බන්ධනාගාර ගතව සිටින පූජ්‍ය ගලගොඩඅත්තේ ඥානසාර හිමි වෙනුවෙන් හා භික්ෂූන්ගේ ආගමික අයිතිවාසිකම් වෙනුවෙන් මහා සංඝරත්නයේ මූලිකත්වයෙන් ආරම්භ කළ පා ගමන අද (12) තෙවන දිනටත් පැවැත්වේ.

ඥානසාර හිමි අත්අඩංගුවට ගැනීමට පෙර තමන්ට ඇමතුමක් ලබාදී හමුවන ලෙස දැන්වූ බවත්, එහිදී උන්වහන්සේ පැවසුවේ උන්වහන්සේව අත්අඩංගුවට ගත් පසු සිවුර ගැලවීම අනිවාර්යෙන් සිදුකරන බව යැයිද, කළින්ම උන්වහන්සේ මේ පිළිබඳව දැනසිටි බවත්, තමන් සමග මේ සම්බන්ධයෙන් උන්වහන්සේ කතා කළ බවත් නීතිඥ සංජීව වීරවික්‍රම මහතා හෙළිදරව්වක් සිදුකරමින් පවසයි.

ඥානසාර හිමි උසාවියට අපහාස කිරීම සම්බන්ධයෙන් වන නඩුවේ සිටින චරිත හඳුනා ගැනීම ඉතා වැදගත් බවත් මෙම නඩුවේ පැමිණිලිකරු වන්නේ වර්තමාන අල්ලස් කොමිසමේ අධ්‍යක්ෂ ජනරාල් රංග දිසානායක බවත්, මෙම පැමිණිල්ල අභියාචනාධිකරණයට කළ පසු ඊළඟ සාක්ෂිකරු නැතිනම් දෙවන සාක්ෂිකරු වන්නේ වර්තමානයේ අතිරේක සොලිසිටර් ජනරාල් තනතුරේ සිටින දිලීප පීරිස් බවත්, මෙම නඩු තීන්දුව ලබාදෙන්නේ එවකට අභියාචනාධිකරණ විනිසුරු වූ වර්තමානයේ අගවිනිසුරු ප්‍රීති පද්මන් සූරසේන විසින් බවත් පිවිතුරු හෙළඋරුමයේ නායක, හිමපු අමාත්‍ය උදය ගම්මන්පිල පවසයි.

ගලෙගාඩ අත්තේ ඥානසාර හිමි අධිකරණයට ඉදිරිපත් කිරීමේ දී සිවුර ගලවා ඉදිරිපත් කිරීම බන්ධනාගාර නිත්‍ය නියෝගවලට පටහැනි බව ජාතික නිදහස් පෙරමුණේ නායක, එිටපු අමාත්‍ය විමල් වීරවංශ මහතා පවසයි.

නිකවැරටිය ප්‍රදේශයේදී පැවති ජනාධිපතිවරයාගේ ජනතා රැලිය ප්‍රදේශයේ මහා සංඝරත්නය විසින් වර්ජනය කර ඇති බවට සමාජ මාධ්‍ය ඔස්සේ තොරතුරු සංසරණය වෙමින් පවතී.

අනුරාධපුර පූජා නගරය ගොඩනැගීම සඳහා විශාල ආධාර මුදලක් ඉදිරියේදී ඉන්දියානු රජයෙන් ලැබීමට නියමිත බව ජනාධිපති අනුර කුමාර දිසානායක පවසයි.

කැරපොතු පක්ෂය හෙවත් ඉන්දියාවේ කොක්‍රෝච් ජනතා පක්ෂයේ නායක අභිජීත් දිප්කේ ඇතුළු නායකයින් තුන්දෙනෙකු නිදහස් කිරීමට අධිකරණය නියෝග කර තිබේ.

හැම පළාතකම අල්ලස් හෝ දූෂණ කොමිෂන් සභාවක් පිහිටුවීමට කටයුතු කරන බව ජනාධිපති අනුර කුමාර දිසානායක පවසයි.

සිරගත වන භික්ෂූන් වහන්සේලා සම්බන්ධයෙන් අදාළ නිකායේ හෝ පාර්ශ්වයේ නිර්දේශය මත චීවරය සහිතව බැහැරට ගෙනයාමට කටයුතු සැලැස්වීම සඳහා නව රෙගුලාසි සහ නිත්‍ය නියෝග සකස් කිරීමේ කටයුතු මේ වන විට ආරම්භ කර ඇති බව ජනාධිපති මාධ්‍ය අංශය නිවේදනයක් නිකුත් කරමින් පවසයි.