වසන්තගේ පාර්ලිමේන්තුවේ කතාවට රත්න සහල් අධිපතිගෙන් ප්‍රභල පිළිතුරක්

Dec 7, 2024 at 03:08 PM

|

Lanka Leader

පසුගියදා පාර්ලිමේන්තුව අමතමින් අමාත්‍ය වසන්ත සමරසිංහ මහතා රත්න සහල් අධිපති ලංකේෂ්වරගේ මිත්‍රපාල සම්බන්ධයෙන් කළ ප්‍රකාශයකට ප‍්‍රතිචාර දක්වමින් තමන් සහල් සඟවා ගෙන ඇති බවට එල්ල කරන චෝදනා අසත්‍ය බව රත්න සහල් අධිපති ලංකේෂ්වරගේ මිත්‍රපාල මහතා පවසයි.

පාර්ලිමේන්තුවේ වරප්‍රසාද වලට මුවා වී ප්‍රකාශ නිකුත් කරනවාට වඩා වසන්ත සමරසිංහ මහතාට මගේ හාල් මෝල් වලට පැමිණ අප හාල් වෙළෙඳ පොලට යවනවාද නැද්ද කියා තහවුරු කරගත හැකි බවත් එතුමාට පැමිණීමට නොහැකි නම් දිසාපති තුමාට හෝ පැමිණ එය තහවුරු කරගත හැකි බවද රත්න සහල් අධිපති අධිපති ලංකේෂ්වරගේ මිත්‍රපාල මහතා පවසයි. අමාත්‍ය වසන්ත සමරසිංහ මහතා රත්න සහල් සමූහ ව්‍යාපාරය සහල් තොග සඟවා සිටින බවට කළ ප්‍රකාශය සම්බන්ධයෙන් අදහස් දක්වමින් මාධ්‍ය සාකච්ඡාවකදී මේ බව පැවසුවේය.

එලෙසම තමන් කිසිම බැංකුවකින් පොලී නොමැතිව ණය මුදල් ලබා ගෙන නැති බවත් පොලී රහිතව ණය දෙන බැංකුද නැති බවත් ඔහු අවධාරණය කළේය.

එහිදී වැඩිදුරටත් අදහස් දක්වමින්,“මම කියනවා වෙළඳ ඇමතිතුමාට මගේ ආයතනයට ඇවිල්ලා පරික්ෂා කරන්න. ඔබතුමාගේ නියෝජිතයෙක් එවන්න මම පටවන හාල් ගාන මම නිෂ්පාදනය කරන හාල් ගාන මගේ ළඟ තියෙන වී තොග පිළිබඳව මම ඔප්පු කරලා පෙන්නනවා. එතුමා කියලා තිබුණා මම බැංකුවෙන් සල්ලි ගන්නේ පොලී නැතුව කියලා.

අපි වී අරගන්නවා අපි බැංකුවෙන් සල්ලි අරගන්නව බැංකුවේ සල්ලි ගෙවන්න ඕන ආපහු මොකද වී ස්ටොක් එකක් තියාගෙන බැංකුවේ සල්ලි ගෙවන්න බැහැ. වී ටික අරගෙන සහල් නිෂ්පාදනය කරලා සහල් වෙළඳපලට යවලා ඒ සල්ලි ගෙනල්ලා.අපි බැංකුව නිදහස් කරන්න ඕනේ. නැත්තං සල්ලි වලට පොලිය හැදෙනවා." යනුවෙන් පැවසුවේය.

"මම මේ ප්‍රකාශනය කරේ පාර්ලිමේන්තුව කියන්නේ සියලු දෙනා අවධානය යොමු කරන තැනක් ඉතින් ඒ නිසා ඒක නිවැරදි කරන්න තමයි මේ දේ කළේ. ඕනෑම ආයතනයක සහල් හංගල තියාගැනීමක් නැහැ හංගගෙන තියාගෙන ඉඳලා තේරුමක් නෑ.ගොයම් කැපුනාම අපි වී ටික රැස් කරන්න ඕනෙ අවුරුද්ද පුරාම සහල් දෙන්න. එහෙම වී තිබුණොත් පමණයි සහල් දෙන්න පුළුවන්. මා ළඟත් මාස දෙකකට ඇතිවෙන්න වී තියෙනවා.දවසින් දෙකෙන් වී කොටන්න බෑ. මොකද පෙබරවාරි වෙනකල් මම හාල් රටට යවන්න ඕනේ. එක මාස දෙකෙන් කොටලා මම ඊගාවට මොකද කරන්නේ ?"