ආපදාව උච්චතම අවස්ථාවට කළින් හදිසි අවස්ථා රෙගුලාසි ගැසට් කළේ ආණ්ඩුව ආපදාව කළින් දැන සිටි නිසාද?.. ආපදාව යොදාගනිමින් මර්ධනකාරී පොලිස් රාජ්‍යයක් සෑදීම සඳහා අවශ්‍ය රෙගුලාසි සම්මත කළ හැටි මෙන්න.. - වෛද්‍ය වසන්ත බණ්ඩාරගෙන් විශේෂ හෙළිදරව්වක්

Dec 23, 2025 at 04:21 PM

|

Lanka Leader

ගැසට් නිවේදනයක් ලෙස හදිසි අවස්ථා රෙගුලාසි සහ රනිල් වික්‍රමසිංහ මහතාට සම්මත කරගැනීමට නොහැකි වූ ප්‍රතිත්‍රස්ත පනත වෙනත් නමකින් මහජන සාකච්ඡාව සඳහා යොමුකළ ලේඛනයක් ලෙස ලේඛණ දෙකක් මේ වන විට ආණ්ඩුව විසින්  ඉදිරිපත් කර ඇති බවත්, මෙම ලේඛණ අධ්‍යයනය කිරීමෙන් සිනාසිය යුතුද, නැතිනම් හැඬිය යුතුද, එසේත් නැතිනම් හිසට වෙඩිතබාගත යුතුදැයි සිතාගත නොහැකි බවත් දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර මහතා පවසයි.

අද(23) දින ජාතික සංවිධාන එකමුතුව මගින් පැවැත්වූ මාධ්‍ය සාකච්ඡාවකට එක්වෙමින් ඒ මහතා පැවසුවේ මෙම හදිසි අවස්ථා රෙගුලාසි පනවන්නේ නොවැම්බර් 28 දා බවත්, එනම් ආපදාව උච්චතම අවස්ථාවට පත්වීමට පෙර බවත් ය.

28 වැනිදා නිකුත් කිරීමට නම් මෙය ආපදාව උච්චතම අවස්ථාවට පෙර සකස් කළ යුතු බවත්,  එසේනම් ආපදාවක් ඇතිවන බව කළින් දැන සිටියා ද යන්න විමසීමට සිදුවන බවත් ඒ මහතා පවසයි.

ආපදාවට පෙර ආපදාවෙන් පසුව ගතයුතු ක්‍රියාමාර්ග ගැසට් කිරීම බරපතළ ප්‍රශ්නයක් බවත් පෙන්වා දෙන ඒ මහතා ආපදාව කළමනාකරණය කිරීමට ආපදා කලමණාකරණ පනත යටතේ ප්‍රතිපාදන ඇති බවත්, මහජනයාගේ ප්‍රජාතන්ත්‍රවාදී අයිතිවාසිකම් උදුරා ගනිමින්, මහජනයා පීඩාවට පත් කිරීමට බිය වැද්දීමට මීට පෙර මෙලෙස නීති නොසෑදූ බවත් පෙන්වා දෙයි. 

ආපදාවට පෙරම මෙවැනි ලේඛණයක් සකස් කිරීම සැකකටයුතු දෙයක් බවත්,  ආපදාව වෙන්නත් පෙර ආපදාව යොදාගනිමින් මර්ධනකාරී පොලිස් රාජ්‍යයක් සෑදීම සඳහා අවශ්‍ය රෙගුලාසි සම්මත කළ බවත් වසන්ත බණ්ඩාර මහතා මෙහිදී චෝදනා කළේය.

මෙයට අත්සන් තැබූ ජනාධිපති අනුර කුමාර දිසානායක සහ මෙය සෑදූ නිලධාරීන් සියලුදෙනා ලැජ්ජා විය යුතු බවත් මෙහිදී ඒ මහතා පැවසීය.

දණ්ඩනීති සංග්‍රහයේ 365, 365 ආ වගන්ති නැතහොත් සමලිංගික ක්‍රියා සහ ළමා අපචාර වැළැක්වීම සඳහා වන වගන්ති හදිසි අවස්ථා රෙගුලාසිවල යොදා තිබීම හාස්‍යජනක ක්‍රියාවක් බවත්, මේ දෙක අතර ඇති සම්බන්ධය කුමක්දැයි වටහාගත නොහැකි බවත් ඒ මහතා මෙහිදී පෙන්වාදෙන ලදී.

අපදා අවස්ථාවේදී කළ යුත්තේ මහජනයා බිය ගැන්වීම නොවන බවත්, මෙය ආපදා අධිරාජ්‍යවාදී මෙහෙයුමක් බවත් පෙන්වා දෙන වසන්ත බණ්ඩාර මහතා,  ආපදාවෙන් සිදුවූ විපතින් රට ගලවා ගැනීමටද නැති නම් ආණ්ඩුව ආපදාව නිසිලෙස කලමණාකරණය නොකිරීම නිසා ආණ්ඩුව ආපදාවට ලක්වීමෙන් ගැලවීමට මෙම නියෝග ගෙනආවේ දැයි ප්‍රශ්නයක් ඇති බවත් මෙහිදී සඳහන් කළේය.

එමෙන්ම රනිල් වික්‍රමසිංහ මහතා ගෙන ඒමට උත්සාහ දැරූ ප්‍රතිත්‍රස්ත පනත "ජාතික ආරක්ෂාව ආරක්ෂා කිරීමේ පනත" නමින්  වෙනත් නමකින්  ගෙන ඒමට කටයුතු කරමින් ඇති බවත් වසන්ත බණ්ඩාර මහතා මෙහිදී පැවසී්‍ය.

මෙහිදී හදිසි නීතිය යටතේ පනවා සිදුකිරීමට යන සියලුදේ සාමාන්‍ය නීතිය යටතේ කිරීමට වරදවල් ලෙස දක්වා ඇති බවත් ඒ මහතා හෙළිකරයි.

රනිල් වික්‍රමසිංහ සෑදූ පනතේ වගන්ති එහාට මෙහාට වෙනස්කර, අමතරව බරපතළ කරුණු ඇතුළුකර ජනාධිපතිවරයාට ඕනෑම සංවිධානයක් තහනම් කළ හැකි වන පරිදි මෙය සකස් කර ඇති බවත් වසන්ත බණ්ඩාර මහතා මෙහිදී සඳහන් කළේය.