ජිනීවා හි සිදුවීම පිළිබඳව ගෝලීය ශ්‍රී ලාංකික සංසදයේ කනස්සල්ල..

Oct 9, 2025 at 11:44 AM

|

Lanka Leader

ජිනීවා මානව හිමිකම් සමුළුවේදී  ශ්‍රී ලංකාව සම්බන්ධයෙන් යෝජනාවලියක් ඉදිරිපත් කෙරුනු අතර, ඒ පිළිබඳව විදේශ අමාත්‍ය විජිත හේරත් මහතා වෙත  කරුණු දක්වමින් ගෝලීය ශ්‍රී ලාංකික සංසදයේ විධායක ලේකම් යසස් ධර්මදාස මහතා කනස්සල්ල පළකර තිබේ.

මේ පිළිබඳව ඒ මහතා නිකුත්කර ඇති ප්‍රකාශය පහළින්..

පසුගිය සැප්තැම්බර් මස 8 දින ඔබතුමා විසින් ජිනීවාහි මානව හිමිකම් සමුළුවේදී සිදුකරන ලද ප්‍රකාශය පිළිබඳව අප සතුට ප්‍රකාශ කලෙමු. අපගේ එම ප්‍රකාශයේ ඔබතුමාගේ ප්‍රකාශය සාක්ෂාත් කරගැනීම සඳහා අප විසින් යෝජනා තුනක් ඉදිරිපත් කරන ලදී. එනම්:

1) රටට එරෙහිව ප්‍රඥ්ඥප්තියක් එන්නේනම් එයද පරාජය කිරීම;

2) කිසිදු ජාතිකවාදී රජයකින් ඉටු නොකළ රණවිරුවන් හට යුක්තිය ඉටුකිරීම සඳහා "ස්වභාවික යුක්තිය" දිනාදීම ; හා

3) යෝජිත සත්‍ය සෙවීමේ සහ ප්‍රතිසන්ධාන කොමිසම නීතිය සහ අභිචෝදක කාර්යාල නීතිය බලාත්මක කරන පනත් සම්මත කිරීමෙන් වළකින ලෙසත් ඉල්ලා සිටියෙමු.

කෙසේ උවද ඉහත අංක 3 හි සඳහන් අනපනත් දෙකම කඩිනමින් සම්මත කර ගැනීමට කටයුතු සිදුවෙමින් පවතින බව අපට කණගාටුවෙන් නිරීක්ෂණය වෙමින් පවතී.

කිසිදු ජාතිකවාදී රජයකින් ඉටු නොකල ඉහත අංක 2 හි සඳහන් "ස්වභාවික යුක්තිය ඉල්ලීම" ඔබතුමාලාගේ රජයෙන් ඉටුවේවි යැයි බලාපොරොත්තු නොවිය හැක්කේ රණවිරුවන්ට එරෙහිව යුද අපරාධ චෝදනා සම අනුග්‍රහය ලබාදී පිළිගත් මෛතීපාල රනිල් යහපාලන රජයේ ඔබලාද ප්‍රබල පාර්ශ්ව කරුවෙකු බැවිනි.

ඉහත අංක 1 ඉල්ලීමවූ රටට එරෙහිව ප්‍රඥ්ඥප්තියක් එන්නේනම් එයද පරාද කිරීමට කිසිදු උත්සාහයක් නොගැනීමද ඔබලා විසින් සම අනුග්‍රහයදී යුද අපරාධ චෝදනා පිළිගත්තා හා සමාන ක්‍රියාවකි.

එදා 2015 දී 30/1 ප්‍රඥප්තිය යහපාලන රජයේ දැඩි බලපෑම මත පිළිගැනීමේදී එවකට හිටපු නේවාසික නිත්‍ය නියෝජිත රවිනාත් ආරියසිංහ මහතා එය බාරගනු ලැබුවේ එම චෝදනා විමර්ශණය කිරීමකට භාජනයකිරීම සහ ඊට අනුකූලව ඉදිරිපත්කර තිබූ දඬුවම් ක්‍රියාත්මක කිරීමයි. එහෙත් පසුව යහපාලන රජය විසින් චෝදනා පිළිබඳව විමර්ශණය නොකළ අතර සඳහන් කර තිබුන දඬුවම් ක්‍රියාත්මක කරන ලදී. ඒ අනුව පාස්කු ප්‍රහාරයට මූලික උන බුද්ධි අංශ දඩයමේ සිට දඬුවම් ක්‍රියාත්මක කිරීමට අවශ්‍ය නීති සම්පාදනය කරන ලදී. 

මෙවර සැසියේදීද පෙර හිටපු නේවාසික නිත්‍ය නියෝජිත රවිනාත් ආරියසිංහ මහතාගේ මග යමින් වත්මන් නේවාසික නිත්‍ය නියෝජිත තනතුර හොබවන හිමාලි අරුණාතිලක මහත්මිය විසින් 60/1 යෝජනා ප්‍රතික්ෂේප කරන ලදී. ඒ පිළිබඳව එතුමියට සහ එතුමියට අනුමැතිය ලබාදුන් රජයටද ස්තුතිවන්ත වෙමි.

අවසාන වශයෙන් රජයෙන් ඉල්ලා සිටින්නේ

1) කිසිදු ජාතිකවාදී රජයකින් ඉටු නොකළ රණවිරුවන් හට යුක්තිය ඉටුකිරීම සඳහා "ස්වභාවික යුක්තිය" දිනාදීම; 

2) යෝජිත සත්‍ය සෙවීමේ සහ ප්‍රතිසන්ධාන කොමිසම නීතිය සහ අභිචෝදක කාර්‍යාල නීතිය බලාත්මක කරන පනත් සම්මත කිරීමෙන් වැළකීම; හා

3) පසුගිය රජයන් විසින් සම්මත කර ක්‍රියාත්මක කරමින් පවතින බෙදුම්වාදයට මාර්ගය හෙලිකරන, රණවිරුවන් දඩයම් කරන ඊනියා ප්‍රතිසංධාන හා වැලැක්වීමේ ක්‍රියාකාරම් නවතන ලෙසයි.