අනුරට එරෙහි නඩුවක් කැඳවන්න මහාධිකරණය නියෝග කරයි..

Jun 1, 2026 at 12:35 PM

|

Lanka Leader

ජනතා විමුක්ති පෙරමුණේ නායක වත්මන් ජනාධිපති අනුර කුමාර දිසානායක මහතා ඇතුළු විත්තිකරුවන් හත්දෙනෙකුට එරෙහිව නීතිඥ නාගානන්ද කොඩිතුවක්කු මහතා විසින් පවරා තිබූ රුපියල් බිලියනයක (රුපියල් කෝටි 100ක) අලාභය ඉල්ලා සිටි සිවිල් නඩුව ප්‍රතික්ෂේප කරමින් කොළඹ අතිරේක දිස්ත්‍රික් අධිකරණය ලබා දී තිබූ නියෝගය බස්නාහිර පළාත් සිවිල් අභියාචන මහාධිකරණය විසින් ඉවත දමා ඇත.

සිවිල් අභියාචන මහාධිකරණ විනිසුරුවරුන් වන චින්තක ශ්‍රීනාත් ගුණසේකර සහ එච්. එස්. පොන්නම්පෙරුම යන මහත්වරුන්ගෙන් සැදුම්ලත් ද්විපුද්ගල විනිසුරු මඩුල්ලක් විසින් මෙම තීන්දුව ප්‍රකාශයට පත් කරන ලදී.

ඒ අනුව, අදාළ මුල් නඩු වාර්තා වහාම කොළඹ දිස්ත්‍රික් අධිකරණය වෙත යොමු කිරීමටත්, නඩුව නැවත විභාගයට ගැනීමටත් මහාධිකරණය විසින් නියෝග කර තිබේ.

2019 පැවැති ජනාධිපතිවරණ සමයේදී තමන් ප්‍රබල දේශපාලන ව්‍යාපාරයක නිරත වූ බවත්, එය සෙසු දේශපාලන පක්ෂවලට තර්ජනයක් වූ බැවින් තමන්ගේ කීර්තිනාමය කෙලෙසීමේ අරමුණින් විත්තිකරුවන් කටයුතු කළ බවත් පැමිණිලිකාර නාගානන්ද කොඩිතුවක්කු මහතා වෙනුවෙන් අධිකරණයේදී කරුණු දක්වා තිබුණි.

පැමිණිල්ලේ සඳහන් කර ඇති ආකාරයට, ජනතා විමුක්ති පෙරමුණේ (7 වන විත්තිකරු) මෙහෙයවීම මත එහි පළමු විත්තිකරු වන ඕෂල හේරත් නැමැත්තා විසින් සමාජ මාධ්‍ය (Facebook) ඔස්සේ පැමිණිලිකරු වංචාකරුවෙකු සහ සොරෙකු ලෙස හඳුන්වමින් ද්වේෂසහගත ප්‍රකාශ නිකුත් කර ඇත.

එමෙන්ම, පැමිණිලිකරු බ්‍රිතාන්‍ය පුරවැසිභාවය අහෝසි කිරීමට උත්සාහ කළ අවස්ථාවේදී එය වැළැක්වීමට කටයුතු කිරීම, මැතිවරණ අරමුදල් වංචා කළ බවට චෝදනා කිරීම, සහ විදේශගත ශ්‍රී ලාංකිකයන් මුලා කර රුපියල් මිලියන 600-750 ක මුදලක් එකතු කිරීමට උත්සාහ කළ බවට මැතිවරණ කොමිසම හා පොලීසිය වෙත පැමිණිලි කිරීම මඟින් තමන්ට බරපතළ අගතියක් සිදු කළ බව පැමිණිලිකරු පවසා තිබුණි.

මීට අමතරව, අනුර කුමාර දිසානායක මහතාගේ ජනාධිපතිවරණ ව්‍යාපාරයට සහය දෙන ලෙස 1 වන සහ 6 වන විත්තිකරුවන් තමන්ට බලපෑම් කළ බව ද පැමිණිල්ලේ සඳහන් වේ.

මෙම ක්‍රියාවන් හේතුවෙන් තමන්ගේ කීර්තිනාමයට සිදු වූ අපහාසය වෙනුවෙන් රුපියල් බිලියනයක වන්දියක් විත්තිකරුවන්ගෙන් සමගාමීව සහ වෙන් වෙන් වශයෙන් අය කර දෙන ලෙස ඉල්ලමින් නාගානන්ද කොඩිතුවක්කු මහතා විසින් කොළඹ දිස්ත්‍රික් අධිකරණයේ DMR 1300/21 යටතේ නඩුවක් පවරා තිබුණි.

එහිදී විත්තිකරුවන් විසින් මතු කරන ලද මූලික විරෝධතාවලින් පසුව, 2023 මැයි 31 වන දින කොළඹ අතිරේක දිස්ත්‍රික් විනිසුරුවරිය විසින් සිවිල් නඩු විධාන සංග්‍රහයේ 46(2) වගන්තිය ප්‍රකාරව නාගානන්ද කොඩිතුවක්කු මහතාගේ පැමිණිල්ල ප්‍රතික්ෂේප කිරීමට පියවර ගත්තාය. දිස්ත්‍රික් අධිකරණය එලෙස පැමිණිල්ල ප්‍රතික්ෂේප කිරීමට හේතු වශයෙන් දක්වා තිබුණේ:

පැමිණිල්ල මඟින් නඩු නිමිත්ත උද්ගත වූ නිශ්චිත දිනයක් ප්‍රකාශ කර නොමැති වීම. (කාලාවරෝධී පනතේ 9 වන වගන්තිය අනුව මෙවැනි අලාභ හානි නඩුවක් නඩු නිමිත්ත උද්ගත වී වසර 2ක් ඇතුළත පැවරිය යුතුය

විත්තිකරුවන් විසින් සිදු කරන ලදැයි කියන විවිධ ද්වේෂසහගත ක්‍රියාවන්ගෙන්, නඩු නිමිත්තට පාදක වූ නිශ්චිත ක්‍රියාව කුමක්ද සහ ඒ සඳහා එක් එක් විත්තිකරුගේ දායකත්වය කුමක්ද යන්න පැහැදිලි නොවීම.

මෙම දිස්ත්‍රික් අධිකරණ නියෝගයට එරෙහිව නාගානන්ද කොඩිතුවක්කු මහතා විසින් සිවිල් අභියාචන මහාධිකරණය වෙත WP/HCCA/COL/02/2024 (F) යටතේ අභියාචනයක් ඉදිරිපත් කරන ලදී.

මෙම අභියාචනය දීර්ඝ වශයෙන් සලකා බැලූ මහාධිකරණ විනිසුරු මඩුල්ල, දිස්ත්‍රික් අධිකරණයේ තීන්දුව දෝෂසහගත බව නිගමනය කළේය. මහාධිකරණ විනිසුරු චින්තක ශ්‍රීනාත් ගුණසේකර මහතා තම තීන්දුවේ සඳහන් කර ඇත්තේ, දිස්ත්‍රික් අධිකරණයක් විසින් වන්දි නඩුවක පැමිණිල්ලක් පිළිගෙන විත්තිකරුවන්ට සිතාසි නිකුත් කිරීමෙන් පසුව, මූලික අවස්ථාවේදීම මෙලෙස පැමිණිල්ල ප්‍රතික්ෂේප කිරීමට ගත් තීරණය සාධාරණ නොවන බවයි.

තවද, කාලාවරෝධය පිළිබඳ ගැටලුව යනු නීතිය මෙන්ම කරුණු ද එකට මිශ්‍ර වූ සංකීර්ණ කරුණක් වන බැවින්, එය නඩුවේ මූලික අවස්ථාවේදීම පැමිණිල්ල දෙස පමණක් බලා තීරණය කළ නොහැකි බවත්, විත්තිකරුවන්ගේ විරෝධතා සහ සාක්ෂි විභාග කිරීමෙන් පසුව එය තීරණය කළ යුතු බවත් මහාධිකරණය පෙන්වා දුන්නේය.

සිවිල් නඩු විධාන සංග්‍රහයේ 46(2) (g) සිට (k) දක්වා වගන්තිවල පැමිණිල්ලක් ප්‍රතික්ෂේප කළ හැකි කරුණු පැහැදිලිව දක්වා ඇති අතර, දිස්ත්‍රික් අධිකරණ විනිසුරුවරිය විසින් දක්වා ඇති හේතු එකී ප්‍රතිපාදනවලට අනුකූල නොවන බව ද මහාධිකරණය අවධාරණය කළේය.

ඒ අනුව, අතිරේක දිස්ත්‍රික් විනිසුරුවරිය විසින් 2023.05.31 දින නඩුව ප්‍රතික්ෂේප කරමින් ලබා දුන් නියෝගය සම්පූර්ණයෙන්ම අවලංගු කිරීමට සිවිල් අභියාචන මහාධිකරණය තීන්දු කළේය.

මෙම නඩුවේ වගඋත්තරකරුවන් (විත්තිකරුවන්) ලෙස නම් කර ඇත්තේ

ඕෂල හේරත්

අනුර කුමාර දිසානායක (නායක, ජනතා විමුක්ති පෙරමුණ)

ටිල්වින් සිල්වා (ප්‍රධාන ලේකම්, ජනතා විමුක්ති පෙරමුණ)

කේ. ඩී. ලාල්කාන්ත (පරිපාලන ලේකම්, ජනතා විමුක්ති පෙරමුණ)

බිමල් රත්නායක (ජාතික සංවිධායක, ජනතා විමුක්ති පෙරමුණ)

ඉසුරු යූ. ඩී. සුබසිංහ (සාමාජික, ජනතා විමුක්ති පෙරමුණ)

ජනතා විමුක්ති පෙරමුණ (පැළවත්ත, බත්තරමුල්ල ලිපිනයේ පිහිටි පක්ෂය)

මෙම අභියාචන නඩු විභාගය සඳහා පැමිණිලිකාර නාගානන්ද කොඩيتුවක්කු මහතා වෙනුවෙන් නීතිඥ දර්ශන වේරදූවගේ මහතා පෙනී සිටි අතර, ජනතා විමුක්ති පෙරමුණ සහ අනුර කුමාර දිසානායක මහතා ඇතුළු 2 සිට 7 දක්වා විත්තිකරුවන් වෙනුවෙන් නීතිඥ තුසිත විජේකෝන් මහතා පෙනී සිටියේය. පළමු විත්තිකාර ඕෂල හේරත් මහතා වෙනුවෙන් නීතිඥ නිලුක් එස්. වෙල්ගම මහතාගේ උපදෙස් මත නීතිඥ රංග දයානන්ද මහතා ඇතුළු පිරිසක් පෙනී සිටියහ.

මෙම තීන්දුවත් සමඟ, රුපියල් බිලියනයක වන්දි නඩුව කොළඹ දිස්ත්‍රික් අධිකරණය ඉදිරියේ නැවත මුල සිට විභාගයට ගැනීමට නියමිතය.