බෙදුම්වාදීන් අද සිවුරු ගාව ගත්ත ගමනකට අවතීර්ණ වෙලා තියෙනවා- මහාචාර්ය පූජ්‍යය මැදගොඩ අභයතිස්ස හිමියෝ ජනපතිට යොමු කරන මහජන සංදේශයට අත්සන් තබමින් පවසති

Dec 17, 2024 at 09:58 PM

|

Lanka Leader

බෙදුම්වාදීන්ගේ මාර්ග සිතියම අභියස නව විධායක ජනපතිඳුන්ගේ අභියෝගය හෙවත් මහජන සංදේශය විවිධ ජාතික සංවිධාන 55කට ආසන්න නියෝජිතයන්ගේ සහභාගිත්වයෙන් අද(17) පැපිලියාන සුනේත්‍රා මහාදේවී පිරිවෙනේදී මහාචාර්ය පූජ්‍ය ඉඳුරාගාරේ ධම්මරතන, මහාචාර්ය පුජ්‍ය මැදගොඩ අභයතිස්ස ඇතුළු භික්ෂූන් වහන්සේලාගේ අනුශාසකත්වයෙන් සාහිත්‍ය සූරී ගුණදාස අමරසේකර, ජේෂ්ඨ නීතිඥ කල්‍යානන්ද තිරාණගම, විශේෂඥ වෛද්‍ය අනුලා විජේසුන්දර, විශ්‍රාමික ලුතිතන් ජෙනරාල් ජගත් ඩයස් විශ්‍රාමික කර්නල් අනිල්  අමරසේකර, වෛද්‍ය වසන්ත බණ්ඩාර  යන මහත්ම මහත්මීන්ගේ මූලිකත්වයෙන් අත්සන් කරනු ලැබීය. එහිදී උත්සව සභාව අමතමින් මහාචාර්ය පූජ්‍ය මැදගොඩ අභයතිස්ස හිමියෝ,"සිවුර පොරවාගත් දේශද්‍රෝහී භික්ෂූන් වහන්සේලා යැයි සලකා ගන්නා පිරිසක් එකතු කරගෙන හිමාලයා ප්‍රකාශනය කියල ප්‍රකාශයක් කළා. උන් වහන්සේලා මේ  එළඹෙන 19 හෝ 20 දවස්වල කොළඹ හෝටලයක් වෙන් කරගෙන වැඩමුළුවක් තියන්න සූදානම්  කරගෙන යනවා කියල අපට දැනගන්නට ලැබිල තියෙනවා. අපි මේ මහා සංඝරත්නයට කියන්නේ ඒ වගේ දේශද්‍රෝහී වැඩකට ඔබ වහන්සේලා අත ගැහුවොත් ඔබ වහන්සේලාට මේ රටේ උපදින අනාගත පරම්පාරාවල දරුවො ඔබ වහන්සේලාට ශාප කරයි. මොකද මේ දෙමළ ඩයස්පෝරාව එකතු වෙලා මේ හිමාලයා ප්‍රකාශනය සම්බන්ධයෙන් ජනාධිපති තුමා හමුවෙලා කරුණු කියන්නත් 21 වෙනිදා වගේ දිනයක් දා ගෙන තියෙන බව සඳහන් කරල තිබුණා. ඒ අනුව සිවුරුගාව ගත්ත බෙදුම්වාදී ගමනකටත් ඔවුන් සූදානම් වී සිටිනවා. ඒ නිසා එදා සම්බන්ධන් කියූ කතාව එනම් වෙනස් මුහුණුවරවල් වලින් බෙදුම්වාදය ඉදිරියට ගෙනයන්න  වැඩපිළිවෙලවල් තෝරනවා." එහිදී මාධ්‍යවේදීන් වෙත අදහස් දක්වමින් දේශ හිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර මහතා," අද දින සුනේත්‍රා මහාදේවී පිරිවෙනට රැස්වූ ජාතික සංවිධාන වල නායකයින් අත්සන් කළ සංදේශයෙහි අඩංගු කරුණු මෝඩි අගමැති තුමා අනුර කුමාර ජනාධිපති තුමාට කී දේවල් වලින් අප කී දේ සත්‍යයක් බව තහවුරු වෙනවා. ඒ අනුව බෙදුම්වාදී බලවේග ඉන්දියාව වර්තමාන ආණ්ඩුවට කරන බලපෑම් සම්බන්ධයෙන් වගේම ඒ බලපෑම් වලට යටත් වුනොත් සිදුවන්නේ මොකක්ද කියන එක මේ සංදේශයේ සඳහන් වෙලා  තියෙනවා. මෙම සංදේශය සකස් කළේ ගරු ජනාධිපති තුමාගේ ඉන්දීය සංචාරයට පෙර. නමුත් එතුමාගේ ඉන්දීය සංචාරය අතර තුර ඉන්දීය අගමැති මෝඩි මැති තුමා කළ ප්‍රකාශ වලින් පැහැදිළි වෙනවා මේ සංදේශයේ අඩංගු වෙලා තියෙන කරුණු ඉතාම සත්‍යක්, සාධාරණයි වගේම කාලීනයි කියන එක. කෙසේ වෙතත් ගරු ජනාධිපති තුමා ඉන්දියාවේ අගමැති තුමාගේ ප්‍රකාශ වලට යටත් වන ප්‍රකාශයක් කළේ නැහැ. නමුත් ඉන්දියාවේ විදේශ අමාත්‍යාංශය කළ ප්‍රකාශයේ සඳහන් වෙනවා මීට පෙර ඇතිකරගත් එකඟතා වලට ගරු කළ යුතුයි කියල. ඒ එකඟතා ඇති කරගත්තේ වර්තමාන ජනාධිපති තුමා නෙවෙයි හිටපු ජනාධිපති රනිල් වික්‍රමසිංහ මහත්මයයි." යනුවෙන් පැවසුවේය.