අනුර ඉන්දියාව සමග ආරක්ෂක සහයෝගීතාවයකට අත්සන් කිරීමට එකඟවීම ඉන්දු - ලංකා ගිවිසුමටත් එහා යන දෙයක් - වෛද්‍ය වසන්ත බණ්ඩාර (වීඩියෝ‍)

Dec 26, 2024 at 05:15 PM

|

Lanka Leader

අනුර කුමාර දිසානායක ජනාධිපතිවරයා සහ ඉන්දීය අගමැති නරේන්ද්‍ර මෝදි අතර ඇතිකරගත් එකඟතාවයන් පිළිබඳව මේ වන විට සමාජය තුළ ආන්දෝලනයක් ඇති තිබෙන බවත්, ඉන්දීය විදේශ අමාත්‍යංශය විසින් එය ඒකාබද්ධ ප්‍රකාශනයක් ලෙස නිකුත්කර ඇති බවත් දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර මහතා පවසයි.

ඉන්දියාව තම විදේශ ප්‍රතිපත්තිය තීරණය කරනු ලබන්නේ සර්ධාර් පණික්කාර් න්‍යාය මත බවද, එය මහා භාරත න්‍යාය ලෙසද හඳුන්වන බවත් පවසන ඒ මහතා එම න්‍යායට අනුව කලාපයේ සියලු කුඩා රටවල් ගිවිසුම් මගින් අර්ධ යටත් විජිත ලෙස ඈඳා ගැනීම සිදුකරන බවද සඳහන් කරයි.

ඉන්දියාවේ 'රෝ' සංවිධානයද තමන්ගේ උපායමාර්ගික වැඩපිළිවෙල ලෙස විදේශ ප්‍රතිපත්තිය ක්‍රියාත්මක කිරීමේදී සලකන්නේ මෙම මූලධර්මය බවත්, එම මූලධර්මයට අනුව ඉන්දියාවේ 'සිකීම්' නමති ප්‍රන්තය 1975 දී ඈඳාගත් බවත් එම රටේ සිටි ජනාධිපතිවරයා එහි ආණ්ඩුකාරයා බවට පත්වූ බවත් වසන්ත බණ්ඩාර මහතා පෙන්වා දෙයි.

මෙම ක්‍රියාවලිය තුළ ශ්‍රී ලංකා රාජ්‍ය දුර්වල කිරීම සඳහා බෙදුම්වාදීන්ට ආයුද ලබාදී පුහුණු කිරීම් සිදුකළ බවත් පවසන ඒ මහතා, 1987 දී එදා බලයේ සිටි ජේ. ආර්. ජයවර්ධනගේ අත කරකවා, නීති විරෝධී ලෙස දේශසීමා ආක්‍රමණය කර බලපෑම් සිදුකරමින් ඉන්දියාව විසින් ඉන්දු ලංකා ගිවිසුම අත්සන් කළේද ඒ සඳහා බවත් පෙන්වා දෙයි.

ඉන්දු - ලංකා ගිවිසුම මගින් ශ්‍රී ලංකාව නමැති රාජ්‍ය බරපතළ අර්බුදයකට ලක්කළ බවද, ෆෙඩරල් රාජ්‍යක් රට තුළ නිර්මාණය කිරීමට එමගින් ප්‍රතිපාදන වෙන්වුවද එදා එල්ලවූ ජනතා විරෝධය නිසා ව්‍යවස්ථාවෙන් පූර්ණ ෆෙඩරල් රාජ්‍යක් නිර්මාණය කිරීමට නොහැකි වූ බවද ඒ මහතා සඳහන් කරයි.

එතනින් පසු 2001 රනිල් වික්‍රමසිංහ පාලනයේ දී බලපෑම් සිදුකර එම ක්‍රියාවලිය සිදුකිරීමට ඉන්දියාව උත්සාහ දැරූ බවත් පවසන වසන්ත බණ්ඩාර මහතා, එහිදී ඉන්දියාව දක්වා දුම්රිය මාර්ගය ස්ථාපිත කිරීමට මෙන්ම ඛනිජ තෙල් සංස්ථාවට තිබූ ඒකාධිකාරය බිඳ දමා IOC සමාගමට කොටස් ලබාදීම සිදුකළ බවද පවසයි.

ඊට පෙර චන්ද්‍රිකා කුමාරතුංග බලයට පත්වූ විට නිදහස් වෙළඳ ගිවිසුම ඇය ලවා ඉන්දියාව විසින් අත්සන් කළ බවද, එමගින් ශ්‍රී ලංකාවේ වෙළඳපොල ඉන්දියාවේ භාණ්ඩ සඳහා සම්පූර්ණයෙන්ම විවෘත කරගත් බවද පවසන ඒ මහතා එහි දිගුවක් ලෙස මහින්ද රාජපක්ෂ පාලන කාලයේ දී එට්කා ගිවිසුම 'සීපා" නමින් අත්සන් කිරීමට බලපෑම් කළ බවත් සඳහන් කරයි.

එහෙත් මහින්ද රාජපක්ෂ මහතා එය සූක්ෂම ලෙස වලක්වා ගැනීමට සමත් වූ බවත්,  මෙසේ පැමිණි ඉන්දීය බලපෑම නොයෙක් ආකාරයෙන් මතුවී අද ඒකාබද්ධ ප්‍රකාශ වල ඇතුළත් කරුණු සඳහා මූලික පදනම ඉන්දියාව විසින් දමාගත් බවත් වසන්ත බණ්ඩාර මහතා පවසයි.

මෙම ක්‍රියාවලියට අදාළ ලේඛන 7ක් ඇති බවත් සඳහන් කරන ඒ මහතා 2017 දී රනිල් වික්‍රමසිංහ අත්සන් කළ අවබෝධතා ගිවිසුම, 2023 ජූලි 21 රනිල් වික්‍රමසිංහ ඇතිකරගත් එකගතා ප්‍රකාශය, නරේන්ද්‍ර මෝදි සහ රනිල් වික්‍රමසිංහ නිකුත් කළ ප්‍රකාශ මෙයට ඇතුළත් බවත්  ඒ මහතා පවසයි.

2024 දෙසැම්බර් 16 දා  අනුර කුමාර දිසානායක ජනාධිපතිවරයා ඇතිකරගත් එකඟතාව ඉතා විස්තීරණ බවත්, එහි කරුණු 34ක් ඇති බවත් වසන්ත බණ්ඩාර මහතා හෙළිකරයි.

මහින්ද රාජපක්ෂ හිටපු ජනාධිපතිවරයාට සීපා ගිවිසුමෙන් ගැලවීමට හැකි වුවද, ගෝඨාභය රාජපක්ෂ බලයට පත්වී නැගෙනහිර ජැටිය ලබාදීමට අදානි සමාගමත් සමග එකඟතාවකට පැමිණිය ද මහජන විරෝධය නිසා එය වැළැත්වුනු බවත් වසන්ත බණ්ඩාර මහතා පවසයි.

ඉන්පසුව බැසිල් රාජපක්ෂ ඉන්දියාවට ගොස් හොර රහසේ ගිවිසුමකට එළඹුණු බවත් පවසන ඒ මහතා, සෑම පාලකයකුම බලට පැමිණි විට ඉන්දියාව කුමන හෝ එකඟතාවයක් ඇති කරගන්නා බවත් පෙන්වා දෙයි.

අනුර දිසානායක මහතා සමග ඉන්දියාව විසින් ඇතිකරගත් එකඟතා ඉතා සූක්ෂම බවත් ආරක්ෂ සහයෝගීතා රාමුවක් අත්සන් කිරීමට එකඟවීම මෙතෙක් ශ්‍රී ලංකාව නොකළ දෙයක් බවත් පෙන්වා දෙන ඒ මහතා එය ඉන්දු - ලංකා ගිවිසුමටත් එහා යන දෙයක් පවත් සඳහන්කරයි.