු. 

ඒ අනුව ගරු ජනාධිපති තුමනි, කියුබානු විප්ලවය සමස්ත අධිරාජ්‍ය විරෝධී ලෝක ජනයාගේ උරුමයක් බව අපි අවධාරණය කරමු. එලෙසම කියුබානු විප්ලවය ආරක්ෂා කිරීමට පෙරට පැමිණෙන සමස්ත අධිරාජ්‍ය විරෝධී ලෝක ජනයා සමඟ ශ්‍රී ලංකාවේ බොලිවේරියානු සහයෝගිතාවයේ සාමාජිකත්වයද අත්වැල් බැඳ ගන්නා බව අවධාරණය කරමු.

කියුබානු විප්ලවය දිනේවා.

ස්තුතියි,

ජීවන්ත ජයතිස්ස,

සම්බන්ධීකරණ ලේකම්,

ශ්‍රී ලංකාවේ බොලිවේරියානු සහයෝගිතාවය.